Maraka 5

1Nba, anu ke Kalili dalɛ kɔgɔma, Kadara kɛnuna nyamanɛ rɔ kɔni, 2Yisa bɔra kulɔn rɔ nya min wo, kei do ya a taran nyɔ ka bɔ kaburu-soe burɔ. Nyina-yogomɛ bilanɛ kei wo fɛ. 3A ara kaburu-soe ma a ki tinɛ la. Mɔgɔ wo mɔgɔ ti ke a kirila hali yɔlɔkɛ la tun. 4Anu ba a bolenu anubɛ a kiannu nakiri, a si yɔlɔkɛnu tɛgɛ. Nɛgɛ min bi a kian ma, a si wonu takeri. Mɔgɔ wo mɔgɔ ti ke a marala tun! 5Su-ni-tele, a ye kaburu-soenu burɔ anubɛ kɔnkɛnu tɛma. A ye gbele-gbelenna ka a nyɛrɛ matɛgɛtɛgɛ kuri la. 6Nyinatoe wo ya Yisa yen wula-yan la tumɛ min, a burimatoe nara a nyɛnkin Yisa kɔrɔ. 7Yisa ya a fɔ nyinɛ wo ye ko, “Nyina-yogomɛ, bɔ kei kɛ fɛ!” A gbele-gbelenta a kulu mayɛlɛnɛ la ko, “Alla min bi Fan Bɛɛ Kun Na, wola dan Yisa, i ye nyinina nfen ma n bolo? I keli ko i ti n tɔrɔ!” 9Woletɔ Yisa ya a manyinika ko, “I tɔgɛ ye kama?” Nyinɛ wo ya a yabi ko, “N tɔgɔ le Nyama bawo ma siya!” 10A tora Yisa madiyala ko a kana anu gben nyamanɛ wo rɔ. 11Nba, kɔsɔ-mɛlan donu bi nyɔ dafɛ. Anu bi anu de-nyinina kɔnkɔ-kerikerinya ma. 12Nyinɛnu ya Yisa madiya ko, “I ni ma lata kɔsɛnu tɛma alako ma ni don anu tɔ.” 13A sɔnta wo ma. Nyina-yogomɛ wonu bɔra kei wo fɛ ka don kɔsɛnu tɔ. Kɔsɔ-kurɔn wo bɛɛ burimatoe yigira kɔnkɔ-kerikerinya la ka yigi dalɛ rɔ. Kɔsɔ-kurɔn minnu tora-a-rɔ yi rɔ, wonu mumɛ si waga fila nyɔgɔn bɔ. 14Kɔsɔ-kandannɛ wonu burimatoe tara ka koe wo nyɛnsɛn soe anubɛ sɛnɛnu tɔ. Koe minnu bara ma, mɔgɛnu tara wo ragbɛ tinɛ. 15Anu ke Yisa wara, anu ya kei wo yen, nyina-nyama ye min fɛ nun. A siginɛ, kurɛ ye a ma. A hɛnkili ma ara sɔ. Nba, anu dama kun makɔra. 16Min kɛra nyinato-kɔrɛ wo ye anubɛ min kɛra kɔsɛnu na, minnu ya wo yen, wonu ya wo fɔ mɔgɛnu ye. 17Wo le ya a ma, anu burunta Yisa madiyala ko a ni bɔ anuta nyamanɛ rɔ. 18Yisa ye donna kulɔn rɔ tumɛ min, nyinato-kɔrɛ ya a madiya ko, “N fa, sɔn, n ni ta i fɛ!” 19Kɔnɔ Yisa ma sɔn a ta koe ma fɔ ka a fɔ a ye ko, “Sɛgi ila denbayɛ wara. Mari ara ko-nyimɛ min kɛ i ye, i ni wo fɔ anu ye.” 20Nba, so kun tan minnu bi nyɔla foolɛ rɔ, nyinato-kɔrɛ wo tara wo bɛɛ rɔ. Yisa ya min kɛ a ye, a ya wo bɛɛ fɔ anu ye. Min bɛɛ ya wo lamɔɛn, wonu dama kawara kati! 21Yisa sɛgira dalɛ kɔgɔma tun. Nyama-belebele kinkinta Yisa la dalɛ dafɛ nyɔ. 22Yahudiyanuna dina-bon-kun-tigi Yairasi nara. A ya Yisa yen tumɛ min, a ya a sa a kin kɔrɔ 23ka a