1 Tiriyante wo rɔ, subaga dɛ ma, saraka-masɔla-wɛnu anubɛ kɛmɔgɛnu anubɛ tɔn-karan-mɔgɛnu anubɛ mɔgɔ ba toe bɛɛ ya anu nyɔgɔn nadɛn ka sɔn Yisa faga koe ma. Anu ya Yisa kiri ka ta a don Pailɛti bolo. 2 Pailɛti ya a manyinika ko, “Yahudiyanuna mansɛ le ile la, wa?” Yisa ya a yabi ko, “Ɔn, a ye iko i wara a fɔ nya min.” 3 Saraka-masɔla-wɛnu ya ko-yogomɛ siyaman fɔ Yisala ko la, 4 woletɔ Pailɛti ya a manyinika tun ko, “I ti anu yabi? Anu bara minnu fɔ ila ko la, i sa wonu namɔɛnna?” 5 Yisa ma sɔn hali ka kuma kelen fɔ tun. Wo le ya a ma, Pailɛti kawara kati! 6 Kanan-Ko-Ladiya woo wa ke, mɔgɛnu ba Pailɛti manyinika yelela-mɔgɛ minna ko la, a duruta wo kelen bolokala anu ye. 7 Wo wati ya a taran, kei min tɔgɛ Barabasi, wo ye yele la. Wo ya murutiyɛ kɛ ka mɔgɛnu faga murutiyɛ wo rɔ. 8 Nyama ladɛnta tumɛ min, anu ya Pailɛti madiya ko a duruta min kɛla anu ye, a ni wo kɛ anu ye. 9 Pailɛti ya anu manyinika ko, “Wo ye a fɛ, n ni Yahudiyanuna mansɛ boloka wo ye, wa?” 10 A ya a lɔn serr, ko saraka-masɔla-wɛnu bara Yisa don a bolo keliyɛ lela ko la. 11 Kɔnɔ saraka-masɔla-wɛnu ya nyama hɛnkili labila ko a ni Barabasi boloka anu ye. 12 Pailɛti kumara nyama ye tun ko, “Nba, wo ye min kelela Yahudiyanuna mansɛ, wo ye a fɛ, n ni nfen ma wo la worɔ?” 13 Anu sɔnkɔra tun ko, “A gbangban kɔlɔma ma!” 14 Kɔnɔ Pailɛti ya anu manyinika ko, “A ya ko-yogomɛ nyamintan kɛ?” Anu sɔnkɔra ha ka a dan natenbi ko, “A gbangban kɔlɔma ma!” 15 Pailɛti ye a fɛ ka nyama hɛnɛ, woletɔ a ya Barabasi boloka anu ye. A ya a ma, ala kɛlɛ dannu ya Yisa gbesi ka a don anu bolo ko anu ni a gbangban kɔlɔma ma. 16 Kɛlɛ dannu tara Yisa la kun tigila kata burɔ. Anu ya anu ta-nyɔgɛ kɛlɛ dan kele ka anu nadɛn. 17 Anu ya duruku-yan kara-fin-damɛ don Yisa kan na ka wɔnɛ ma mansaya-fulɛ la a ye ka wo don a kunyɛ la. 18 Anu wulita a mayɛlɛnna a kɔndɔn tinɛ. Anu ko, “Yahudiyanuna mansɛ, alamɛ i mɛra!” 19 Anu ya a gbesi a kunyɛ rɔ kɔlɔma la ka anu nɔgɔ-yi kɛ a ma. Anu ya anu nyɛnkin a kɔrɔ ka a ma iko anu bi a gbiliyala. 20 Anu banta a mayɛlɛnna tumɛ min, anu ya duruku-yan kara-fin-damɛ wo bɔ a kan na ka a nyɛrɛta fanɛnu don a ma tun. Anu tara a la a gbangban tinɛ kɔlɔma ma. 21 Anu bi tala tumɛ min, anu bɛnta kei do la min tɔgɛ Saimon, Sairini kɛ le. A bɔmatoe sɛnɛ rɔ nun ka ta soe. Kɛlɛ dannu ya a fɔrɔsɛ Yisa faga kɔlɔma bi-koe la. (Saimon wo, Alɛsanda anubɛ Rufasi fa le kɔni.) 22 Anu tara Yisa la ha kan tinɛ min tɔgɔ Kalakata. Wo kɔrɛ le ko, “Kun Kole ye Kan Min.” 23 Fan min tɔgɛ mira, anu ya wonubɛ gbɛɛ yabasan ka a di Yisa ma kɔnɔ a ma sɔn a minna. 24 Wo kɔma, anu ya a gbangban kɔlɔma ma. Anu ya korɔn lakɛ ka ala durukinu tatala anu nyɔgɔn tɛma. 25 Anu ya a gbangban kɔlɔma ma sun-tele-wati (9 am). 