Filipai 1

1Nde, Pɔli anubɛ Timoti ye kɛdi kɛ sɛbɛla. Yisa Kirasitila wɔli kɛlɛ le male la. Kɛ sɛbɛnɛ wole, Allata mɔgɛnu ma minnu bi Filipai soe burɔ ka a lake wobɛ chɔchi-mɔgɔ-banu ma anubɛ minnu bi dɛnbɛnɛ kɛla nyɔ. Wo bɛɛ ye Kirasiti Yisa rɔ dɛnkɛninyɛ kilɛ fɛ. 2Alamɛ ma Fa Alla anubɛ Mari Yisa, Allata-Mɔgɔ-Yabɔnɛ ya hinɛ yira wo la ka yisi-kimɛ di wo ma. 3N ba n miri wo ma wati min bɛɛ rɔ, n si to baraka birala Alla ye wo damala ko la. 4Ado n ba Alla matara wo ye wati min, n bi a matarala sewɛ la 5bawo wo ara n dɛnbɛ kibara-nyimɛ lakela kebi fɔlɔ ha kaka. 6Nba, n lanɛ a la serr, ko Alla min ya wɔlɔ-nyimɛ kɛ dabira wole rɔ, wo si to wɔlɛ wo kun na, ha a ni bɛn Kirasiti Yisata tele ma. 7Wo ye n yisi le tɔ wati bɛɛ! Woletɔ a bɛnnɛ ka n miri wo ma wo nya le. Alla ara hɛrɛ min di n ma kɛ, wo ara wotɛ sɔrɔn n fɛ wo bɛɛ rɔ. N bi yele la wo, n hɔrɔyanɛ tumɛ min wo, ma nɔrɔta kibara-nyima-fɔɛ ma ka a lasabati bɛrɛkɛ ma fɛ. 8N bi n miri-wɛ min kɛla wo ma, wo ye bɔla Kirasiti Yisa nyɛrɛ le yisi rɔ. N ba wo fɔ, Alla ye n sere la ko n bi tonyɛ le fɔla wo la. 9Nta madiyalɛ le kɛ la ko wola keninteyɛ ni to koloyala dɛɛ! Wo ni lɔnnɛ anubɛ hɛnkili-kanbalinɛ sɔrɔn wo bɛɛ rɔ. 10Wo wa wonu sɔrɔn tumɛ min, wo si ke ka ko kɛndɛ yabɔ. Kirasiti wa na kiti tɛgɛ tinɛ lunyɛ min alamɛ wo tankara ko-nɔgɔnɛ bɛɛ ma woletɔ mɔgɔ ti fɛɛ yen wo la. 11Yisa Kirasiti kelen pe si ke wo lafala ko-nyimɛ minnu na, alamɛ wo yisi fara wonu na. Alamɛ Alla ya gbiliyɛ anubɛ tantolɛ sɔrɔn wo bɛɛ rɔ. 12N na kelen nyɔgɛnu, n bi a fɛ, wo ni a lɔn ko koe minnu kɛra n na yan, wonu bara kibara-nyimɛ dɛnbɛ ka a lata yarɔ. 13Mansa-kandannɛnu anubɛ yan-mɔgɛ bɛɛ ara a lɔn ko n bi birɛ rɔ ka a tɛgɛ Kirasiti wara-koe ma. 14N bi yele la min kɛ, wo ara yisi-latɛgɛ di yan-dɛnkɛninya-mɔgɛ siyaman ma. Woletɔ anu yisi ragbɛlɛyanɛ wati bɛɛ Allala kumɛ kawandi bɔɛ ma. Anu kilanni ma tun. 15Nba, minnu bi Kirasitila koe kawandili bɔla, anu donu bi wo bɔla keliyɛ anubɛ sɔsɔlɛ la anu bolo. Donu bi ala koe kawandili bɔla anu kɔntɔ-nyimɛ la. 16Kɛnu bi a kɛla wo nya keninteyɛla ko la bawo anu ya a lɔn ko Alla ara kibara-nyimɛ fɛka-wɔlɛ di n ma. 17Kɔnɔ doi wonu sa Kirasitila koe lakela anu yisi gbɛnɛ la. Anu bi a kela anu nyɛrɛla nata lela ko la. Anu bi anu mirila ko n tenbi yele la, anu si ke nna tɔrɔyɛ makofula. 