Lankɛnimayɛ 15

1Wo kɔma, n ya kabana-ko-makawanɛ-gbɛrɛ yen Arinyɛni tɔ. Melika wɔrɔnfila ye nyɔ anubɛ anuna fitina wɔrɔnfilɛ. Fitina laban le wonu na bawo Allala diminyɛ da si fa wonu denu na. 2Wo kɔma, n ya fan do bɛyabɛyɛ yen min manɛ iko kɔgɔ-yi. A manunkunɛ iko nyɛrɛ-mafɛlan. A yabasannɛ tɛ la. N ya mɔgɛ donu yen fanan minnu bara nɔlɛ sɔrɔn sogo-feremɛ anubɛ ala muninyɛ ma. Min tɔgɛ yatɛ bɛnnɛ sogo-feremɛ wo mandan ma, anu bara nɔ-ko sɔrɔn wo fanan ma. Anu sɔnɛ fan wo dafɛ min manɛ iko kɔgɔ-yi. Alla ya sɔrɔn minnu di anu ma, wonu bi anu bolo tɔ. 3Anu bi Allala wɔli kɛlɛ, Nɛbi Musa, anubɛ saga-danta bɛti bɔla ko, “Mari Alla Sɛnbɛ Bɛɛ Tigi, ila kɛwɔlɛnu kolo. Anu makilanta! Sibole bɛɛta Mansɛ, i kɛ-nyanu telennɛ. Tonya-kilɛ le anu na. 4Mari, yon ti kilan i la? Yon si a ban ila gbiliya-fɔ-koe ma? Ado i kelen pe le sɛnima. Sibole bɛɛ si na ka batolɛ kɛ i yakɔrɔ bawo mɔgɛ bɛɛ ara ila telenbagaya-kɛwɔlɛnu tayen.” 5Wo kɔma, n ya Alla Bato Bɔn dɛ lakanɛ yen Arinyɛni tɔ. Allata Fani-Bɔn ye nyɔ rɔ. 6Fitina-laban wɔrɔnfilɛ ye melika wɔrɔnfilɛ minnu bolo, wonu bɔra Alla Bato Bɔn wo la. Anu fɛrɛya bɔnɛ linɛn-kura-gbɛmɛ-sɛninyanɛ la. Butɛ-kiri-fan min nadannɛ sɛnɛ la, wo kirinɛ anu kɔgɔ-dɛ ma. 7Dali-fen nanɛ wo kelen ya sɛnɛ-pani-kunba wɔrɔnfilɛ di melika wɔrɔnfilɛ wonu ma. Pani-kunbɛ wonu nafanɛ habadan-Allata diminyɛ la. 8Allata gbiliyɛ anubɛ ata sɛnbɛ ya a Bato Bɔn lafa ta-sisi la. Mɔgɔ wo mɔgɔ ti ke donna a Bato Bɔn wo la ha melika wɔrɔnfilɛta fitina wɔrɔnfilɛ da ni fa.

will be added

X\