Lankɛnimayɛ 17

1Wo kɔma, pani-kunba wɔrɔnfilɛ ye melika minnu bolo, wo kelen ya a fɔ n ye ko, “Na ma ni ta. Babilɔn-so-wɛ min manɛ iko yɛlan, wo tɔrɔta nya min, n ni wo yira i la. Babilɔn wo sɔnɛ ba siyaman dafɛ. 2Mansɛnu bara yɛlɛnyɛ kɛ musu-yɛlan wo fɛ. Ado mɔgɛ bɛɛ ara ma gbɛɛtoe la ala yɛlɛnyɛ bolo.” 3Melika tara n na wulɛ rɔ Allata Ni Sɛnimɛ baraka rɔ. N ya musi do yen nyɔ, a siginɛ sogo-ferema-wulan la. Sogo-feremɛ wo, a kunyɛ wɔrɔnfila, a kere tan. Alla-rapɔsi-kumɛnu sɛbɛnɛ a kan tinɛ bɛɛ ma. 4Musi wo fɛrɛya bɔnɛ kura-bilolamɛ anubɛ a wulenmɛ la. A makirinɛ sɛnɛ anubɛ kuru-da-gbɛlɛ anubɛ kɔnɔ-kolo-da-gbɛlɛ-gbɛmɛ la. Sɛnɛ-yi-lafɛ ye a bolo tɔ. Wo lafanɛ ko-latinyanɛnu anubɛ ala yɛlɛnya-ko-haramunɛnu na. 5Tɔgɛ do sɛbɛnɛ ale musi wo telɛ ma min nya-yen koe gbɛlɛ. A sɛbɛnɛ a ma ko, “Yɛlan bɛɛ anubɛ dugu-kolo-haramu-koe na le Babilɔn so-wɛ la.” 6N ya a yen ko musu-yɛlan wo mara gbɛɛtoe la Allala mɔgɛnu yele-minyɛ bolo. Allata mɔgɛ wonu fagara anuta lanayɛla ko la Yisa ye. N ya musi wo yen tumɛ min, n kawara kati! 7Melika wo ya n manyinika ko, “I ye kawala nfenna? Min nya-yen koe gbɛlɛ musi kɛ wara-koe rɔ, n si wo fɔ i ye anubɛ sogo-feremɛ min tara a la, a kunyɛ wɔrɔnfila, a kere tan. 8I ya sogo-feremɛ min yen, wo kɛndɛ le nun kɔnɔ a ara faga, bi ko ma! Alla si a furi layɛlɛ ka bɔ denka-dan-yenbɛlɛ rɔ. A si a halaki. Kɔnɔ minnu tɔgɔ sɛbɛni ma nimaya-kitabu rɔ, yanni duninya da ni bira, wonu ba sogo-feremɛ wo yen tumɛ min, anu si kawa. Sogo-feremɛ wo kɛndɛ nun kɔnɔ a ara faga. Kɔnɔ sogo-feremɛ wo si bɔ gbɛ rɔ tun! 9“Hɛnkili ye minnu bolo, anu si kɛ nya-yen. Kun wɔrɔnfilɛ wo, kɔnkɔ wɔrɔnfilɛ le wonu na musi wo siginɛ minnu kuma. Mansa wɔrɔnfila le wonu na fanan. 10Ado i ya mansa lolɛ minnu yen nun, wonu bara bui kɔnɔ kelan wo ye mansayɛ la fɔlɔn. Kelan wo min ma na wɛ, wo wa na tumɛ min, a si to mansayɛ la wati-kunduni kɔrɔ. 11Sogo-feremɛ wo min kɛndɛ fɔlɔ nun kɔnɔ a faganɛ kaka, mansa segin nyɔgɛ le wo la. Mansa wɔrɔnfilɛ wonu segin nyɔgɛ le kɛ la. Ado a bɔra wonu denu tɔ. Ale fanan bi a halaki-kilɛ le ma wo la. 12“I ya kere tan min yen wo la, mansa tan de wo la minnu ma wuli wɛ mansayɛ kɛla kɔnɔ anu bi sarati sɔrɔnna hawa kelen pe le kɔrɔ anuna mansaya-koe rɔ sogo-feremɛ wo fɛ. 13Mansa tan wonu miriya kelen. Anu si anuna sɛnbɛ anubɛ anuna sarati di sogo-feremɛ wo ma. 14Wonu si saga-dan kɛlɛ. Kɔnɔ saga-dan anubɛ ata mɔgɛnu si anu nɔ. A ya mɔgɛ wonu kele ka anu yabɔ anuta lanayɛla ko la. Saga-dan si anu nɔ bawo marinuta Mari le ale la anubɛ mansɛnuta Mansɛ.” 15Melika ya kɛ fɔ n ye fanan. A ko, “I ya musu-yɛlan wo siginɛ yen bɛ minnu dafɛ, mɔgɔ su bɛɛ le bɛ wonu na anubɛ sibolenu anubɛ nyama iko anuna kan faranɛ nya min. 16I ya sogo-feremɛ min kere tan yen wo la, musu-yɛlan wo si gboya kere tan wonubɛ sogo-feremɛ wo ye. Anu si a bolo-fan bɛɛ bi a bolo ka a gbu-makolɔn to. Anu si a fɛrɛ-bɔnkɛ dɔn ka a toe lakɛ tɛ rɔ. 17Anu ya anuna sarati di sogo-feremɛ wo ma alako a ni mansayɛ kɛ ha Allata kumɛ wo ni bɔ a la tumɛ min. Ado Alla le ya miriya kelan wo di anu ma ko anu ni a sako kɛ. 18“I ya musi min yen wo la, so-belebele le wo la min bi duninya-mansɛnu kun na.”

will be added

X\