26 Anu ya a yiliki min na, anu ya wo sɛbɛ walan ma ko, “Yahudiyanuna Mansɛ.” 27 Minnu bi buila mɔgɛnu ma ka anuna bolo-fannu bi, anu ya wo filɛ gbangban kɔlɔmanu ma Yisa tɔnkɔnnu tɔ, kelen a bolo nyimɛ rɔ, kelen a maran rɔ. [ 28 Allata kitabu kanbalita wo rɔ ko, “A kofura ko-yogoma-kɛlɛnu ma.”] 29 Mɔgɔ tenbimatoenu ya anu kunyɛ radɔn Yisa ma ka a lafɛya. Anu ko, “Ile. I ko i si Alla Bato Bɔn wayan ka a sɔ tun tele sawa kɔrɔ, 30 nba, yigi ka bɔ kɔlɔma ma gbɛ! I ni i nyɛrɛ kisi!” 31 Saraka-masɔla-wɛnu anubɛ tɔn-karan-mɔgɛnu fanan ya Yisa mayɛlɛn wo nya na le ka a fɔ anu nyɔgɔn ye ko, “A ya donu kisi kɔnɔ a ti ke a nyɛrɛ lakisila! 32 Ma ni Allata-Mɔgɔ-Yabɔnɛ, Isirɛla mansɛ yen yigila kaka ka bɔ kɔlɔma ma. Ado ni wo mara, ma si la a la!” Mɔgɔ filɛ minnu gbangbanta kɔlɔma ma a tɔnkɔnnu tɔ, wonu fanan ya a lafɛya. 33 Tele latelan, pinpi burunta nyamanɛ wo bɛɛ kuma ha hawa sawa. 34 Tele-makimɛ-wati (3 pm), Yisa gbele-gbelenta kan ba la. A ko, “Iloyi, Iloyi, lama sabakatani?” Wo kɔrɛ le, “Nta Alla, nta Alla, i wara n boloka nfenna?” 35 Mɔgɛ donu sɔnɛ nyɔ, wonu ya a kan lamɔɛn. Anu ko, “Wa wo tole masɔ. A ye Nɛbi Ilaya kelela!” 36 Mɔgɔ kelen ya sefuna-fuyi bi. A burimatoe tara a layigi gbɛɛ kunayanɛ rɔ ka wo don kɔlɔma-sungban la. A ya a layɛlɛ ka a bɛn Yisa dɛ ma ko a ni a kan lakimɛ. A ko, “A makɔni! Ma ni a yen ni Nɛbi Ilaya si a layigi ka a bɔ kɔlɔma ma!” 37 Yisa ya a kan labɔ tun bɛrɛkɛ ka a niyi-laban lafɛ. 38 Nba, yorolan min dunnɛ Alla Bato Bɔn tɛma, wo farata fila la ka a dabira a kuma ha a kɔrɔ. 39 Kɛlɛ-den-kun-tigi min sɔnɛ kɔlɔma da kɔrɔ nun, Yisa gbele-gbelenta nya min a niyi bɔ tinɛ, wo ya wo yen. A ko, “Allatalata dan nyɛrɛ le kɛ la nun serr!” 40 Musi donu sɔnɛ wula-yan la ka a mafɛlɛn. Salomi anubɛ Mariyama, Magadala kɛ anubɛ Mariyama, Yemesi dɔgɔma anubɛ Yusufu na kɔni, wonu bi anu tɛma. 41 Yisa ye Kalili sigisɔn rɔ tumɛ min, anu ya a dɛnbɛ kati! Musu gbɛrɛ siyaman fanan bi nyɔ nun minnu bilanɛ a fɛ ha Yerusalɛm. 42 Nyima wurɛ le nun, anu tabɛn-wati Sulen-Telela ko la, 43 Yusufu, Arimatiya kɛ nara. Yahudiya mɔgɔ ba le nun min gbiliyanɛ kati! A ye Allala mansayɛ makɔnɔna. Ale Yusufu ya a yisi ragbɛlɛya ka ta Pailɛti wara ko anu ni Yisa furi don a bolo. 44 Pailɛti ya a lamɔɛn tumɛ min ko Yisa fagara yona, a kawara. A ya kɛlɛ-den-kun-tigi wo kele ka a manyinika ni Yisa niyi ara ban bɔla. 45 Kɛlɛ-den-kun-tigi banta a dantɛgɛla Pailɛti ye tumɛ min, a ya a fɔ Yusufu ye ko a ni Yisa furi bi. 46 Yusufu nara linɛn-kura-kurɛ la a bolo ka a furi layigi kɔlɔma ma ka a kasankɛ. Anu ya kanbɛ min sin nun kuru-faganɛ rɔ, anu ya a sa nyɔ burɔ. Wo kɔma, a ya fara-belebele makuru-kurun ka a sa kanbɛ wo dɛ la. 47 Mariyama, Magadala kɛ anubɛ Mariyama, Yusufu na kɔni, wonu bi a mafɛlɛnna nun alako anu ni Yisa sa tinɛ lɔn.
