Lankɛnimayɛ 21

1Wo kɔma, n ya san-kolo-kurɛ yen anubɛ dugu-kolo-kurɛ. San-kole fɔlɔtɛ anubɛ dugu-kole fɔlɔtɛ, wonu bara tenbi ka tunu yen! Ado kɔgɔ-yi fanan sa nyɔ tun. 2Nba, n ya Yerusalɛm-So-Sɛnima-kurɛ yen yigila ka bɔ Arinyɛni tɔ Alla bolo. Soe wo makirinɛ, ado a rabɛnnɛ iko kɔɛn-kurɛ rabɛnnɛ nya min ala keila ko la. 3N ya kuman-kan-ba lamɔɛn ka bɔ mansaya-sigi-fan rɔ. A ko, “Alla mayiginɛ mɔgɛnu fɛ kaka! Ado a si to anu fɛ. Anu si ma ata mɔgɛnu na. Alla nyɛrɛ si taran anu fɛ ka ma anuta Alla la. 4A si ya-yi bɛɛ firan anu yɛ la. Saya ti kɛ tun. Yisi-gbala sa tun. Di-kɛ ti kɛ tun. Hali dumɛ, a ti taran. Ko-kɔrɛnu bara tenbi ka tunu yen!” 5Wo kɔma, min mayiginɛ mansaya-sigi-fan rɔ, wo ko, “Nba, kaka, n bi fan bɛɛ mala a kurɛ la!” A ya a fɔ n ye fanan ko, “Kɛ sɛbɛ bawo kumɛ kɛnu, tonyɛ le. Mɔgɛ si la wonu na le feu!” 6Nba, a ko, “A ara ban! A fɔlɛ anubɛ a laban le nde la. Ado a dabirɛ anubɛ a kundɔn le nde la fanan. Mɔgɔ woo kan lagbalanɛ, n si nimaya-tenke-yi di wo ma min sɔnkɔ sa. 7Mɔgɔ wo mɔgɔ wa nɔlɛ kɛ, a si fan kɛnu sɔrɔn nde bolo. N si ma ata Alla la. Ale si ma nna dan la. 8Kɔnɔ a kilandɔgɔ wo, a lanayabɛlɛ wo, a haramu-ko-kɛla wo, a mɔgɔ-fagala wo, a yɛlan wo, minnu bi duriyɛ kɛla wo, minnu bi bɛsɛnu kɔla wo, anubɛ foninya-fɔlɛ bɛɛ, wonu barɛ le ta-dalɛ wo la. Dalɛ wo ye mintanna tɛ anubɛ munku-gbɛ le la. Sayɛ fila nyɔgɛ le wo la.” 9Pani-kunba wɔrɔnfilɛ minnu nafanɛ fitina labannu na, wonu bi melika wɔrɔnfilɛ minnu bolo nun, wo kelen nara n bara. A ko, “Na, n ni kɔnyɔ-kurɛ yira i la, saga-danla musi kɔni.” 10Allala Ni Sɛnimɛ yigira n kuma. Nba, ale melika tara n na kɔnkɔ-layan-bɛ kun tɛma pon! A ya Alla-halala-So-Sɛnimɛ, Yerusalɛm, yira n na. A ye yigila ka bɔ Arinyɛni tɔ Alla bolo. 11A ye malan-malanna Allala gbiliyɛ bolo. Soe wo ye malan-malanna iko kuru-da-gbɛlɛ min tɔgɛ yasipa. A gbɛnɛ iko daimon. 