Lankɛnimayɛ 10

1Wo kɔma, n ya melika-sɛnbɛ-tigi-gbɛrɛ namatoe yen bɔla Arinyɛni tɔ. A fɛrɛya bɔnɛ banda-finyɛ la. San-duri ye a kunyɛla minɛ rɔ. A yakɔrɛ ye malan-malanna iko tele. A kiannu dɔnkɔnyɔ iko tɛ tenbi kala-mɛlan la san ma. 2Gbolo-lamininɛ-dɔgɔmɛ lafulennɛ a bolo. A ya a bolo-nyimama-kian sɔ kɔgɔ-yi rɔ ka a maranma-kian sɔ gbele ma. 3A gbele-gbelenta a kan-bɛ la. A kuman kan manɛ iko yarɛ-borondo-kan. A ban gbele-gbelenna tumɛ min, san-sɛrɛn wɔrɔnfilɛ ya a yabi wɔrɔnde la. 4Anu banta kumala nya min wo, n bi a fɛ nun ka sɛbɛli kɛ. Kɔnɔ n ya kuman kan lamɔɛn bɔla Arinyɛni tɔ. A ko, “San-sɛrɛn wɔrɔnfilɛ ya min fɔ, i kana wo sɛbɛ bɛ min na. Gbundu koe le wo la. A mara fɔlɔn!” 5Wo kɔma, n ya melika min kin kelan yen kɔgɔ-yi rɔ, a kin kelan ye gbele ma, wo ya a bolo nyimɛ layɛlɛ san ma. 6A ya a gboro Alla rɔ min nimayanɛ habadan! San-kole anubɛ fan minnu bi a rɔ wo, dugu kole anubɛ a kuma-fannu wo, kɔgɔ-yi anubɛ fan minnu bi a rɔ wo, ale le ya wo bɛɛ dan. Melika ko, “Matanbani mumɛ ti kɛ tun! 7Melika wɔrɔnfila nyɔgɛ wa ata buri fɛ tumɛ min, Alla si ala gbundu-ko-latɛgɛnɛ kɛ iko a ya a fɔ ala wɔli kɛlɛnu ye nya min, ala nɛbinu kɔni.” 8Nba, n ya kuman kan min namɔɛn ka bɔ Arinyɛni tɔ, wo kumara n ye tun ko, “Gbolo-lamininɛ min tafulennɛ, i ni ta wo bi melika wo bolo min kian ye gbele anubɛ kɔgɔ-yi rɔ.” 9N tara a fɔ melika wo ye ko a ni gbolo-lamininɛ wo don n bolo. A ya a fɔ n ye ko, “A bi. I ni a dɔn. I wa a dɔn, a si diya i da rɔ iko liyi kɔnɔ a si kunaya i burɔ.” 10N ya gbolo-lamininɛ bi melika wo bolo ka a dɔn. A diyara n da rɔ iko liyi kɔnɔ n banta a lakununa tumɛ min, a kunayara n burɔ. 11Wo kɔma, kuman ka ya a fɔ n ye ko, “I ni wɔlɔyiyɛ kɛ mɔgɔ siyamanna ko la tun anubɛ sibolo siyamɛ anubɛ a mansa siyamɛ iko anuna kan faranɛ nya min.”

will be added

X\