1 Wo kɔma, Yisa ya mɔgɛnu-karan dabira Kalili dalɛ dafɛ tun. Nyama min kinkinta a la, wo siya min kɛ, a donta kulɔn rɔ ka a mayigi nyɔ. Kulɔn wo siginɛ yi kuma, nyama sɔnɛ yi kɔnkɔn la. 2 A ya ko siyaman fɔ anu ye tilinu tɔ. A ko, 3 “Wo ni wo tole masɔ! Kei do tara ala sɛnɛ rɔ sugu fui tinɛ. 4 A ye sugi fuila sɛnɛ rɔ tumɛ min, do buira kila kole la. Konanu nara wonu dɔn tinɛ. 5 Do buira fara-gbaran ma, bɔnkɛ ma siya kan min. A fɛrɛnta tiriya bawo bɔnkɛ ma siya nyɔ. 6 Tele bɔra tumɛ min, a mafɔsɔra ka gbala bawo a suli ma yigi dugi rɔ bɛrɛkɛ! 7 Sugi do buira wɔnɛnu tɛma. Anubɛ wɔnɛnu yɛlɛta anu nyɔgɔn fɛ kɔnɔ tɔ-a-la, wɔnɛnu ya a dɔn. Woletɔ fen ma gbɔ. 8 Kɔnɔ do buira dugu lamonɛ rɔ. A fɛrɛnta ka a kole don, do kolo bi-sawa, do bi-wɔrɔ, do kɛmɛ.” 9 Yisa ko, “Nba, ni min si ko nya-yen, a ni a tole masɔ wo la!” 10 Yisa ye a dan na tumɛ min, minnu ya ala karan lamɔɛn, wonubɛ ala karan den tan-ni-filɛnu nara a wara ka a manyinika ko a ni tili wo faranfasi anu ye. 11 Yisa ya a fɔ anu ye ko, “Allala mansayɛ gbundu-ko-hɛnkilimayɛ dira wole ma. Kɔnɔ n si a fɔ doinu ye tilinu tɔ. 12 Woletɔ (iko a sɛbɛnɛ Allata kitabu rɔ nya min), ‘Anu si to fan yenna kɔnɔ anu ti a ragbɛ. Anu si to anu tole masɔla kɔnɔ anu ti a nya-yen. Bawo ni anu ya ko ragbɛ ka a nya-yen, anu si yɛlɛma Alla wara la. A si anu makoto worɔ.’ ” 13 Wo kɔma, Yisa ya anu manyinika, a ko, “Ni wo ma tili kɛ nya-yen, wo si ke tili doinu nya-yenna kama? 14 Sugu-fuilɛ ye Allala kumɛ fuila. 15 Mɔgɛ donu manɛ iko sugi minnu si bui kila kole la. Mɔgɛ wonu si a lamɔɛn kɔnɔ anu ba a lamɔɛn nya min wo, Setanɛ si na worɔ ka wo fɔrɔn anu yisi rɔ. 16 Sugi min fuira fara-gbaran ma, wo mani de iko mɔgɛ minnu bi kumɛ lamɔɛnna ado anu si a bira sewɛ la tiriya! 17 Kɔnɔ a ma don anu yisi rɔ bɛrɛkɛ! A ti mɛ lefan. Nba, tɔrɔyɛ anubɛ gbɛlɛyɛ wa na tumɛ min, a si a boloka tiriya kumɛ wola ko la! 18 Sugi min buira wɔnɛnu tɛma, wo mani de iko mɔgɛ min bi kumɛ lamɔɛnna 19 kɔnɔ duninya hɔn-koe anubɛ nɔnfulu-keni anubɛ nata su bɛɛ ya a ma, kumɛ wo fagara a yisi rɔ feu! A ti gbɔ hali! 20 Sugi min buira dugu lamonɛ rɔ, wo mani de iko mɔgɛ min bi kumɛ lamɔɛnna. A si kumɛ lamɔɛn ka a bira. A si gbɔ, do bi-sawa, do bi-wɔrɔ, do kɛmɛ.” 21 Yisa tora kumala. A ko, “Mɔgɔ wo mɔgɔ ti lɛnpu lamalan ka bɔnku-dagɛ burun a kun na. A