12A tarɛ yanyanɛ bɛrɛkɛ! Da tan-ni-fila le ye a ma. Melika tan-ni-fila ye kun-tigiyɛ kɛla dɛ wonu na, da kelen, melika kelen. Isirɛla bɔnsɔn tan-ni-filɛ, wonu tɔgɔ kelen-kelen sɛbɛnɛ a kelen-kelan wo bɛɛ ma. 13Da sawa ye a tɔnkɔn kelen-kelennamɛ-bɛɛ rɔ. Da sawɛ ye tele-bɔɛ. Da sawɛ ye tele-yigi. Da sawɛ ye dugu la. Da sawɛ ye kantɔ wara la. 14Soe wo tarɛ kurukɛra kuru tan-ni-filɛ wo le kuma. Saga-danta kilaya tan-ni-filɛ tɔgɛ sɛbɛra kuru kelen-kelan wo bɛɛ ma. 15Melika min kumara n ye, sɛnɛ-fen-suman-kɔlɔma ye wo bolo alako a si soe wo suman nya min, a dɛnu anubɛ a tarɛ. 16Soe wo tɔnkɔn nanɛ bɛɛ rakɛn. A lɔngbɔn anubɛ a kɔnɛ rakɛn. Melika ya soe suman ala fen-suman-kɔlɔma la. A sɔɛ mɛli waga kelen mɛli kɛmɛ loli (1,500). A kɔnɛ anubɛ a lɔngbɔn anubɛ a sɔɛ bɛɛ rakɛn. 17Melika ya tarɛ fanan suman. Ala yanyɛ nunkan-nya kɛmɛ kelen, nunkan bi-nani ani nunkan nani (144) iko mɔgɛ wola fen-suman-fan wola yanyɛ ye nya min. 18Tarɛ wo ladanta kuri la min tɔgɛ yasipa. Soe wo nyɛrɛ ladanta sɛnɛ-hakikɛ la. A gbɛnɛ fanan iko daimon. 19Soe wo kurukɛ-kurinu tabɛnnɛ kuru-da-gbɛlɛ su bɛɛ le la. A kurukɛ kuri fɔlɛ tɔgɛ le yasipa. A fila nyɔgɛ tɔgɛ le safaira. A sawa nyɔgɛ tɔgɛ le agati. A nani nyɔgɛ tɔgɛ le ɛmarɔdi. 20A loli nyɔgɛ tɔgɛ le ɔnikisi. A wɔrɔ nyɔgɛ tɔgɛ le kaniliyan. A wɔrɔnfila nyɔgɛ tɔgɛ le kɔwɔti. A segin nyɔgɛ tɔgɛ le bɛrili. A kɔnɔntɔ nyɔgɛ tɔgɛ le topasi. A tan nyɔgɛ tɔgɛ le kalasidoni. A tan-ni-kelen nyɔgɛ tɔgɛ le tɔrikɔsi. A tan-ni-fila nyɔgɛ tɔgɛ le amɛtisi. 21Kɔnɔ-kolo-da-gbɛlɛ, wonu denu nadannɛ a da tan-ni-filɛ wonu na. Da wo kelen-kelennamɛ-bɛɛ ladannɛ kɔnɔ-kolo-da-gbɛlɛ kelen-kelennamɛ-bɛɛ la. Soe wo kilɛ ladannɛ sɛnɛ-hakikɛ le la. A gbɛnɛ iko daimon. 22N ma Alla Bato Bɔn yen soe wo burɔ bawo Mari Alla Sɛnbɛ Bɛɛ Tigi anubɛ saga-dan le Alla Bato Bonyɛ la. 23Soe wo mako mumɛ sa tele anubɛ karɛ la bawo Allala gbiliyɛ ye malanna a burɔ. Ata lɛnpu le saga-dan la. 24Sibolenu si tagama ata waan rɔ. Duninya-mansɛnu si na a sanba ka bɔ anuta nɔnfulinu tɔ. 25Soe wo dɛnu nakanɛ si taran tele bɛɛ. Anu na ti togon mumɛ bawo suyi ti ke nyɔ mumɛ! 26Sibolenu si na anuna gbiliyɛ anubɛ anuna nɔnfulinu na soe wo burɔ. 27Kɔnɔ fen-kɔsɔni woo ti don soe wo burɔ. Mɔgɛ min si kisimiriya-koe kɛ, wonu ti don soe wo burɔ mumɛ! Hali foninya-fɔlɛnu ti don. Fɔ minnu tɔgɛ sɛbɛnɛ saga-danta nimaya-buku rɔ, wonu denu dɔrɔn si don soe wo burɔ.

will be added

X\