Matiyu 10

1Yisa ya ala karan den mɔgɔ tan-ni-filɛ kele anu nyɔgɔn fɛ ka anu masara. A ya nyina-gben-sɛnbɛ di anu ma. A ya kiraya sufa bɛɛ lakɛndɛya-sɛnbɛ fanan di anu ma. 2Kilaya tan-ni-filɛ wonu tɔgɛ le kɛnu na. Saimon (min tɔgɔ fanan Pita) anubɛ wo na kelen nyɔgɛ Anduru anubɛ Sɛbɛdila den Yemesi, wonubɛ wo na kelen nyɔgɛ Yɔni. 3Filipi anubɛ Batalamiyu, Tamasi anubɛ Matiyu (duti-makelelɛ kɔni), Alifala den Yemesi anubɛ Tadiyasi, 4Saimon (min si kɛlɛ kɛ ala nyamanɛla ko la) anubɛ Yudasi-Isakariyati min ya Yisa don a yogenu bolo tɔ. 5Yisa ya mɔgɔ tan-ni-filɛ wonu masara ka anu nata ko, “Wo kana ta sibolo gbɛrɛnuna nyamani woo rɔ, hali Samariya kɛnuna soenu tɔ. 6Kɔnɔ wo ye min mala, wo ta Isirɛla mɔgɛnu bara min filifilinɛ iko sagɛnu. 7Wo ta anu makawandi ko, ‘Alla min bi Arinyɛni tɔ, wota mansayɛ ara gbɛrɛn!’ 8Wo ni kirayatoenu nakɛndɛya ka furinu nawuli. Wo ni kunatoenu nakɛndɛya ka nyinɛnu fanan gben. N bara sɛnbɛ wo di wo ma. Wo ma a sɔnkɔ bɔ, wo don ka a sɔnkɔ makele. 9Wo kana ta wodi woo la wo bolo. 10Bɔrɔ wo, duruku fila nyɔgɔ wo, sanbara wo, hali sewuri, wo kana ta wo fenfen na wo bolo tagama wo rɔ. Wo makoe taranta fan minnu na, wo ye tala minnu bara, wonu si wo di wo ma. 11“Wo wa don so-wo-so burɔ min si sɔn wo yiya-koe ma, wo ni ta wo warɛ. Wo ni to ale fɛ ha wo bɔ-tumɛ nyɔ. 12Wo wa don bɔn la tumɛ min, wo ni a fɔ ko, ‘Alamɛ yisi-kimɛ dira wo ma.’ 13Ni bonna-mɔgɛ wonu ya wo rabira a kin na, wola yisi-kima-duwa-kɔndɔli si to anu fɛ. Kɔnɔ ni anu ma wo rabira, wo ni Alla madiya ko wola duwɛ ni bɔ anu fɛ. 14Ni mɔgɛ do ye bɔn wo la, ni wo ma, soe wo burɔ min ma sɔn wo rabirala ka anu tole masɔ wola kumɛ la, wo ni bɔ nyɔ rɔ. Wo ni wo kin-gbangban ragbɔngbɔn anu kan ma nyɔ rɔ. 15Wa wo hɛnkili to kɛ ko! Kiti-tɛgɛ-tele rɔ, Alla si kinikini Sɔdɔm anubɛ Kɔmɔra soe mɔgɛnu ma ka tenbi soe wo la! 16“Wo ni wo tole masɔ! N bi wo latala sulukinu tɛma iko sagɛnu. Wo ni halliya iko duguma-fannu. Wo ni ma kɛlɛ-tɛgɛbɛlɛ la iko kangbɔɛnu. 17Wo ni a ma wo fɛrɛma bawo mɔgɛ donu bi nyɔ minnu si wo bira ka ta wo la kiti tɛgɛ tinɛ. Anu si wo gbesi Yahudiyanuna dina-bɔnnu na. 18Ka a tɛgɛ nde ma, anu si wo rasagan kun tiginu anubɛ mansɛnu yakɔrɔ. Wo si nta kibara-nyimɛ fɔ wonu ye anubɛ sibolo gbɛrɛnu fanan. 19Anu ba ta wo la nyɔ, wo si min fɔ anubɛ wo si a fɔ nya min, wo kana hami wola ko la. A wati wa ke, wo ye nala min fɔla, wo si wo sɔrɔn 20bawo wo ye min fɔla, wota kuma ma wonu na. Kumɛ wonu bi bɔla wo Fa Allala Ni Sɛnimɛ le bolo min bi kumala wo rɔ. 21“Mɔgɛnu si anu na kelen nyɔgɛnu kunyɛ madon anu yogenu bolo alako anu ni anu faga. Fanu si wo nyɔgɔn ma anuna dannu na. Dannu si wuli anu sɔrɔnnɛnu kan ma hali ka anu nadon sayɛ rɔ. 22Wo si gboya mɔgɛ bɛɛ ye ndela ko la kɔnɔ ni min si a munyu ha ala ban, wo tigi si kisi. 23Anu ba a lagbɛlɛya wo kuma so kelen tɔ tumɛ min, wo ni wo buri ka ta so gbɛrɛ rɔ. Wa wo hɛnkili to kɛ ko! Yanni nde, Hadama dan ni na, wo ti wola wɔli laban Isirɛla nyamanɛ soe bɛɛ burɔ. 24“Karan den woo ma tenbi a karan-mɔgɔ la. Yɔɔn woo ma tenbi a tigi la. 25Nba, karan dan wa ke a karan-mɔgɔ rɔ, a kakɛn, wo ni a wasa. Yɔɔn fanan ba ke a tigi rɔ, a kakɛn, wo ni a wasa. Ni anu ya denbaya-tigi kele ko, Biyɛsiba, denbayɛ toenu si tɔgɔ-yogomɛ sɔrɔn ka tenbi ale la! 26“Nba, wo kana kilan mɔgɛnu na. Fenfen yamatogonnɛ, wo yama si ka. Gbundu koe bɛɛ la si bɔ gbɛ rɔ. 27N bi min fɔla wo ye pinpi rɔ, wo ni wo fɔ tun waan rɔ. Wo ara min namɔɛn n bolo dogɔn rɔ, wo ni wo fɔ gbɛ rɔ bɛɛ yala. 28Minnu si ke fɛrɛ-bɔnkɛ fagala kɔnɔ a ti ke niyi fagala, wo kana kilan wonu na. Wo ni kilan Alla la bawo wo si ke niyi anubɛ fɛrɛ-bɔnkɛ le kɛla nyahanama rɔ nya-kun-kelen. 29I si ke kona-mɛsɛ fila sanna kaba kelen na. Hali wo, kona kelen bɛrɛn ti bui dugi ma, wo Fa Alla sa min kalama. 30Nba, wole don, hali wo kun-sigi, Alla ya wo bɛɛ yatɛ lɔn. 31Woletɔ wo kana kilan bawo wo tenbira kona siyamɛnu na. 32“Mɔgɔ wo mɔgɔ wa a sɔn a la gbɛ rɔ ko ntɛ le ale la, n si wo nyɔgɔn ma n Fa Alla yakɔrɔ min bi Arinyɛni tɔ. 33Kɔnɔ mɔgɔ wo mɔgɔ wa a ban n na gbɛ rɔ, nde fanan si n ban a la worɔ n Fa Alla yakɔrɔ min bi Arinyɛni tɔ. 34“Wo mirinɛ ko n bara na yisi-kimɛ la duninya kɛ rɔ, wa? Ade, n ma na yisi-kimɛ la fɔ kɛlɛ. 35N bara na ka kɛlɛ lawuli den keinubɛ anu fanu tɛma, dunmusinubɛ anu nanu tɛma, mama-musunɛnubɛ anu mamanu tɛma. 36I yoge bɛrɛbɛrɛ si taran ila denbayɛ tɛma. 37“Mɔgɔ wo mɔgɔ wa a na, ni wo ma, a fa keni ka tenbi nde la, a ma kɛn, wo tigi ni bila n fɛ. Mɔgɔ wo mɔgɔ wa ala dan keni ka tenbi nde la, a ma kɛn, wo tigi ni bila n fɛ. 38Min ti a nyɛrɛ faga-kɔn bi ka bila n kin-gbɛ fɛ, a ma kɛn, wo tigi ni bila n fɛ. 39Min ba a raya ka a nyɛrɛ niyi lakisi, wo si bɔnɔ a rɔ. Min ba bɔnɔ a niyi rɔ ndela ko la, wo si a sɔrɔn. 40“Mɔgɔ wo mɔgɔ min ba wole, nta karan dannu tabira, wo ara nde rabira. Nba, ni min ya nde rabira, a ara ale fanan tabira min ya n sɔ. 41Min ba Allala kilayɛ rabira bawo Allala kilayɛ le, ale fanan si barayi sɔrɔn iko kilayɛ wo. Min ba mɔgɔ-nyimɛ rabira bawo mɔgɔ-nyimɛ le, ale fanan si barayi sɔrɔn iko mɔgɔ-nyimɛ wo. 42Wa wo hɛnkili to kɛ ko! Min ba yi kimɛ di nna mɔgɔ dɔgɔmani kelen ma bawo nna mɔgɛ le, ale fanan si barayi sɔrɔn, yɔ!”

will be added

X\