Lankɛnimayɛ 5

1Ale min mayiginɛ mansaya-sigi-fan wo rɔ, n ya gbolo-lamininɛ yen a bolo nyimɛ rɔ. A tɔnkɔn filɛ bɛɛ masɛbɛnɛ. A dɛ gbalɔnnɛ li-kɛɛn la dinkira wɔrɔnfilɛ. 2N ya melika-sɛnbɛ-tigi-ba yen. Wo kumara a kan ba la ko, “Gbole kɛ gbalɔnnɛ li-kɛɛn minnu na, yon si ke wonu bɔla a ma ka a lafulen?” 3Kɔnɔ Arinyɛni tɔ wo, dugu kole kuma wo, dugu kole kɔrɔ wo, mɔgɔ wo mɔgɔ ma taran min si gbole wo lafulen ka a burɛ rafɛlɛn. 4N dira bɛrɛkɛ bawo mɔgɔ wo mɔgɔ ma taran min si ke gbolo-lamininɛ wo lafulenna ka a burɛ rafɛlɛn. 5Nba, kɛmɔgɔ kelen ya a fɔ n ye ko, “I kana di! I yɛ lata! Yarɛ min bɔnɛ Yuda bɔnsɔn rɔ, Dawuda bɔnsɔn malɔnnɛ kɔni, wo ara nɔ-koe sɔrɔn a yogenu ma. Wo si ke li-kɛɛn wɔrɔnfilɛ wonu bɔla gbolo-lamininɛ wo ma ka a lafulen.” 6Wo kɔma, n ya saga-dan-sɔnɛ yen mansaya-sigi-fan wo tɔgɔfɛ, a lafoonɛ dali-fen nani anubɛ kɛmɔgɛ wonu na. Saga-dan wo manɛ iko anu bara min faga nun. Kere wɔrɔnfila anubɛ ya-wɔrɔnfila ye a kuma. Allata Ni wɔrɔnfilɛ le wonu na minnu natanɛ duninya kan tinɛ bɛɛ rɔ. 7Saga-dan tara ka gbolo-lamininɛ bɔ mansaya-sigi-fan-sigilɛ wo bolo nyimɛ rɔ. 8A ya wo ma tumɛ min, dali-fen nani anubɛ kɛmɔgɔ mogan-ni-nanɛ wonu ya anu sa saga-dan kɔrɔ. Sɔrɔn ye anu kelen-kelennamɛ-bɛɛ bolo anubɛ sɛnɛ-pani-kunbɛ minnu nafanɛ isɛnti la. Fen-suma-diyamɛ wo, Allata mɔgɛnuna madiyalɛnu denu bi wonu na. 9Anu ya bɛti-kurɛ do bɔ. Anu ko, “I si ke ka gbolo-lamininɛ wo bi ka li-kɛɛn wonu bɔ a ma bawo anu bara i faga nun. I ya mɔgɛnu san Alla ye ila sayɛ fɛ ka bɔ bɔnsɔn bɛɛ rɔ anubɛ mɔgɛ bɛɛ rɔ anubɛ sibole bɛɛ rɔ iko anu kan faranɛ nya min. 10I wara anu ma sibole anubɛ saraka masɔlɛnu na minnu si wɔli mata Alla ye. Ado anu si kun-tigiyɛ kɛ dugu kole kuma.” 11Wo kɔma, n ya n yɛ lata. N ya melikanu-kan lamɔɛn. Wonu yatɛ ti ke lɔnna! Anu sɔra mansaya-sigi-fan anubɛ dali-fen nani anubɛ kɛmɔgɛnuna foolɛ rɔ. 12Anu ya bɛti bɔ anu kulu mayɛlɛnɛ la. Anu ko, “Saga-dan min fagara kɛ, wo le si ke sɛnbɛ anubɛ nɔnfuli anubɛ hɛnkili anubɛ fanka anubɛ bonyɛ anubɛ gbiliyɛ anubɛ tantolɛ bɛɛ sɔrɔnna!” 13Dali-fan minnu bi san kole rɔ wo, minnu bi dugu kole kuma wo, minnu bi dugu kole kɔrɔ wo, minnu bi kɔgɔ-yi rɔ wo, anu bi bɛti bɔla ko, “Ale min mayiginɛ mansaya-sigi-fan rɔ, alamɛ tantolɛ anubɛ bonyɛ anubɛ gbiliyɛ anubɛ sɛnbɛ-ba dira ale anubɛ saga-dan ma habadan!” 14Dali-fen nani wonu fanan ya a labira, “Amina!” Kɛmɔgɛnu ya anu sa dugi ma ka batoli kɛ.

will be added

X\