18Tana ma wo la! N sewanɛ wo bɛɛ rɔ. Alako tun, Kirasitila koe kawandilɛ ni bɔ nya bɛɛ ma. A bɔra kɛ-nya-yogomɛ rɔ wo, a bɔra a nyimɛ rɔ wo, n si to sewala tun 19bawo n ya a lɔn ko wola madiyalɛ anubɛ Yisa Kirasitita Ni Sɛnimata dɛnbɛnɛ fɛ, n kunyɛ si bɔ kɛ rɔ, yɔ! 20A sɔgɛ ye n na, ado n yili latɛgɛnɛ ko n ti bandan nna wɔlɛ kɛ la mumɛ! N bi a fɛ, n ni fa yisi-latɛgɛ la wati bɛɛ, katarala kaka ma. Woletɔ n tenbi n niyi la wo, n faganɛ wo, fɔ n ni Kirasiti gbiliya tumɛ bɛɛ. 21N bi n niyi la nfenna? Nde yala, Kirasiti le wo kɔrɛ la! Nba, sayɛ le si ma tɔnɛ la worɔ nde yala. 22Kɔnɔ ni n tora n niyi la, n si ke ka wɔlɔ-nyima-bɛrɛ kɛ. Woletɔ n ma a lɔn n si nyamintan yabɔ worɔ. 23N kɔndɔfilinɛ ko filɛ kɛnu tɔ. N bi a fɛ ka bɔ nimayɛ kɛ rɔ ka ta to Kirasiti fɛ. Wo le fisa bɛrɛkɛ! 24Kɔnɔ ka to n niyi kɛ lafɛla, ko ba le wo la wolela ko la. 25Ado n lanɛ wo la serr, woletɔ n ya a lɔn ko min fisa, n ni to n niyi la. N si to wo dama fɛ alako wola yarɔma-ta-koe anubɛ sewɛ dɛnkɛninyɛ rɔ ma ni to kofula. 26N ba fɛrɛ sɔrɔn ka taran wo fɛ tumɛ min tun, wo si Kirasiti Yisa matɔgɔ ka a tɛgɛ nde ma. 27Nba, ko-wɛ ye min na, wo le kɛ la. Wo tagama-nya ni bɛn Kirasitila kibara-nyimɛ ma. Woletɔ ni n ya fɛrɛ sɔrɔn ka ta wo yen, ni n ma ta, n si to a lamɔɛnna ko wo sɔnɛ yiri! Wo si a taran, wo ye wɔlila wo nyɔgɔn fɛ kan kelen tɔ kibara-nyimɛla ko la wo dɛnkɛninyanɛ min ma. 28Wo kana kilan wo yogenu na mumɛ! Wo si a yira anu na ko anu si na halaki kɔnɔ wole si kisi bawo Alla le ye nɔlɛ dila wo ma! 29Wo ara fɛrɛ sɔrɔn ka dɛnkɛninya Kirasiti ma. Kɔnɔ a ma dan wo dɔrɔn ma. Wo ara fɛrɛ sɔrɔn ka tɔrɔ fanan ala ko la. 30Wo ya n yen kɛlɛ kelen min kɛla fɔlɔ, n bi kɛlɛ kelan wo kun na ha kaka iko wo ye a lamɔɛnna nya min. Nba kaka, wa wo sɔ n fɛ kɛlɛ kɛ tinɛ kibara-nyimɛla ko la.

will be added

X\