Lankɛnimayɛ 19

1Wo kɔma, n ya kan do lamɔɛn iko sɛrɛ-siyaman-wɛ-kan Arinyɛni tɔ. Anu bi a fɔla ko, “Alla tanto! Mata Allatɛ le kisi-koe anubɛ gbiliyɛ anubɛ sɛnbɛ la! 2A wa kiti tɛgɛ, tonyɛ le. Wo telenta! Ale musu-yɛlɛn-ba-belebele min taranta dugu kole tinyana ala yɛlɛnyɛ fɛ nun, Alla ara wo tɔrɔ. A ara a tɔrɔ bawo a ya Allata wɔli kɛlɛnu faga.” 3Anu ya anu kan nabɔ tun ko, “Alla tanto! Babilɔn-so-wɛ wo mintan-sisi ye yɛlɛla lugbu-lugbu!” 4Kɛmɔgɔ mogan-ni-nani anubɛ dali-fen nanɛ, wonu ya anu sa dugi ma ka Alla bato min mayiginɛ mansaya-sigi-fan rɔ. Anu ko, “Amina! Alla tanto!” 5Wo kɔma, kuman kan bɔra mansaya-sigi-fan wo rɔ. A ko, “Mata Allata wɔli kɛlɛ bɛɛ ni a tanto anubɛ mɔgɛ bɛɛ minnu kilannɛ a la, a dɔgɔma wo, a kinama wo!” 6Wo kɔma, n ya nyama-kan-ba lamɔɛn. A manɛ iko wasa-sɛnbɛlamɛ-bɔrɔndɔ-kan. A manɛ fanan iko san-sɛrɛn-bɛ-kan. Wonu bi a fɔla ko, “Alla tanto! Mata Mari Alla Sɛnbɛ Bɛɛ Tigi, Mansɛ le! 7Ma ni sewa ka nyagalen. Ma ni ata gbiliyɛ tanto bawo saga-danta kɔnyɔ-masɔ-wati ara ke. Ala kɔɛn-kurɛ ara a nyɛrɛ rabɛn ala ko la. 8Mɔgɛnu sɔnta ko kɔɛn-kurɛ ni a nyɛrɛ fɛrɛya bɔ linɛn-kura-hakika-sɛninyanɛ la.” (Linɛn-kura-nyimɛ wo, Allata mɔgɛnuna kɛwɔli-nyimɛ-misalɛ le wo la.) 9Wo kɔma, melika ya a fɔ n ye ko, “Kɛ sɛbɛ. Mɔgɔ-sewanɛ le wonu na minnu kelenɛ saga-danta kɔnyɔ-masɔ-ladiyɛ wo rɔ.” Nba, melika ya a fɔ tun ko, “Allala-tonya-kumɛ le kɛnu na.” 10N ya n sa melika kɔrɔ a bato koe la kɔnɔ a ya a fɔ n ye ko, “I kana wo ma! Wobɛ i na kelen nyɔgɛnu wɔli-kɛ-nyɔgɛ le nde la. Yisa ya tonyɛ min nabɔ gbɛ rɔ, anu bi wo birala. I si Alla le dɔrɔn bato!” A ya wo fɔ bawo Yisa ye tonyɛ min nabɔla gbɛ rɔ, wo le ye nɛbinu sɔla wɔlɔyiyɛ la. 11Wo kɔma, n ya Arinyɛnɛ dɛ lakanɛ yen. So-gbɛmɛ ye nyɔ. Min siginɛ a kuma, wo tɔgɔ le Lanayɛ anubɛ Tonyɛ. A ye kiti tɛgɛla ka kɛlɛ kɛ telenbagayɛ la. 12A yɛ mani de iko ta-mɛlan. Mansaya-fulɛ siyaman bi a kunyɛ la. Mɔgɔ wo mɔgɔ ma tɔgɛ min lɔn bɛ fɔ ale nyɛrɛ, wo le sɛbɛnɛ a ma. 13Duruku-yan min bi a kan na, yele kɛra wo bɛɛ ma. Ale duruku-tigi wo tɔgɛ le, “Allata Kumɛ.” 14Arinyɛnitɔ-kɛlɛ-dannu bilanɛ a fɛ. Anu siginɛ so-gbɛmɛnu kuma. Anu fɛrɛya-bɔnɛ linɛn-kura-gbɛmɛ-sɛninyanɛ la. 15Faan-da-diyamɛ ye bɔla a da rɔ a si sibolenu nɔ min na. A si mansayɛ kɛ anu kun na ka anu mara nɛgɛ-gbelekɛ la. A si nɔnbɔ-gbɔɛ radɔn a kian la ka a yi labɔ iko baan. Ado Alla Sɛnbɛ Bɛɛ Tigita diminya-belebele-wɛ si anu sugun kan min a radɔn tinɛ wo la. 16Tɔgɛ kɛ sɛbɛnɛ ala duruku-yan anubɛ a wore ma ko, “Mansɛnuna Mansɛ anubɛ marinuna Mari.” 17Wo kɔma, n ya melika sɔnɛ yen tele burɔ. Kona min bɛɛ ye firifirila san ma, a kumara wonu ye a kan ba la. A ko, “Wo na wo ladɛn Allata ladiya-belebelela ko la! 18Wo na mɔgɛ bɛɛ fɛrɛ-bɔnkɛ dɔn tinɛ, a mansa wo, a kun tigi wo, a kɛlɛ den wo, a hɔrɔ wo, a yɔɔn wo. Wo na anu bɛɛ dɔn, a dɔgɔma wo, a kinama wo, hali soeenu anubɛ anuna burilɛnu.” 19Wo kɔma, n ya sogo-feremɛ wo yen anubɛ duninya-mansɛnu anubɛ anuna kɛlɛ dannu. Ale min siginɛ so-gbɛmɛ wo kuma anubɛ ata kɛlɛ dannu, anu nadɛnnɛ wonu kɛlɛ koe la. 20Anu ya sogo-feremɛ wo bira anubɛ foninya-nɛbi min ya kabana-ko-siyaman kɛ sogo-feremɛ wo yala. (Sogo-feremɛ wola mandan ye mɔgɛ minnu ma anubɛ minnu ya sogo-feremɛ wola muninyɛ bato, a ya wonu yanfa ala kabana koe wonu fɛ.) Sogo-feremɛ wonubɛ foninya-nɛbi, wonu filɛ bɛɛ kɛndɛ lafilita ta-dalɛ rɔ min bi mintanna tɛ anubɛ munku-gbɛ la. 21Faan min bi bɔla so-laburilɛ wo dɛ rɔ, wo ya anuna kɛlɛ dannu faga. Kona bɛɛ ya wonu fɛrɛ-bɔnkɛ dɔn ha anu fara pen!

will be added

X\