Maraka 13

1Yisa ye bɔla Alla Bato Bɔn la tumɛ min, ala karan den kelen ya a fɔ a ye ko, “Karan-mɔgɔ, kuru-belebele-wɛ kɛnu mafɛlɛn! Nba de! Ado bon makawanɛ le kɛnu na!” 2Yisa ya a yabi ko, “I wara bon-belebele kɛnu yen, ba? N bi a fɔla wo ye ko kuri kɛnu, hali kelen bɛrɛn ti to a gbɛ rɔ. A bɛɛ si wayan.” 3Yisa ya a mayigi Ɔlifi kɔnkɛ kuma Alla Bato Bɔn telen tɔ tumɛ min, Pita, Yemesi, Yɔni, anubɛ Anduru nara a wara dogɔn rɔ. 4Anu ya a manyinika ko, “Yerusalɛm bu-wati fɔ ma ye. Tamasere nyamintan si a yira ma la ko a kɛ-tumɛ ara ke?” 5Yisa ya a fɔ anu ye ko, “Wo ni a ma wo fɛrɛma. Wo kana sɔn, mɔgɔ wo mɔgɔ ni wo mayuwaya. 6Mɔgɔ siyaman si na n tɔgɛ rɔ ka a fɔ ko, ‘Ale le nde la!’ Ado anu si mɔgɔ siyaman mayuwaya. 7Wo si kɛlɛ-koenu namɔɛn anubɛ kɛlɛ-kibarɛnu kɔnɔ wo kana kilan. A fɛrɛ sa fɔ wonu ni ma kɔnɔ ala ban ma wo la fɔlɔn. 8Sibolo gbɛrɛnu si wuli anu nyɔgɔn kan ma. Nyamanɛnu si wuli anu nyɔgɔn kan ma. Dugu-yɛrɛyɛran si kɛ kan tina siyaman tɔ. Kɔnkɔ-fitinɛnu si na. Wola tɔrɔyɛnuna fɔlɛ le kɛnu na dɔrɔn. 9“Wo ni a ma wo fɛrɛma bawo anu si wo kiti ka wo ladon Yahudiyanuna dina-bɔnnu na anu si wo gbesi kan min. Anu si ta wo la kun tiginu anubɛ mansɛnu bara ndela ko la ko wo ni ma sereyɛnu na n ye. 10A fɛrɛ sa fɔ kibara-nyimɛ kawandilɛ kɛ ni bɔ mɔgɛ bɛɛ ye fɔlɔn. 11Anu ba wo bira ka ta wo la kiti-bɔn la, wo si min fɔ anubɛ wo si a fɔ nya min, wo kana haminya wola ko la. A wati wa ke, wo ye nala min fɔla, wo si wo sɔrɔn bawo wo ye min fɔla, wota kuma ma wonu na. Kumɛ wonu bi bɔla Allata Ni Sɛnimɛ le bolo min bi kumala wo rɔ. 12Mɔgɛnu si anu na kelen nyɔgɛnu kunyɛ don a yogenu bolo tɔ alako anu ni anu faga. Fanu si wo nyɔgɔn ma anuna dannu na. Dannu si wuli anu sɔrɔnnɛnu kan ma hali ka anu nadon sayɛ rɔ. 13Mɔgɛ bɛɛ si wo kɔn ndela ko la kɔnɔ ni min si a munyu ha ala ban, wo si kisi. 14“Wo si ‘kisimiriya koe’ sɔnɛ yen kan tinɛ do rɔ, a sɔ tina ma min na. (Minnu bi kɛ karanna, anu ni anu taya a kɔrɛ-lɔn koe ma!) Minnu bi Yudiya nyamanɛ rɔ, wonu ni anu buri ka yɛlɛ kɔnkɛnu kuma. 15Ni min taranta ala bɔn kuma, hali a ma a bolo-fan fenfen bi ala bɔn la. 16Ni min taranta ala sɛnɛ rɔ, a kana sɛgi ala duruki bi tinɛ. 17Musu-kolomɛ anubɛ denbɛnu, wo wati si ma gbalo-belebele la anu kuma. 18Wo ni Alla matara ko wola buri-kɛ kana bɛn samɛ ma 19bawo mɔgɛnu si tɔrɔyