Maraka 9

1A ya a fɔ anu ye tun ko, “Wa wo hɛnkili to kɛ ko! Donu bi wo tɛma yan, wonu ti faga fɔ anu ba Allala mansayɛ yen nala sɛnbɛ la.” 2Tele wɔrɔ kɔma, Yisa ya Pita anubɛ Yemesi anubɛ Yɔni bi ka ta anu na a bolo kɔnkɔ-layan-bɛ do kuma anu dan na. Anu yɛ bɛnnɛ Yisa ma tumɛ min, a yen-nya yɛlɛmanta anu yala. 3Ala kurɛnu gbɛra iko bɛgi-gbɛ. Kura-kula woo sa duninya rɔ min si kurɛ gbɛ wo nya. 4Wo kɔma, karan den sawɛ wonu ya Nɛbi Ilaya anubɛ Nɛbi Musa yen kumala Yisa la. 5Pita ya a fɔ Yisa ye ko, “N tigi, a bɛnta ma ye yan. Ma ni lele sawa sɔ, kelen itɛ, kelen Musatɛ, kelan Ilayatɛ.” 6Ale anubɛ a ta-nyɔgɛnu kilannɛ kati! Pita ye min fɔla, a ma wo lɔn. 7Banda finyɛ burunta anu kun na. Kuman kan bɔra banda finyɛ wo rɔ. A ko, “N diyana-dan le kɛ la. Wa wo tole masɔ a la!” 8Tiriyante wo rɔ, anu ya anu yɛ lakalan anuna foolɛ rɔ kɔnɔ anu ma mɔgɔ gbɛrɛ yen fɔ Yisa min sɔnɛ anu fɛ. 9Anu bi yigila kɔnkɛ la tumɛ min, Yisa ya a fɔ anu ye ko, “Wo ara ko-rayirɛ min yen kɛ, wo kana wo fɔ mɔgɔ wo mɔgɔ ye, ha nde, Hadama dan ni wuli ka bɔ furinu tɛma tumɛ min.” 10Anu ya ala kumɛ bira kɔnɔ anu ya wo fɔɛ dabira anu gbansan tɛma. Kɔnɔ anu ko, “ ‘Ka wuli ka bɔ furinu tɛma,’ wo kɔrɛ ye kama?” 11Anu ya Yisa manyinika ko, “Nfenna tɔn-karan-mɔgɛnu bi a fɔla ko Nɛbi Ilaya le fɔlɔn bi nala?” 12A ya anu yabi ko, “Nɛbi Ilaya le fɔlɔn si na serr! A wa na, a si koe bɛɛ sɛgi a gbɛ rɔ. Kɔnɔ nfenna a sɛbɛnɛ Allata kitabu rɔ ndela ko la ko nde, Hadama dan si tɔrɔ ko mɔgɛnu si anu ban n na? 13Kɔnɔ n bi a fɔla wo ye ko Nɛbi Ilaya ara na nun. Ado mɔgɛnu ya anu diyana koe bɛɛ kɛ a la iko a sɛbɛnɛ Allata kitabu rɔ nya min ala ko la.” 14Anu mɔgɔ nani kera karan dan doinu ma tumɛ min, anu ya nyama-belebele yen nyɔ. Tɔn-karan-mɔgɛ donubɛ Yisala karan dan donu bi anu nyɔgɔn sɔsɔla. 15Nyama ya Yisa yen nya min wo, anu kawara kati! Anu burimatoe tara a labɛn tinɛ ka a kɔndɔn. 16Yisa ya ala karan dannu manyinika ko, “Wobɛ wonu bi wo nyɔgɔn sɔsɔla nfenna ko la?” 17Mɔgɔ kelen bi nyama tɛma, wo ya a yabi ko, “Karan-mɔgɔ, n bara na nna dan la i wara bawo nyina-yogomɛ ye a fɛ. A ti ke kumala. 18Nyinɛ wa wuli a la tuma-wo-tuma, a si a labui dugi ma. A da-kanfɛ si bɔ. A si a nyin makinkin. A fɛrɛ bɛɛ si sɔngbɔn. N ya ila karan dannu madiya ko anu ni nyinɛ wo gben kɔnɔ anu ma ke a gbenna.” 19Yisa ya a fɔ anu ye ko, “Wole fanan. Dɛnkɛninya sa wo bolo! N ni to wo fɛ ha tumɛ nyamintan tɔ tun? N si n munyu wo kɔrɔ ha tumɛ nyamintan? Wa a lana n ma!” 20Anu nara a la Yisa wara. Nyinɛ ya Yisa yen nya min wo, a ya dan wo lasɔngbɔn. A buira ka a makuru-kurun dugi ma. A da-kanfɛ ye bɔla. 21Yisa ya dan wo fa manyinika ko, “Nyinɛ kɛ ara wati yili bɔ a fɛ?” A ya a yabi ko, “Kebi a dennɛ. 22Nyinɛ wo ara a raya a faga-koe ma wati siyaman. A ye a labuila tɛ anubɛ yi rɔ. Ni i si ke a mala, kinikini ma ma ka ma dɛnbɛ!” 23Yisa ko, “Nfenna i ko ni n si ke? Dɛnkɛninyɛ ye min bolo, wo si ke koe bɛɛ kɛla.” 24Tiriyante wo rɔ, dan wo fa ya a kan labɔ, a ko, “Dɛnkɛninyɛ ye n bolo kɔnɔ a ma kolo. N dɛnbɛ!” 