Matiyu 7

1Yisa ko, “Wo kana mɔgɛnu yiliki, woletɔ Alla ti wole fanan yiliki 2bawo wo ye mɔgɛnu yilikila nya min, Alla ye wole fanan yilikila wo nya na le. Wo wa a ma mɔgɛnu ye nya min, Alla si a ma wole fanan ye wo nya na le. 3Nfenna ko la, i si buriburi yen i ta-nyɔgɛ yɛ ma kɔnɔ kɔn-gbondon min bi ile nyɛrɛ yɛ ma, i hɛnkili sa tugula wo la? 4I ye i sisila a fɔla i ta-nyɔgɛ ma kama worɔ ko, ‘Na, n ni buriburi bɔ i yɛ ma,’ ado kɔn-gbondon ye ile fɔlɔn yɛ ma? 5Ile nyɛrɛ-mayiralɛ! Kɔn-gbondon bɔ ile fɔlɔn yɛ ma, wo kɔma, buriburi min bi i ta-nyɔgɛ yɛ ma, i si ke wo yenna ka wo bɔ a ma. 6“Wo kana fen-sɛnimɛ di wulinu ma bawo ala ban, anu si sɛgi wo kan ma ka wo kin. Wo kana kuru-da-gbɛlɛnu nakɛ kɔsɛnu kɔrɔ bawo anu si wonu tatɛntɛn anu kian kɔrɔ. 7“To tarali kɛla, wo si a sɔrɔn. To nyininɛ kɛla, wo si a yen. To dɛ matugula, a la si ka wo ye. 8Min ba to tarali kɛla, wo si a sɔrɔn. Min ba to nyininɛ kɛla, wo si a yen. Min ba to dɛ matugula, a la si ka wo ye. 9Yonna dan si a tara biredi ma, a ni kuri don a bolo? 10A wa a tara yɛgɛ ma, a ni duguma-fan don a bolo? 11Hali wole min yogo, wo ya a lɔn ko a kin ka fen nyimɛ di wola dannu ma. Wo Fa min bi Arinyɛni tɔ don, wo ti fen nyimɛ di wo ma min tenbira wo la, wa? Ale ma tenbi wo la, wole min bi a tarala kɔni? 12“Alla ya tɔn min di Nɛbi Musa ma anubɛ nɛbinuta karan, wo kɔrɛ le kɛ la ko, ‘Wo ye a fɛ mɔgɛ donu ni min ma wo ye, wole fanan ni wo ma anu ye.’ 13“Wo ni don da-dɔgɔmanɛ la bawo kilɛ min bi tala nyahanama rɔ, wo don dɛ kolo. A tagama ko ma gbɛlɛ. Ado mɔgɔ siyaman bi tala wo le fɛ. 14Kilɛ min bi tala nimaya tinɛ, wo tagama koe gbɛlɛ. A dɛ ma kolo. Ado mɔgɔ siyaman sa a yenna. 15“Wo ni a ma wo fɛrɛma foninya-nɛbinuna ko la. Anu si a fɔ ko anu bi kumala Alla ye kɔnɔ anu foni. Anu kungban-kungban ye nala wo wara iko sagɛnu kɔnɔ anu sɔn mani de iko suluku-kɔnkɔtoe. 16Wo si anu lɔn anuna kɛwɔlɛnu fɛ. Mɔgɔ ti kɔn-gbɔɛ keri wɔnɔ-firɛ rɔ. Toro-gbɔɛ fanan ti keri tiri-wɔnɛ rɔ. 17Kɔlɔma min sabatira, wo le si gbɔ wɛ kɛ. Kɔlɔma min ma sabati, wo gbɔɛ ti mɔgɛ munanfaga. 18Kɔlɔma min sabatira, wola gbɔɛ si mɔgɛ munanfaga. Kɔlɔma min ma sabati, wo le ti gbɔ wɛ kɛ. 19Kɔlɔma minna gbɔɛ ti mɔgɛ munanfaga, wo kuri si tɛgɛ ka a lakɛ tɛ rɔ. 20Nba, wo si foninya-nɛbinu lɔn anu gbɔɛ fɛ wo nya na le. 21“Min bɛɛ ye a fɔla ko ata Mari le nde la, wo bɛɛ ti don Allala mansayɛ rɔ fɔ minnu bi n Fa diyana koenu kɛla, n Fa min bi Arinyɛni tɔ kɔni. 22Tele-laban-lunyɛ, mɔgɔ siyaman si a fɔ ko ata Mari le nde la ko a ya wɔlɔyiya-kumɛnu fɔ n tɔgɛ rɔ. A si a fɔ fanan ko a ya nyina siyaman gben n tɔgɛ rɔ ka kabana ko siyaman kɛ n tɔgɛ rɔ! 23Nba, n si a fɔ wonu ye worɔ ko, ‘N ma wo lɔn mumɛ! Wo bɔ n fɛ, wole ko-yogoma-kɛlɛnu!’ 24“Nba, mɔgɛ min bɛɛ ye nna kumɛ kɛ lamɔɛnna ka a bira, wo si ma iko kei-hɛnkilimɛ min ya ala bɔn sɔ fara kole kuma. 25Banda-wɛ nara. Bɛnu fara. Fɔnyɔ tugura ala bɔn wo ma. Kɔnɔ bɔn wo ma bui bawo a sɔnɛ fara kole kuma. 26Min bɛɛ ye nna kumɛ kɛ lamɔɛnna kɔnɔ anu sa a birala, wo si ma iko kei kun-takolɔn min ya ala bɔn sɔ kɛnkɛn ma. 27Banda-wɛ nara. Bɛnu fara. Fɔnyɔ tugura ala bɔn wo ma! Ala bɔn buira fugbu! A rakerikerita iko kolo lamurunɛ!” 28Yisa banta koe wonu fɔla tumɛ min, nyama kawara ala karan wo ma. 29Anu ko ale sa iko anuna tɔn-karan-mɔgɛnu bawo fanka ye ala karan la.

will be added

X\