Lankɛnimayɛ 9

1Wo kɔma, melika loli nyɔgɛ ya ata buri fɛ. N ya lole yen bɔla san ma nun ka bui dugu kole kuma. Alla ya denka-dan-yenbɛlɛ da-nyin di a ma. 2Lole wo ya denka-dan-yenbɛlɛ laka. Ta-sisi ye bɔla a rɔ iko sulubondon-ta-sisi-wɛ. Tele anubɛ fɔnyɔ finta ta-sisi wo bolo min bɔra denka-dan-yenbɛlɛ wo rɔ. 3Kondɔnnu bɔra ta-sisi wo rɔ dugu kole kuma. Alla ya sɛnbɛ di anu ma iko bondalɛ. 4A ya a fɔ anu ye ko bin wo, kɔlɔma wo, ki-fen wo, anu kana wo tɔrɔ fɔ mɔgɛnu dɔrɔn, Allata mandan sa minnu telɛ ma kɔni. 5A ya a fɔ kondɔn wonu ye ko anu kana mɔgɛ wonu faga fɔ ka anu nyankankantan karɛ loli kɔrɔ. Dumɛ min bi anu na nyankankantan wo rɔ, wo tɔrɔyɛ mani de iko bondalɛ wa mɔgɔ bon. 6Karɛ lolɛ wo kɔrɔ, mɔgɛ wonu si sayɛ nyini kɔnɔ anu ti ke a sɔrɔnna. Faga-sɔgɛ si anu bira kɔnɔ sayɛ si a buri anu kɔrɔ. 7Kondɔn wonu manɛ iko soee minnu tabɛnnɛ kɛlɛ-kɛ-koe la. Fan do ye anu kunyɛ la min manɛ iko sɛnɛ-mansaya-fulɛ. Anu yakɔrɛ manɛ iko mɔgɛ yakɔrɛ. 8Anu kun-sigi manɛ iko musi-kun-sigi. Anu nyin manɛ iko yara-nyin. 9Fan do ye anu kɔgɔ-dɛ rɔ min manɛ iko kɔgɔ-matanka-fan min nadannɛ nɛgɛ la. Anu kanban-tagbesi-kan manɛ iko so-siyamɛnu tenbi kirindinu saganna anu burimatoe kɛlɛ kɛ tinɛ. 10Anu mɔgɔ bon tinɛ min bi anu fɔɛn-sungban la, wo mani de iko bondalɛtɛ. Ni anu ya mɔgɛ bon anu fɔɛn wo la, karɛ loli, a ye wo dumɛ kɔrɔ. 11Mansɛ min bi anu kun na, melika le wo la min bi kun-tigiyɛ kɛla denka-dan-yenbɛlɛ kun na. Ale tɔgɛ Hiburu kan rɔ ko, “Abadon.” A tɔgɛ le Kiriki kan rɔ ko, “Apɔliyɔn.” Wonu kɔrɛ le ko, “Halakilɛ.” 12Gbalo fɔlɛ ara tenbi. Kɛ kɔma, a ara to gbɛ gbalo fila. 13Wo kɔma, melika wɔrɔ nyɔgɛ ya ata buri fɛ. Saraka bɔ tinɛ min nadannɛ sɛnɛ la, wo sɔnɛ Alla yakɔrɔ. N ya kuman kan lamɔɛn ka bɔ wo tonko nanɛnu tɔ. 14Kuman kan wo kumara melika wɔrɔ nyɔgɛ wo ye, buri ye min bolo tɔ kɔni. A ko, “Melika nanɛ minnu kirinɛ Yufereti-ba-kinamɛ dafɛ, wonu fulen!” 15Mɔgɛ bɛɛ faranɛ sigi tina sawa la, melika nanɛ wonu fulenta ka mɔgɛ wonu sigi tina kelan faga. Alla ya anu namara wati wo nyɛrɛla ko la, tele wo nyɛrɛ rɔ, karɛ wo nyɛrɛ la, san wo la gben! 16Kɛlɛ dan minnu siginɛ soeenu na, wonu yatɛ fɔra n ye. Wulu kɛmɛ fila (200,000,000) le nun. 17Nna ko-rayirɛ wo rɔ, n ya soeenu yen anubɛ minnu siginɛ anu na. Kɔgɔ-matanka-fan minnu wulennɛ iko tɛ, wo ye anu bolo anubɛ a bilolamɛ iko kuru-da-gbɛlɛ min tɔgɛ safaira anubɛ min nɛrɛ-munkulamɛ. Soee wonu kunyɛnu mani de iko yarɛnutɛ. Tɛ anubɛ ta-sisi anubɛ munku-gbɛ ye bɔla anu da rɔ. 18Mɔgɛ faranɛ sigi tina sawa la, wo sigi tina kelan fagara tɔrɔya-fitina sawɛ wo bolo. Tɛ anubɛ ta-sisi anubɛ munku-gbɛ minnu bɔra soee wonu da rɔ, wo le ya mɔgɛ wonu faga. 19Ado soee wonu sɛnbɛ ye anu dɛ anubɛ anu fɔɛn fanan tɔ. Anu fɔɛn-sungban manɛ iko duguma-fan-kunyɛ, ado anu si mɔgɛ madumɛ wonu denu na. 20Mɔgɛnu ya bɛsɛ minnu nadan anu bole la, anu ma tubi ka fara wonu kɔɛ la. Mɔgɛ toe wonu ma faga fitina sawɛ wonu kɔrɔ. Anu ma fara nyina-kɔɛ la. Bɛsɛ minnu nadannɛ sɛnɛ anubɛ wodi-gbɛ la wo, bɛsɛ minnu nadannɛ silɛɛ anubɛ kuri la wo, bɛsɛ minnu nadannɛ kɔlɔma la wo, anu ma fara wonu fanan kɔɛ la. Bɛsɛ wonu ti ke fen yenna. Anu ti ke ko lamɔɛnna. Anu ti ke tagamana. Anu ti ke fenfen mala. 21Anuna mɔgɔ-fagɛ wo, anuna duriyɛ wo, anuna yɛlɛnyɛ wo, anuna kankanyɛ wo, anu ma fara wonu na ka tubi mumɛ!

will be added

X\