Lankɛnimayɛ 22

1Melika ya bɛ fanan yira n na min si nimayɛ di mɔgɔ ma. Bɛ wo gbɛnɛ iko daimon. A ye bɔla Alla anubɛ saga-danta mansaya-sigi-fan kɔrɔ. 2A ye yigila soe tɛma den! Nimaya-kɔlɔmanu bi bɛ wo tɔnkɔn bɛɛ rɔ. Anu bi gbɔla kinyama tan-ni-fila san kɔrɔ. Anu yanba-kunyɛnu bi sibolenu nakɛndɛyala. 3Fenfen min bi Allata dankɛ kɔrɔ, wo ti taran soe wo burɔ. Alla anubɛ saga-danta mansaya-sigi-fan si taran soe wo burɔ. Ala wɔli kɛlɛnu si to a batola. 4Anu si a yakɔrɛ yen. A tɔgɔ sɛbɛnɛ si taran anu telɛnu ma. 5Suyi ti don nyɔ tun. Anu mako ti taran lɛnpu la, hali teleta waan la bawo Mari Alla nyɛrɛ si ma anuta waan la. Anu si mansayɛ kɛ nyɔ habadan! 6Wo kɔma, melika ya a fɔ n ye ko, “Kumɛ kɛnu, tonyɛ le. Mɔgɛnu si la wonu na. Mari Alla min ya ata Ni Sɛnimɛ di nɛbinu ma, wo le ya ala melika sɔ ala wɔli kɛlɛnu ma ka koe wonu yira anu na minnu bi nala mala tiriya!” 7Yisa ko, “Wa wo tole masɔ! N bi nala tiriya! Minnu bi kitabu kɛta wɔlɔyiya-kumɛnu birala, mɔgɔ-sewanɛ le wonu na!” 8Nde, Yɔni ya koe kɛnu namɔɛn ka wo bɛɛ yen ko-rayirɛ rɔ. Nba, n banta anu namɔɛnna tumɛ min ka anu yen, melika min ya koe kɛnu yira n na, n ya n sa wo kɔrɔ a bato tinɛ. 9Kɔnɔ a ya a fɔ n ye ko, “I kana wo ma de! Wobɛ i na kelen nyɔgɛ nɛbinu, ma wɔli-kɛ-nyɔgɛnu de ma nyɔgɔn na anubɛ min bɛɛ ye kitabu kɛta kumɛnu birala. I si Alla le dɔrɔn bato!” 10A ya a fɔ n ye fanan ko, “I kana wɔlɔyiya-kumɛ kɛnu ma gbundu koe la bawo koe kɛ bɛɛ kɛ-tumɛ ara gbɛrɛn. 11Mɔgɔ-yogenu si to ko-yogomɛ kɛla dɛɛ! Mɔgɔ-kɔsɔnɛnu si to ko-kɔsɔnɛ kɛla dɛɛ! Sɔn-nyima-tiginu si to sɔn-nyimaya-koenu kɛla dɛɛ! Min sɛninyanɛ, wonu si to sɛninyɛ rɔ dɛɛ!” 12Yisa ko, “Wa wo tole masɔ! N bi nala tiriya! N si na nta barayi la n bolo ka a di mɔgɔ kelen-kelennamɛ-bɛɛ ma iko ata kɛwɔlɛnu bi nya min. 13A fɔlɛ anubɛ a laban le nde la, a dabirɛ anubɛ a kundɔn.” 14Mɔgɔ-sewanɛ le wo mɔgɛnu na minnu bi anuna durukinu kula ka anu sɛninyanɛ mara. Anu si sɛnbɛ sɔrɔn ka nimaya-kɔlɔma-gbɔɛ dɔn anubɛ ka don soe wo burɔ a dɛnu na. 15Kɔnɔ haramu-ko-kɛla bɛɛ, a duru wo, a yɛlɛn wo, a mɔgɔ-fagala wo, a bɛsi-kɔla wo, minnu bara foninya-fɔɛ keni wo, wonu bi soe kɔma. 16Yisa ko, “Nde, Yisa ara nta melika sɔ ka koe kɛnu fɔ wo ye chɔchinu tɔ. Dawuda-bɔnsɔn-kinama-wɛ le nde la. Banda-ka-da-lole malannɛ le nde la.” 17Allala Ni Sɛnimɛ anubɛ kɔnyɔ-kurɛ wo ye a fɔla ko, “Na!” Ni mɔgɔ wo mɔgɔ ya kɛ lamɔɛn, wo fanan ni a fɔ ko, “Na!” Ni min kan lagbalanɛ, na de! Ni min bi nimaya-yi fɛ, wo ni na a min, a sɔnkɔ sa. 18Min bɛɛ ye kitabu kɛta wɔlɔyiya-kumɛnu namɔɛnna, nde, Yɔni ye wonu makawandila bɛrɛkɛ! Ni mɔgɔ wo mɔgɔ ya do sa wonu kuma, fitinɛ minnu fɔnɛ kitabu kɛ rɔ, Alla si tɔrɔyɛ wonu sa wo tigi kuma. 19Nba, ni mɔgɔ wo mɔgɔ ya do bɔ kitabu kɛta wɔlɔyiya-kumɛnu na, Alla si atɛ bɔ nimaya-kɔlɔma-gbɔɛ-sɔrɔn-koe rɔ. A kakɛn, a ni min sɔrɔn so-sɛnimɛ wo burɔ minna koe fɔnɛ kitabu kɛ rɔ, a si foo wo bɛɛ la. 20Ale min bi koe kɛ bɛɛ sereyɛ bɔla, wo ye a fɔla ko, “Tonyɛ le serr! N bi nala tiriya!” Ado alamɛ a mara wo nya na le. Na, Mari Yisa! 21Alamɛ Mari Yisata hinɛ tora wo dama fɛ.

will be added

X\