Lankɛnimayɛ 16

1Wo kɔma, n ya kuman-kan-ba lamɔɛn bɔla Alla Bato Bɔn la. A ye a fɔla melika wɔrɔnfilɛ wonu ye ko, “Pani-kunba wɔrɔnfilɛ minnu nafanɛ Allata diminyɛ la, wo ta wonu tawiya dugu kole kuma pu!” 2Melika fɔlɛ tara ata pani-kunbɛ rawuya dugu kole kuma. Sogo-feremɛla mandan ye minnu ma anubɛ minnu ya ala muninyɛ bato, tɛlɛ-yogomɛnu bɔra wonu ma minnu dumara kati! 3Wo kɔma, melika fila nyɔgɛ ya ata pani-kunbɛ rawuya kɔgɔ-yi rɔ. Yi wo mara iko mɔgɔ-faganɛ-yele. Dali-fan bɛɛ fagara kɔgɔ-yi rɔ. 4Wo kɔma, melika sawa nyɔgɛ ya ata pani-kunbɛ rawuya bɛnu anubɛ tenkenu tɔ. Wo dama yɛlɛmanta yele la. 5Melika min bi kun-tigiyɛ kɛla yinu kun na, n ya wo kan lamɔɛn. A ko, “E, ile min bi kaka, ile min bi nyɔ kebi fɔlɔ, i sɛnima. I wara kiti minnu tɛgɛ, anu telenta! 6Anu bara ila mɔgɛnu anubɛ nɛbinu yele labɔ. Woletɔ i wara yele di anu ma ka a min. A bɛnta anu ni min sɔrɔn, anu bara ban wo sɔrɔnna feu!” 7Wo kɔma, n ya kuman kan lamɔɛn bɔla saraka bɔ tinɛ wara la. A ko, “Mari Alla, Sɛnbɛ Bɛɛ Tigi, i ye kiti tɛgɛla telenbagayɛ anubɛ tonyɛ le la, yɔ!” 8Wo kɔma, melika nani nyɔgɛ ya ata pani-kunbɛ rawuya tele kuma. Alla sɔnta ko a ni mɔgɛnu mintan a wuyan-kalamɛ la. 9Tele-wuyan wo ya mɔgɛnu mintan. Sarati ye Alla min bolo fitinɛ kɛnu kuma, mɔgɛ kɛnu ya ale Alla tɔgɛ rasɛ. Kɔnɔ anu ma anu kɛ-nyanu yɛlɛma ka Alla tanto ala gbiliyɛla ko la. 10Wo kɔma, melika loli nyɔgɛ ya ata pani-kunbɛ rawuya sogo-feremɛ wota mansaya-sigi-fan kuma. Pinpi burunta sogo-feremɛ wota nyamanɛ bɛɛ kuma bɛff! Mɔgɛnu ya anu nagannu kin dumɛ wo bolo. 11Anu ya Alla danka Arinyɛni tɔ anuna dumɛ anubɛ anuna tɛlɛ wonuna ko la. Kɔnɔ hali wo, anu ma fara anu kɛ-nya-yogomɛnu na. 12Wo kɔma, melika wɔrɔ nyɔgɛ ya ata pani-kunbɛ rawuya Yufɛrɛti-ba-wɛ rɔ. Bɛ wo gbalata ka kilɛ laka mansɛnu ye minnu bi nala ka bɔ tele bɔɛ. 13Wo kɔma, n ya nyina-kɔsɔni sawa yen. Anu manɛ iko turugbɔfɔrɛnu. Anu bi bɔla ninkinankɛ wo, sogo-feremɛ wo, anubɛ foninya-nɛbi wonu dɛnu tɔ. 14Nyina-yoge le wonu na minnu duruta kabana koenu kɛla. Nyina sawɛ wonu bi tala mansɛnu bara dugu kole kan tinɛ bɛɛ rɔ ka mansɛ wonu madɛn kɛlɛ-kɛ-koe la Alla Sɛnbɛ Bɛɛ Tigi ka ma wo tele rɔ. ( 15Mari ko, “Wa wo tole masɔ! N bi nala wo latɛrɛnala iko kankan! Mɔgɔ-sewanɛ le wo tigi la min bi kila a ya la ka ala kurɛ makandan alako a lakolɔn kana na to tagamana miliyɛ bolo!”) 16Nba, nyina-yogomɛ wonu ya mansɛ wonu madɛn kan tinɛ wo rɔ min tɔgɛ Hiburu kan rɔ, “Aramagɛdon.” 17Wo kɔma, melika wɔrɔnfila nyɔgɛ ya ata pani-kunbɛ rawuya fɔnyɔ rɔ. Kuman-kan-ba bɔra mansaya-sigi-fan rɔ Alla Bato Bɔn la. A ye a fɔla ko, “A ara ban!” 18Bandɛ ya a nyin masɔgɔ. A tugura. San serenta. Dugu-yɛrɛyɛrɛn-ba kɛra min yogo dugu-yɛrɛyɛran bɛɛ ko! Kebi mɔgɔ danta, wo nyɔgɔn dugu-yɛrɛyɛrɛn ma kɛ bɛ mumɛ! 19Babilɔn-so-wɛ farata sigi tina sawa la. Nyamanɛ bɛɛta so-wɛnu fanan halakira. Alla ya a fonde to Babilɔn-so-belebele ko. Allata diminya-belebele ye yi-lafɛ min tɔ iko gbɛɛ, a ya a ma, Babilɔn ya a min wo la. 20Dugu-yɛrɛyɛran ya a ma, yi-tɛma-dugi bɛɛ tununta yen! Kɔnkɛ bɛɛ tununta fanan yen! 21Banda-kolo-wa-belebelenu bɔra san kole rɔ ka bui mɔgɛnu ma. Wo kelen-kelennamɛ-bɛɛla gbiliyɛ si ma iko yi kalɔn segan. Mɔgɛ wonu ya Alla danka banda-kolo-fitinɛ wola ko la. Wo gbɛlɛyara anu kuma kati!

will be added

X\