Matiyu 3

1San yirika tenbinɛ, Yɔni-Batasi-Kɛlɛ ya kawandili-bɔɛ dabira wulɛ rɔ Yudiya nyamanɛ rɔ. 2A ye a fɔla mɔgɛnu ye nun ko, “Wo ni tubi ka wo kɛ-nyanu yɛlɛma bawo Alla min bi Arinyɛni tɔ, wota mansayɛ ara gbɛrɛn!” 3Ado Nɛbi Aiseya taranta kumala Yɔni kɛ lela ko la nun. A ya a fɔ ko, “Mɔgɛ do ye gbele-gbelenna wulɛ rɔ. A ye a fɔla ko, ‘Bɛɛ ni kilɛ laka Mari ye. Bɛɛ ni kila latelennɛ ladan a ye.’ ” 4Duruki min nadannɛ nyomo-siyi la, Yɔni ya wo don a kan na ka a butɛ kiri sogo-gbole la. A taranta kɔndɔnnu anubɛ liyi dɔnna nun. 5Mɔgɛnu tora nala a wara ka bɔ Yerusalɛm anubɛ Yudiya nyamanɛ tɛngbɛnya bɛɛ rɔ anubɛ nyamanɛ minnu bi Yorodan bɛ dafɛ. 6Anu ya anu sɔ anu hakɛnu na tumɛ min, a ya anu batasi Yorodan bɛ rɔ. 7Yɔni ya Farisi anubɛ Sadusi siyaman yen nala a wara tumɛ min anu batasi koe la, a ya a fɔ anu ye ko, “Wo sɔn yogo iko duguma-fannu. Allala diminyɛ min bi nala, yon ya a fɔ wo ye ko wo si ke bɔla wo kɔrɔ? 8Wo ni koe donu kɛ minnu si a yira ko wo ara wo kɛ-nyanu yɛlɛma. 9Wo ka wo miri ko Iburayima manɛ wo benba la min kɛ, wo ti tɔrɔyɛ sɔrɔn. N bi a fɔla wo ye, hali kuri kɛnu, Alla si ke wonu mala dannu na Iburayima ye! 10Yende kɔrɔ ara bi ka kɔlɔma-kurinu tɛgɛ anu sulinu tɔ. Kɔlɔma min gbɔɛ ma di, a kakɛn, a ni tɛgɛ ka a lakɛ tɛ rɔ. 11“N bi wo batasila yi rɔ alako mɔgɛnu ni a lɔn ko wo ara tubi ka wo kɛ-nyanu yɛlɛma. Kɔnɔ min bi nala nde kɔma, wo si wo batasi Allala Ni Sɛnimɛ la anubɛ tɛ min si wo sɛninya. A makawara nde ko pirr! Nde ma bɛn, hali ka ala sanbarɛ bi a ye. 12Ala fɛrɛ labɛnnɛ ka ala fui-fan bɛɛ rafɛ gbere-kole ma. A si a bɛrɛ ladɛn ka a layɛlɛ birɛ la kɔnɔ a si a fofe anubɛ a fɔrɔn mintan tɛ la ado tɛ wo ti dufen dɛɛ!” 13Wo wati rɔ, Yisa bɔra Kalili sigisɔn rɔ ka ta Yɔni bara Yorodan bɛ fɛ alako a ni a batasi. 14Kɔnɔ Yɔni ya a raya ko Yisa ni a miriya wo yɛlɛma. Yɔni ko, “A ma kɛn, nde ni ile batasi. Ile ni nde batasi!” 15Kɔnɔ Yisa ya a yabi ko, “A ni ma wo nya na bawo a bɛnnɛ ma ni koe bɛɛ kɛ iko a di Alla ye nya min.” Wo le ya a ma, Yɔni sɔnta. 16Yɔni ya Yisa batasi. A bɔra yi rɔ nkɛkuna, san kole dɛ lakara. A ya Allala Ni Sɛnimɛ yigimatoe yen iko kangbɔɛ. Wo sigira a kuma. 17Wo kɔma, kuman kan bɔra Arinyɛni tɔ, a ko, “N nyɛrɛ diyana-dan le kɛ la min wara-koe ara n hɛnɛ feu!”

will be added

X\