ti lɛnpu ladon sa-fan kɔrɔ fanan. Kɔnɔ a si a sigi a sigi-fan kuma. 22 Ko-dogonnɛ bɛɛ si bɔ gbɛ rɔ. Koe min bɛɛ yamatogonnɛ, wonu yama si ka. 23 Nba, ni min si ko nya-yen, a ni a tole masɔ!” 24 A ya a fɔ anu ye fanan ko, “Wo ni a ma wo fɛrɛma worɔ ko-lamɔɛn tinɛ. Wo ye fan sumanna doinu ye nya min, Alla si a suma wole fanan ye wo nya na le. Ado wotɛ si gbɛlɛya anutɛ ko. 25 Kɔnɔ fen bi min bolo, Alla si do sa wo kuma. Kɔnɔ fen kɛndɛ sa min bolo, a yili ye fen nɛ min ma, Alla si wo bɔ a bolo.” 26 Yisa ya a fɔ anu ye tun ko, “Allala mansayɛ mani de iko kei min ya sugi fui ala sɛnɛ rɔ. 27 Fui-fannu si fɛrɛn ka sabati su-ni-tele, hali fui-fen-tigi wo ye kinɔgɔla, ni wo ma, a ye wɔlila. A si to wo mala hali fui-fen-tigi ti a sabati-nya lɔn. 28 Dugi nyɛrɛ le ye a mala, ki-fan ni sabati ka gbɔ. A yanbɛ si nɔrɔn, wo kɔma, a tɔnsɔn si bɔ a rɔ, wo kɔma, a si mɔ. 29 A wa mɔ, sɛni-tigi si na a tɛgɛ wɔrɔtɛ la.” 30 Yisa ya a fɔ tun ko, “Ma si Allala mansayɛ sanka nfen ma? N ni tili do tɛgɛ wo ye min si a faranfasi. 31 Nba, Allala mansayɛ manɛ iko kende kole min dɔgɔyanɛ fui-fan kolenu tɛma duninya rɔ. Ni mɔgɛ ya a fui, 32 a si koloya ka tenbi fui-fan bɛɛ la. A tɔnsɔn si koloya. Wo kɔma, konanu si na anu nyagannu kiri a la.” 33 Yisa ya kawandili bɔ mɔgɛnu ye ka tili kɛ su siyaman tɛgɛ anu ye. Woletɔ anu si ke min nya-yenna, a ya anu karan wo la. 34 A ya kawandili min bɛɛ bɔ anu ye, a ya tili le tɛgɛ wo bɛɛ bɔ tinɛ. Kɔnɔ anubɛ ala karan dannu bi anu dan na tumɛ min, a si wo bɛɛ faranfasi anu ye. 35 Wurɛ wo la, Yisa ya a fɔ ala karan dannu ye ko, “Ma tenbi wona dalɛ kɔgɔma.” 36 Anu ya nyama boloka. Yisa siginɛ kulɔn min tɔ, karan dannu donta kulun kelan wo rɔ. Kulɔn donu fanan bi nyɔ nun a fɛ. 37 Fɔn-belebele bɔra. Nba, yi ye lunku-lankana a rɔ kulɔn kun na. A tora doni, kulɔn la ni fa yi la. 38 Yisa ye kinɔgɔ-belebele rɔ kulɔn burɔ a kɔma kilɛ la! A kunyɛ sanɛ kun-kɔrɔ-sɛ kuma. Karan dannu ya a lakunden. Anu ko, “Karan-mɔgɔ, ma niyi bɔrɔ sa i ye, wa?” 39 Yisa kundenta. A ya a fɔ ko, “Fɔnyɔ ma ni kima don!” A sigira a la don! Fɔnyɔ ma tugu tun. 40 Wo kɔma, Yisa ya a fɔ anu ye ko, “Nfenna wo kilannɛ? Dɛnkɛninya sa wo bolo, wa?” 41 Kɔnɔ anu kun makɔra kati! Anu wulita a fɔla anu nyɔgɔn ye ko, “Nfen mɔgɔ sufa ye kɛ la? Hali fɔnyɔ anubɛ yi ye ala kumɛ birala!”
