Maraka 2

1Tele dande kɔma, Yisa sɛgira Kapereniyam soe burɔ. Kumɛ wo nyɛnsɛnta ko a ara a kɔ sɛgi a warɛ. 2Mɔgɔ siyaman nara anu nyɔgɔn fɛ ha sɔ tina woo ma to hali bonda-dɛ la. Yisa ye Allala kumɛ kawandili bɔla anu ye tumɛ min, 3kei min solomonyanu-faganɛ a la, mɔgɔ nani nara wo la sanyili rɔ. 4Kɔnɔ anu ma ke kilɛ sɔrɔnna nyama bolo ka a ladon bɔn la. Woletɔ anu yɛlɛta a la bɔn kuma ka woe sɔgɔ alako anu si a layigi nya min sanyili rɔ mɔgɛnu tɛma Yisa yakɔrɔ. Anu ya woe wo sɔgɔ tumɛ min, anu ya kirayatoe wo layigi Yisa kɔrɔ sanyili rɔ. 5Yisa ya anuna dɛnkɛninya-wɛ yen tumɛ min, a ya a fɔ kirayatoe wo ye ko, “N bɔ, i hakɛnu ma ara koto.” 6Tɔn-karan-mɔgɛ minnu siginɛ nyɔ, wonu ya anu miri ko, 7“Yon bi kei kɛ la min bi Alla lafɛyala? Mɔgɔ wo mɔgɔ ti ke hakɛ makotola fɔ Alla kelen pe!” 8Yisa ya anu miriyanu lɔn nkɛkuna, a ya a fɔ anu ye ko, “Wo ye wo mirila wo nya na kama? 9Ka a fɔ kirayatoe wo ye ko a hakɛnu ma ara koto anubɛ ka a fɔ ko a ni a lasɔ ka ala sanyili bi ka tagama, nyamintan fɔɛ gbɛlɛ? 10N si a yira wo la kɛ rɔ ko sɛnbɛ ye nde, Hadama dan bolo dugu kole kɛ kuma ka hakɛ makoto.” Wo kɔma, kei min solomonyanu-faganɛ a la, a ya a fɔ wo ye ko, 11“I lasɔ. I ni ila sanyili bi. Sɛgi i warɛ bɔn la!” 12Kei wo ya a lasɔ kelenna ka ala sanyili lamɔrɔmɔrɔ. A ya a bɔ anu dama yala. Anu dama kawara bɛrɛkɛ, ka Alla tanto. Anu ko, “Ma ma kɛ nyɔgɔn yen bɛ!” 13Yisa sɛgira Kalili dalɛ dala tumɛ min, mɔgɔ siyaman nara a wara. Yisa ya anu karan dabira. 14A tamatoe, a ya duti-makelelɛ yen, wo tɔgɛ Lifayi, Alafala dan. A siginɛ ala wɔli kɛ tinɛ. Yisa ya a fɔ a ye ko, “Bila n fɛ.” Lifayi ya a lasɔ ka bila a fɛ. 15Wo kɔma, Yisa ye fen dɔn la Lifayila bɔn la tumɛ min, duti-makelelɛnu anubɛ hakɛ tigi siyaman nara ka sigi ale anubɛ ala karan dannu fɛ nyɔ. 16Farisi minnu bi tɔn-karan-mɔgɔyɛ la, wo donu ya Yisa yen fen dɔn la hakɛ tiginu anubɛ duti-makelelɛnu fɛ tumɛ min, anu ya ala karan dannu manyinika ko, “Nfenna Yisa ye fen dɔn la duti-makelelɛnu anubɛ hakɛ tiginu fɛ?” 17Yisa ya anu kan lamɔɛn min kɛ, a ya a fɔ anu ye ko, “Minnu kɛndɛ, wonu mako sa bɛsi-bɔlɛ la fɔ minnu kirɛ. Ado n ma na mɔgɔ-telennɛnu kele tinɛ fɔ hakɛ tiginu alako wonu ni bila n fɛ.” 18Lunyɛ do, Yɔni-Batasi-Kɛlɛla karan dannu anubɛ Farisinu bi sun-don kun na nun. Mɔgɛ donu nara Yisa wara ka a manyinika ko, “Nfenna Yɔni-Batasi-Kɛlɛla karan dannu anubɛ Farisinuna karan dannu bi sunyɛ donna kɔnɔ itɛnu ti sunyɛ don?” 19Yisa ya anu yabi ko, “A ye wo burɔ ko mɔgɛ minnu bi kɔnyɔ-masɔɛ rɔ, fananta kɔnyɔ-kura-tigi ye anu fɛ, wonu si kɔnkɔ? Wo ti ke mala ni! Fananta kɔnyɔ-kura-tigi ye anu fɛ, anu ti sunyɛ don. 20Kɔnɔ a wati wa ke, anu ba kɔnyɔ-tigi wo bi anu tɛma tumɛ min, anu si sunyɛ don worɔ. 21“Mɔgɛ ti kura-kundu-kurɛ bi ka duruku kɔrɛ labɛtɛrɛ wo la bawo a kurɛ wo ra si don ka duruku kɔrɛ wo rafara ka tenbi a fɔlɛ la. 22Mɔgɔ ti ke baan lamarala gbolo-bɔrɔ-kɔrɛ rɔ. Ni a ya wo ma, a wa kanfa, a si gbolo-bɔrɔ-kɔrɛ wo rafara. Baan wo si bon. Gbolo-bɔrɛ fanan si tinya. Kɔnɔ baan la ni mara gbolo-bɔrɔ-kurɛ rɔ.” 23Yisa anubɛ ala karan dannu tenbira sɛnɛ do rɔ Sulen-Tele ma. Ala karan dannu ya fui-fan-gbesi dabira ka a togotogon anu bolo tɔ ka a kole dɔn. 24Woletɔ Farisinu ya a fɔ Yisa ye ko, “A mafɛlɛn ila karan dannu bi min mala kɛ la Sulen-Tele ma. Anu bi mala tɔn tinyana wo la!” 25Yisa ya anu yabi ko, “Mansa Dawuda ya min kɛ wo tumɛ kɔnkɛ ye anubɛ ala keminɛnu na, wo ma wo karan bɛ, wa? 26A donta Allala bɔn la. Biredi min dantɛgɛnɛ Alla ma, anubɛ ala keminɛnu ya wo dɔn, hali anu bi tɔn tinyana wo dɔn tinɛ. A ya kɛ ma wo tumɛ Abiyatari ye saraka-masɔ-kun-tigiyɛ la. Ado saraka masɔlɛnu denu dɔrɔn kakɛn ka biredi wo dɔn nun.” 27Yisa ko, “Sulen-Tele ladanta mɔgɔ ye. Mɔgɔ ma dan Sulen-Telela ko la. 28Ado nde, Hadama dan le Mariyɛ la Sulen-Tele kun na.”

will be added

X\