Lankɛnimayɛ 18

1Wo kɔma, n ya melika-yigimatoe yen bɔla Arinyɛni tɔ, sarati ye min bolo dɔgɔ ma ma de! Waan rakara dugu kole kuma ata gbiliyɛ bolo. 2A gbele-gbelenta kan-ba la ko, “A ara bui! Babilɔn-so-belebele ara bui fogbo! A ara ma nyinɛnu anubɛ nyina-kɔsɔnɛnu barɛ la gbɛ! Koni-yogoma-su bɛɛ anubɛ koni-haramunɛnu denu gbansan ladɛnnɛ a rɔ kaka. 3Wo mara bawo a ya ala yɛlɛnyɛ-nata-baan-kunayanɛ di mɔgɛ bɛɛ ma alako anu ni a min. Mansɛnu bara yɛlɛnyɛ kɛ a fɛ. Yilanu mara nɔnfulu-tiginu na ala nata-dan-natenbinɛ fɛ.” 4Wo kɔma, n ya kuman-kan-gbɛrɛ lamɔɛn bɔla Arinyɛni tɔ. A ye a fɔla ko, “Nna mɔgɛnu, wo bɔ! Wo bɔ a fɛ feu! Wo kana kofu a ma ata hakɛ rɔ, alako wo kana tɔrɔyɛ sɔrɔn a fɛ! 5A hakɛnu na ara dɛn anu nyɔgɔn kuma ka yɛlɛ ha ka ke san kole ma. Nba, Alla ara a fonde to ala ko-yogomɛ ko. 6Wo ni a bira iko a ya wo bira nya min. Wo ni wo tayili sara kinyama fila ala wɔli-yogomɛ wola ko la. A ya minni-fen-kunayanɛ min tabɛn wo ye, wo ni ala yi-lafɛ lafa wo nyɔgɔn fila la a ye. 7A ara gbiliyɛ anubɛ nɔnfuli min nyɔgɛ di a nyɛrɛ ma nun, wo ni wo nyɔgɔn nyagbɛ anubɛ yisi-gbalɛ di ale ma kaka bawo a tora a fɔla a nyɛrɛ ma ko, ‘Wo ma a yen, n siginɛ musu-mansayɛ le la gbɛ! Kɛɛ-musu ma n na. N yisi ti gbala mumɛ!’ 8Ka a tɛgɛ wo ma, fitinɛ kɛ bɛɛ si na kɛ a ma tele kelen kɔrɔ, kirayɛ anubɛ yisi-gbalɛ anubɛ kɔnkɛ kɔni. Tɛ si a mintan gburr bawo Mari Alla, Sɛnbɛ Bɛɛ Tigi le a kiti tɛgɛla.” 9Mansɛ minnu ya yɛlɛnyɛ anubɛ fɛrɛ-bɔnku-nata kɛ a fɛ, wonu ba soe wo mintan-sisi yen tumɛ min, anu si gbele-gbelen ka di ala ko la biribiri! 10Anu si anu sɔ wulɛ la pon alako anu kana do sɔrɔn ala nyagbɛ wo rɔ. Anu si a fɔ ko, “E, gbalo! Gbalo! Ile Babilɔn-so-belebele, so-sɛnbɛlamɛ, ila tɔrɔyɛ ara na kɛ i ma hawa kelen pe kɔrɔ!” 11Yilanu fanan si gbele-gbelen ka di ala ko la bawo mɔgɔ wo mɔgɔ sa anuna fere-fannu sanna tun. 12Anuna sɛnɛ wo, anuna wodi-gbɛ wo, anuna kuru-da-gbɛlɛmɛnu wo, anubɛ anuna kɔnɔ-kolo-da-gbɛlɛmɛnu, wonu sanna sa nyɔ tun. Anuna linɛn-kura-nyimɛnu anubɛ kura-bilolamɛnu, anuna kura-manunkunɛ, anubɛ kura-wulannu, wo fanan sanna sa nyɔ tun. Anuna kɔlɔma-hakikɛnu wo, anuna sogo-ba-nyin nadannɛ fan minnu na wo, kɔlɔma-da-gbɛlɛmɛnu wo, anubɛ silɛɛ wo, nɛgɛ wo, anubɛ bɛrɛ-kurinu wo, wo fanan sanna sa nyɔ tun. 13Anuna fan min tɔgɛ sinamɔn wo, kɛnɛ wo, isɛnti wo, mira