25Yisa ya a yen ko nyama ye a gbɛrɛnna anu ma min kɛ, a ya nyina-yogomɛ wo makuma. A ko, “Ile, nyina bobo-tolo-gberan, n bi a fɔla i ye, bɔ dan kɛ fɛ. I kana bila a fɛ tun!” 26Nyinɛ ye bɔla a fɛ tumɛ min, a gbele-gbelenta ka dan wo lasɔngbɔn bɛrɛkɛ! Dan wo mara iko mɔgɔ faganɛ, wo le ya a to, mɔgɛ bɛɛ ko, “E, a ara faga!” 27Kɔnɔ Yisa ya dan wo bole bira ka a dɛnbɛ a lasɔla. A ya a lasɔ. 28Yisa donta bɔn la tumɛ min, ala karan dannu ya a manyinika dogɔn rɔ ko, “Nfenna male ma ke nyinɛ wo gbenna?” 29Yisa ya anu yabi ko, “Fen gbɛrɛ ti ke wo sifa gbenna fɔ madiyalɛ.” 30Anu bɔra nyɔ ka Kalili sigisɔn ratagama. A ma di Yisa ye ko mɔgɔ wo mɔgɔ ni a lɔn a ye kan min nun 31bawo a ye ala karan dannu karan tinɛ. A ko, “Anu si nde, Hadama dan don mɔgɛnu bolo tɔ. Anu si n faga. Kɔnɔ a tele sawa nyɔgɛ, Alla si n nawuli tun ka bɔ furinu tɛma.” 32Kɔnɔ anu ma kumɛ wo kɔrɛ lɔn ado anu kilanta a manyinikala. 33Karan dannu kera Kapereniyam soe burɔ. Anu donta bɔn la tumɛ min, Yisa ya anu manyinika ko, “Wo ye wo nyɔgɔn sɔsɔla nfen ma nun kilɛ la?” 34Kɔnɔ anu ma ke a yabila bawo anu ya sɔsɔli sa anu nyɔgɔn tɛma kilɛ la ni mɔgɔ ba ye min na anu tɛma. 35Yisa sigira ka anu karan den tan-ni-filɛ ladɛn. A ya a fɔ anu ye ko, “Ni mɔgɔ wo mɔgɔ ye a fɛ ka ma mɔgɔ fɔlɛ la, fɔ a ni ma a laban la ka ma bɛɛta wɔli kɛlɛ la.” 36A ya dennɛ do bi ka a sɔ anu tɛma. A ya a sigi a kɔnkɔn tɔ ka a fɔ anu ye ko, 37“Ni min ya dennɛ sifa kɛ rabira n tɔgɛ rɔ, wo ara nde rabira. Ado ni min ya nde rabira, wo ara n sɔlɛ fanan tabira.” 38Lunyɛ do, Yɔni ya a fɔ Yisa ye ko, “Karan-mɔgɔ, ma ya kei do yen nyinɛnu gbenna i tɔgɛ rɔ. Ma ya a fɔ a ye ko a ni fara wo la bawo mala mɔgɔ ma ale la.” 39Yisa ya a fɔ Yɔni ye ko, “Wo kana a lakala bawo ni min bi kabana koe kɛla n tɔgɛ rɔ, wo ti ke kuma-yogomɛ fɔla n ma wati kelan wo rɔ. 40Ado ni min sa ma kan ma, wo ye mala ko la. 41Wa wo hɛnkili to kɛ ko! Min ba min-kɛ-yi di wo ma bawo nde, Allata-Mɔgɔ-Yabɔnɛtɛ le wo le la, wo si ata barayi sɔrɔn serr! 42“Dennɛ kɛ minnu dɛnkɛninyanɛ n ma, ni min ya a ma, wo ni don hakɛ rɔ ha a ni bɔ n fɛ, a fisa wo mɔgɛ ye, kuru-belebele-wɛ ni kiri a kan la ka a lakɛ kɔgɔ-yi rɔ. 43Woletɔ ni i bole ya a ma, i ni hakɛ kɛ, a tɛgɛ a la! A fisa, ni i bɔnɔta i bolo kelan rɔ ka ta nimayɛ rɔ wo nya, yanni i fɛrɛ bɛɛ la ni don nyahanama-tɛ-dufenbɛlɛ rɔ, [ 44‘anuna tunbinu ti faga kan min mumɛ! Ado tɛ ti dufen nyɔ habadan!’] 45“Nba, ni i kian ya a ma, i ni hakɛ kɛ, a tɛgɛ a la! A fisa, ni i bɔnɔta i kin kelan rɔ ka ta nimayɛ rɔ wo nya, yanni i fɛrɛ bɛɛ la ni don nyahanama-tɛ-dufenbɛlɛ rɔ, [ 46‘anuna tunbinu ti faga kan min mumɛ! Ado tɛ ti dufen nyɔ habadan!’] 47“Nba, ni i yɛ ya a ma, i ni hakɛ kɛ, a bɔ a rɔ! A fisa, ni i bɔnɔta i ya-kelan rɔ ka ta Allata mansayɛ rɔ wo nya, yanni i fɛrɛ bɛɛ la ni don nyahanama-tɛ-dufenbɛlɛ rɔ, 48‘anuna tunbinu ti faga kan min mumɛ! Ado tɛ ti dufen nyɔ habadan!’ 49“Ado tɛ si mɔgɛ bɛɛ sɛninya iko kɔgɛ wa kɛ soge ma, a ti tuli yona nya min. 50“Kɔgɛ kin kɔnɔ ni a diyɛ bɔra a la, mɔgɛ si ke a mala kɔgɛ la kama tun? Kɔgɛ ni taran wola diyanayɛ rɔ. Ado yisi-kimɛ ni taran wo nyɔgɔn fɛ.”

will be added

X\