Matiyu 13

1Wo tele nyɛrɛ rɔ, Yisa bɔra bɔn la ka ta dalɛ dafɛ. A sigira nyɔ ka mɔgɛnu-karan dabira. 2Nyama min kinkinta a la, wo siya min kɛ, a donta kulɔn rɔ ka a mayigi nyɔ. Nyama sɔra yi kɔnkɔn la. 3A ya ko siyaman fɔ anu ye tilinu tɔ. A ko, “Kei do tara ala sɛnɛ rɔ sugu fui tinɛ. 4A ye sugi fuila tumɛ min, do buira kila kole la. Konanu nara ka a dɔn. 5Do buira fara kole kuma, bɔnkɛ ma siya kan min. A fɛrɛnta tiriya bawo bɔnkɛ ma siya nyɔ. 6Tele bɔra tumɛ min, a mafɔsɔra ka gbala bawo a suli ma yigi dugi rɔ bɛrɛkɛ! 7Sugi do buira wɔnɛnu tɛma. Anubɛ wɔnɛnu yɛlɛta a nyɔgɔn fɛ kɔnɔ tɔ-a-la, wɔnɛnu ya a dɔn. 8Kɔnɔ do buira dugu lamonɛ rɔ. A fɛrɛnta ka a kole don, do kolo kɛmɛ, do bi-wɔrɔ, do bi-sawa.” 9Yisa ko, “Nba, ni min si ko nya-yen, a ni a tole masɔ wo la!” 10Wo kɔma, karan dannu nara Yisa wara ka a manyinika koe do ma. Anu ko, “I tenbi kumala mɔgɛnu ye tumɛ min, nfenna i si to kumala anu na tilinu tɔ?” 11Yisa ya anu yabi ko, “Alla min bi Arinyɛni tɔ, ata mansayɛ gbundu-ko-hɛnkilimayɛ dira wole ma kɔnɔ a ma di wonu ma. 12Fan bi min bolo, a si to wo kuma sala dɛɛ ado wo si a sɔrɔn duk! Kɔnɔ fen sa min bolo, hali a dɔgɔmanɛ min bi a bolo, wo si bɔ a bolo. 13Wo le ya a to, n bi kumala wonu ye tilinu tɔ. Anu bi fan mafɛlɛnna kɔnɔ anu sa a yenna. Anu bi anu tole masɔla kɔnɔ anu sa ko lamɔɛnna, hali ka a nya-yen. 14Nba, Nɛbi Aiseya ya wɔlɔyiya-kumɛ min fɔ anuna ko rɔ, wo ara kanbali. A ko, ‘Mɔgɛ kɛnu si anu tole masɔ ha kɔnɔ anu ti ko nya-yen. Anu si anu yɛ lakalan ha kɔnɔ anu ti fen yen. 15Fan do ara sa mɔgɛnu miriya ya ma. Anu bara anu tole gbere. Anu bara fan sa anu yɛ ma alako anu kana na ko ragbɛ anu yɛ la. Anu kana ko lamɔɛn anu tole la. Anu kana ko nya-yen anu hɛnkili la. Ni wonu ma ma nun, anu si anu ya-lamunun nde, Mari la anu nakɛndɛya koe la.’ 16“Kɔnɔ hɛrɛ ye wole fɛ bɛrɛkɛ! Wo yɛnu bi fan yenna. Wo tolenu bi ko lamɔɛnna. 17Wa wo hɛnkili to kɛ ko! Wo ye min yenna, a sɔgɛ ye nɛbi siyaman anubɛ Allata mɔgɔ siyaman na nun ka wo yen kati! Kɔnɔ anu ma ke a yenna. Wo ye min namɔɛnna kɛ, anu denu ma ke wo lamɔɛnna. 18“Nba, wo ni wo tole masɔ alako wo ni sugu-fuilɛta tili kɔrɛ lɔn. 19Minnu bara Allala mansaya-kumɛ lamɔɛn ado a ma a nya-yen, wonu mani de iko sugi min buira kilɛ fɛ. Min fuira a yisi rɔ, Setanɛ si na worɔ ka wo fɔrɔn. 20Sugi min fuira fara kole ma, wo mani de iko mɔgɛ min bi kumɛ lamɔɛnna ado a si a bira sewɛ la tiriya! 