1 Nde, Pɔli min bi yele la Yisa Kirasitila ko la anubɛ ma na kelen nyɔgɛ Timoti, male le ye kɛdi kɛ sɛbɛla i ma. Ma ye a latala ile Failiman ma, ma diyana-mɔgɛ anubɛ ma wɔli-kɛ-nyɔgɛ kɔni, 2 anubɛ chɔchi mɔgɛ minnu nadɛnnɛ ila bɔn la. Ma ye a latala ma na kelen nyɔgɛ musumɛ Afiya ma, mabɛ min bi dɛnkɛninyɛ rɔ. Ma ye a latala ma wɔli-kɛ-nyɔgɛ Akipasi fanan ma. 3 Alamɛ ma Fa Alla anubɛ Mari Yisa, Allata-Mɔgɔ-Yabɔnɛla hinɛ ni to ma fɛ ka yisi-kimɛ di i ma. 4 N na kelen nyɔgɛ Failiman, n ba Alla madiya tuma-wo-tuma, n bi madiyali kɛla i ye. N si baraka bira nta Alla ye 5 ka a tɛgɛ ila diyanayɛ Allala mɔgɛ bɛɛ ma. N bara ila dɛnkɛninya-koe fanan lamɔɛn min bi Mari Yisa rɔ. 6 N bi Alla madiyala ko ma ye ta-nyɔgɔnyɛ min kɛla i fɛ dɛnkɛninyɛ rɔ, wo ni a ma, i ni Allata duwɛ bɛɛ nya-yen. Ado Alla ya min bɛɛ ma ma ye, wo ye ma bolo Kirasiti baraka rɔ. 7 N diyana na kelen nyɔgɛ, ila keninteyɛ ara ma lasewa bɛrɛkɛ! A ara yisi-latɛgɛ-ba di n ma. I wara Allala mɔgɛ bɛɛ yisi lakuraya. 8 I na kelen nyɔgɛ le nde la Kirasiti rɔ min kɛ, sɛnbɛ ye n bolo ka a fɔ i ye i si min ma. 9 Kɔnɔ hali wo, keninteyɛ ye a mala, n bi i madiyala. Hali n bi yele la Yisa Kirasitila ko la, nde, Pɔli kɛmɔgɛ, n bi i madiyala. 10 Nba, n bi i madiyala ila yɔɔn, Onɛsimala ko la. Nna dan le ale la Kirasiti rɔ. N mara a fa la Allata Ni Sɛnimɛ rɔ, wo tumɛ ma filɛ ye biralɛ rɔ. 11 A ma ko-wo-ko nyinya i ma fɔlɔ nun kɔnɔ kaka, a ye ko nyinyala ma dama ma, ile wo, nde wo. 12 N bi a lasɛgila i ma kaka, ado ale di n ye kati! 13 N bi a fɛ nun ko n tenbi yele la kibara-nyimɛla ko la, n ni a mara n fɛ yan. Woletɔ a si n dɛnbɛ ile gbɛ rɔ. 14 N sa a fɛ ka i fɔrɔsɛ ko fɔ i ni n dɛnbɛ. N bi a fɛ ko i ni a kɛ i nyɛrɛ sako la. Woletɔ n ti ko-wo-ko kɛ fɔ i wa sɔn. 15 Onɛsima kɛ ya a buri i kɔrɔ wati-kundunɛ kɔrɔ. Tumado, wo mara alako a ni ma itɛ la tun tɛban! 16 Ado yɔɔn dɔrɔn ma a la tun kaka. A ara tenbi yɔɔn la gbɛ! I na kelen nyɔgɛ le Kirasiti rɔ. Ale di nde ye kati! Ado a si diya ile ye ko-nya filɛ bɛɛ ma bawo ila yɔɔn le anubɛ i na kelen nyɔgɛ Mari rɔ! 17 Woletɔ ni i wara n lɔn i ta-nyɔgɛ la, i ni ale rabira tun iko i si nde rabira nya min. 18 Ni a ya ko-yogo woo kɛ i la, ni ila fenfen bi a bolo, i ni i yɛ sɔ nde la. 19 N bi a sɛbɛla n nyɛrɛ bole la ko nde, Pɔli si ala yili sara tun. Nba, nna yili min bi ile la ni-kurɛla ko la, n ti i hɛnkili bila wo la. 20 Woletɔ n na kelen nyɔgɛ, i yandi, i ni ko kɛndɛ kelan kɛ kɛ n ye Marila ko la. I ni nde lasewa, i na kelen nyɔgɛ Kirasiti rɔ! 21 N lanɛ a la ko n bara i madiya min na, i si wo kɛ n ye. Woletɔ n bi kɛdi kɛ sɛbɛla i ma. N ya a lɔn ko i si a kɛ hali min tenbira n kuman kan kɛ la. 22 Min sanɛ wo kuma, i ni n yiya-bɔn rabɛn n ye bawo n lanɛ a la ko Alla si wo damata madiyalɛ yabi. A si n nasɛgi wo ma tun. 23 Ɛpafarasi min bi yele la n fɛ Kirasiti Yisala ko la, wo ye wo kɔndɔnna. 24 N wɔli-kɛ-nyɔgɛnu fanan bi wo kɔndɔnna, wo le Maraka anubɛ Aritaka anubɛ Dimasi anubɛ Luka kɔni. 25 Alamɛ Mari Yisa, Allata-Mɔgɔ-Yabɔnɛla hinɛ tora wo dama fɛ.