madiya a sɛbɛ-kuna-wɛ la! A ko, “Nna dunmusu fagamatoe le! I yandi, na. I ni i kɔɛn sa a kuma alako a si kɛndɛya nya min!” 24Yisa bilara a fɛ. Ado mɔgɔ siyaman gbɛrɛnnɛ a ma a tɔnkɔn bɛɛ rɔ. 25Musi do taranta nyɔ min bara tɔrɔ san tan-ni-fila kɔrɔ musinuna kirayɛ bolo. 26Bɛsi-bɔla siyaman ya a mafɛlɛn. Ado anu bara ala wodi bɛɛ ban kɔnɔ a ti fisaya fɔ ka to tagbayala wati bɛɛ. 27A ya Yisa wara-koe lamɔɛn min kɛ nun, a nara sɔ Yisa kɔma nyama tɛma ka a bole tugu ala duruki la. 28A miriya ko, “Ni n ya n bole tugu ala duruki la dɔrɔn, n si kɛndɛya.” 29A ya a bole tugu ala duruki la nya min wo, ala musu-kirayɛ banta kelenna! A ya a lɔn a fɛrɛ rɔ ko a ara kɛndɛya ka bɔ ala tɔrɔyɛ rɔ. 30Tiriyante wo rɔ, Yisa ya a lɔn ko sɛnbɛ do ara bɔ a rɔ. Woletɔ a ya a tintan nyama la. A ko, “Yon magara nna duruki la?” 31Ala karan dannu ya a yabi ko, “I ma mɔgɛnu gbɛrɛnnɛ yen i ma? I ye nyinikalɛ sala kama worɔ ko yon magara ila duruki la?” 32Kɔnɔ Yisa tora a yɛ lakalanna alako min ya wo ma, a si wo yen nya min. 33Bawo musi ya a lɔn min kɛra a ye, a yɛrɛyɛrɛnmatoe nara kilan la a bolo ka a sa Yisa kin kɔrɔ. A ya tonyɛ bɛɛ fɔ a ye. 34Yisa ya a fɔ musi wo ye ko, “N na, ila dɛnkɛninyɛ ara i lakɛndɛya. Ta yisi-kimɛ rɔ. Ila kirayɛ ara ban i rɔ.” 35Yisa ye wo fɔla tumɛ min, mɔgɛ donu nara kilayɛ la ka bɔ Yairasila bɔn la. Wonu ya a fɔ Yairasi ye ko, “Ila dunmusi ara faga. Hali i ma karan-mɔgɔ tɔrɔ tun!” 36Anu ya min fɔ, Yisa ma a tole masɔ wo la fɔ ka a fɔ Yairasi ye ko, “I kana kilan. Dɛnkɛninya tun!” 37A ma sɔn mɔgɔ gbɛrɛ ni bila a fɛ fɔ Pita anubɛ Yemesi anubɛ Yemesi na kelen nyɔgɛ, Yɔni. 38Anu ke kun tigi wola bɔn la, Yisa ya sɔnkɔ-sɔnkɔ taran nyɔ. Mɔgɛnu gbele-gbelen-kan ye bɔla a nya su bɛɛ ma. 39Yisa donta bɔn la ka a fɔ anu ye ko, “Sɔnkɔ-sɔnkɛ kɛ bɛɛ kunyɛ ye nfen na? Wo ye dila nfenna? Dunmusu kɛ ma faga. A ye kinɔgɔ le tɔ dɔrɔn!” 40Anu dama ya Yisa-mayɛlɛn dabira. Woletɔ a ya anu dama labɔ fɔ dennɛ wo na anubɛ a fa anubɛ ala karan den sawɛ. Anu donta bɔn la, furi sanɛ kan min. 41A ya a bira a bole ma ka a fɔ a ye ko, “Dunmusu nɛ, n bi a fɔla i ye, i lasɔ!” 42A ya a lasɔ tiriya ka tagama dabira. (A sɔrɔn ara san tan-ni-fila bɔ nun.) Kabana koe wo kɛra tumɛ min, anu kawara kati! 43Kɔnɔ Yisa ya a magbɛlɛya anu ye ko anu kana a fɔ mɔgɔ woo ye. A ko, “Wa dɔn-fen di a ma.”

will be added

X\