21Kɔnɔ a ma don a yisi rɔ bɛrɛkɛ! A ti mɛ a rɔ. Nba, tɔrɔyɛ anubɛ gbɛlɛyɛ wa na tumɛ min kumɛ wola ko la, a si a boloka tiriya! 22Sugi min buira wɔnɛnu tɛma, wo mani de iko mɔgɛ min bi kumɛ lamɔɛnna kɔnɔ duninya-hɔn-koe anubɛ nɔnfulu-keni ya a ma, kumɛ wo fagara a yisi rɔ feu! A ti gbɔ hali! 23Sugi min buira dugu lamonɛ rɔ, wo mani de iko mɔgɛ min bi kumɛ lamɔɛnna ka a nya-yen. A si gbɔ. Do si kɛmɛ kelen bɔ, do bi-wɔrɔ, do bi-sawa.” 24Yisa ya tili gbɛrɛ tɛgɛ anu ye ko, “Alla min bi Arinyɛni tɔ, ata mansayɛ mani de iko kei min ya sugu-nyimɛ fui ala sɛnɛ rɔ. 25Suyi kelen tɔ, bɛɛ ye kinɔgɛ rɔ tumɛ min, a yoge nara ka bin kole fui ala sɛnɛ rɔ. A tara a ye. 26Ki-fan wonu koloyara tumɛ min, a bɔra a rɔ, bin kole fanan bɔra gbɛ rɔ. 27Kei wola wɔli kɛlɛnu nara a wara ka a manyinika ko, ‘N fa, i ya sugu-nyimɛ le fui ila sɛnɛ rɔ. Bin kole wo don, wo bɔra mi?’ 28A ya anu yabi ko, ‘N yoge do le ara wo ma.’ Anu ya a manyinika ko, ‘I ye a fɛ ma ni ta binyɛ dɛn a rɔ, wa?’ 29A ya anu yabi ko, ‘Ade, wo tenbi binyɛ dɛnna tumɛ min, wo si fui-fan do fanan wurun a fɛ. 30Wa a to fɔlɔn. Anu filɛ ni koloya anu nyɔgɔn fɛ ha a tɛgɛ-tumɛ. Nba, n si a fɔ nna wɔli kɛlɛnu ye worɔ ko anu ni binyɛ fɔlɔn dɛn ka a lakiri. Anu ni a lakɛ tɛ rɔ. Wo kɔma, anu ni ki-fen-bɛrɛ tɛgɛ ka a sa nna birɛ rɔ.’ ” 31Yisa ya tili dogbɛrɛ tɛgɛ anu ye, a ko, “Alla min bi Arinyɛni tɔ, ata mansayɛ mani de iko kende kole. Kei do ya a fui ala sɛnɛ rɔ. 32Hali a kole dɔgɔ fui-fannu tɛma, a koloyara tumɛ min, a kolo fui-fan bɛɛ ko. Konanu si na anu nyagannu kiri a la. Ado a tɔnsɔn si koloya.” 33Yisa ya tili gbɛrɛ tɛgɛ anu ye, a ko, “Alla min bi Arinyɛni tɔ, ata mansayɛ mani de iko biredi-yɛlɛ-fan. Musi ya doni bi ka a basan dɛgɛ-munke ku-musu kelen na ha a bɛɛ yɛlɛta.” 34Yisa ya koe kɛ bɛɛ fɔ nyama ye tilinu tɔ. A ma sɔn ko-wo-ko fɔla anu ye tilinu kɔma. 35A ya wo ma alako nɛbi ya min fɔ, wo ni kanbali. A ko, “N tenbi kumala anu ye, n si tilinu sa. Kebi duninya danta, Alla ma koe minnu nabɔ gbɛ rɔ fɔlɔ nun, n si wonu fɔ anu ye.” 36Wo kɔma, Yisa bɔra nyama tɛma ka don bɔn la. Ala karan dannu nara a wara. Anu ko, “Bin kole min bi sɛnɛ rɔ, tili wo kɔrɛ fɔ ma ye.” 37Yisa ya a kɔrɛ fɔ anu ye ko, “Kei min ya sugu-nyimɛ fui, nde, Hadama dan le wo la. 38Sɛnɛ wo kɔrɛ le duninya kɛ la. Sugu-nyimɛ wo kɔrɛ le mɔgɛ minnu bi Allata mansayɛ rɔ. Bin kole, wo kɔrɛ le Setanɛta mɔgɛnu na. 39N yoge min ya bin kole fui, Setanɛ nyɛrɛ le wo la. Fui-fan-tɛgɛ kɔrɛ le wati-laban la. Fui-fan-tɛgɛlɛnu de melikanu na. 40Iko binyɛ la si dɛn nya min ka a mintan, a si ma wo nya na le fanan wati-laban rɔ. 41Mɔgɛ minnu bi donu sɔla hakɛ kɛ tinɛ anubɛ min bɛɛ ye ko-yogomɛ kɛla, nde, Hadama dan si nta melikanu sɔ wonu nadɛn tinɛ ka anu nabɔ nta mansayɛ rɔ. 42Anu si anu nakɛ ta-feremɛ rɔ, anu si to dila kan min ka anu nyin masɔgɔ dumɛ bolo. 43Kɔnɔ Allala mɔgɛnu si malan iko tele anu Fa Allala mansayɛ rɔ. Ni min si ko nya-yen, a ni a tole masɔ.” 44Yisa ko, “Alla min bi Arinyɛni tɔ, ata mansayɛ mani de iko nɔnfuli min dogonnɛ gbɛkole do rɔ. Kei do ya a yen ka a yamatogon tun. A sewara kati! A tara a bolo-fan bɛɛ feri. Wo kɔma, a sɛgira ka gbɛkole wo san.” 45Yisa ko, “Alla min bi Arinyɛni tɔ, ata mansayɛ mani de fanan iko fen-mayiralɛ min bi kuru-da-gbɛlɛ nyinina. 46A ya a nyima nyima kelen yen tumɛ min, a sɛgira a bolo-fan bɛɛ feri tinɛ ka kuru-da-gbɛlɛ wo san.” 47Yisa ko, “Alla min bi Arinyɛni tɔ, ata mansayɛ mani de iko yalɛ min nakɛnɛ dalɛ rɔ, yɛgɛ su bɛɛ biranɛ min tɔ. 48Yalɛ wo lafara yɛgɛ la tumɛ min, yɛgɛ-biralɛnu ya a sagan ka a layɛlɛ gbele ma. Anu sigira ka yɛgɛ wonu yabɔ. Anu ya yɛgɛ-hakikɛnu sa anuna solenu tɔ ka doi wonu nakɛ a rɔ min ma kin. 49A si ma wo nya na le wati-laban-tumɛ. Melikanu si ta ka mɔgɔ yogomɛnu nadɛn ka anu bɔ mɔgɔ-nyimɛnu tɛma. 50Anu si a yogomɛnu nakɛ ta-feremɛ rɔ. Anu si di nyɔ ka anu nyin masɔgɔ dumɛ bolo.” 51Yisa ya ala karan dannu manyinika ko, “Wo ara koe kɛnu nya-yen, ba?” Anu ya a yabi ko, “Ɔnde.” 52Woletɔ a ya a fɔ anu ye ko, “Nba, Alla min bi Arinyɛni tɔ, tɔn-karan-mɔgɛ min bɛɛ ara ma karan dannu na ata mansayɛ rɔ, wonu mani de iko bon-tigi min bi fen kurɛnu anubɛ a kɔrɔmɛnu nabɔla ala fen namara tinɛ.” 53Yisa banta tili wonu tɛgɛla tumɛ min, a bɔra nyɔ 54ka sɛgi a warɛ Nasarɛti. A ya karan kɛ Yahudiyanuna dina-bɔn la. Minnu ya a kan lamɔɛn, wonu kawara. Anu ya nyinikalɛ kɛ, anu ko, “A ya hɛnkili sifa kɛ sɔrɔn mi? A ye kabana koe minnu kɛla don? 55Bon-tuwalɛla dan ma kɛ la, wa? A na le ma Mariyama la, wa? A dɔgɔ le Yemesi anubɛ Yusufu anubɛ Saimon anubɛ Yudasi la. 56A dɔgɔ musi bɛɛ siginɛ yan de! Ale Yisa don, a ya hɛnkili kɛ bɛɛ sɔrɔn mi?” 57Woletɔ a bɔrɔbɔnɛ anu bolo. Anu ma sɔn dɛnkɛninyala a ma. Nba, Yisa ya a fɔ anu ye ko, “Nɛbi si gbiliyɛ sɔrɔn kan tinɛ bɛɛ fɔ a sɔrɔn-soe burɔ anubɛ ala mɔgɛnu bolo.” 58A ma ke kabana ko siyaman kɛla nyɔ bawo dɛnkɛninya sa anu bolo.

will be added

X\