wo, anubɛ farankinsɛnsɛ, yila woo sa nyɔ min si wonu fanan san. Baan wo, tulu wo, dɛgɛ-munku wo, fui-fen wo, wonu sanna woo sa nyɔ. Ninki wo, sagɛ wo, soee wo, kirindi wo, yɔɔn wo, hali mɔgɔni-gbui, wonu fanan sanna woo sa nyɔ. 14Yilanu ya a fɔ a ye ko, “Fere-fan min sɔgɛ ye i la ko anu ni ma itɛ la, wo bɛɛ ara tunu yen! Ila nɔnfuli anubɛ ila kinyɛ bɛɛ ara ban. I ti anu yen tun!” 15Yila minnu ya yilayɛ kɛ soe wo burɔ ka ma nɔnfulu-tiginu na, wonu si anu sɔ wulɛ la pon, alako anu kana do sɔrɔn ala nyagbɛ wo rɔ. Anu bi gbele-gbelenna di kɛ tinɛ. 16Anu si a fɔ ko, “E, gbalo! Gbalo ye so-wɛ wo kuma! A duruta a nyɛrɛ fɛrɛya bɔla linɛn-kura-hakikɛ la anubɛ kura-bilolamɛ anubɛ kura-wulan la ka a nyɛrɛ makiri sɛnɛ anubɛ kuru-da-gbɛlɛmɛ anubɛ kɔnɔ-kolo-da-gbɛlɛmɛnu na! 17A ara bɔnɔ ala nɔnfuli wo bɛɛ rɔ hawa kelen pe kɔrɔ!” Kulun-kun-tigi bɛɛ anubɛ kulun-tasigilɛ bɛɛ anubɛ kulun-tawɔli-kɛlɛnu anubɛ min bɛɛ ye anu beli-fan sɔrɔnna kɔgɔ-yi rɔ, wo bɛɛ ya a masɛgi ale soe wo la pon! 18Anu ya soe wo mintan-sisi yen yɛlɛla tumɛ min, anu gbele-gbelenta ko, “So-karantan wo nyɔgɔn sa nun mumɛ!” 19Anu ya gbangban kɛ anu kunyɛ rɔ yisi-tinya bolo. Anu gbele-gbelenta di kɛ tinɛ ko, “E, gbalo! Gbalo ye so-karantan wo kuma! Soe le nun. Kulun-tigi min bɛɛ ye kɔgɔ-yi kuma, anu bara ma nɔnfulu-tiginu na ala nɔnfuli rɔ! Kɔnɔ a ara bɔnɔ fan wo bɛɛ rɔ hawa kelen pe kɔrɔ!” 20Kɔnɔ ile Arinyɛnɛ, i ni nyagalen soe wo tinya koela ko la! Wole Allala mɔgɛnu anubɛ ata kilayɛnu anubɛ ata nɛbinu, wo ni fa sewɛ la ka a tɛgɛ min bara ma soe kɛ la. A ara wo tɔrɔ nya min, Alla ara a kiti tɛgɛ wola ko la! 21Wo kɔma, melika-sɛnbɛ-tigi ya kuru-belebele-wɛ bi ka a lakɛ kɔgɔ-yi rɔ fɔrɔsɛ la. A ko, “Babilɔn-so-belebele-wɛ la si bui sɛnbɛ la ka le. Wo kɔma, a ti yen tun. 22Sɔrɔn-fɔ-kan anubɛ hadama-den-kan anubɛ fulu-fɛ-kan anubɛ buru-fɛ-kan na ti mɔɛn a rɔ tun! Boloma-wɔli-kɛla woo ti taran ale soe wo burɔ tun. Hali kolon-tugu-kan, ala ti mɔɛn a rɔ tun! 23Hali lɛnpu-waan woo ti yen a rɔ tun. Kɔɛn-kura-tolon ti kɛ ale soe wo burɔ tun. Sɛnbɛ ye ala yilanu bolo duninya kan tinɛ bɛɛ rɔ nun. Ado a ya duninya-mɔgɛ bɛɛ yanfa ala foninya-duriyɛ la!” 24Babilɔn tɔrɔta bawo nɛbinu yele anubɛ Allata mɔgɛnu yele taranta soe wo burɔ. Ɔnde, min bɛɛ fagara dugu kole kuma, wonu yele taranta soe wo burɔ.

will be added

X\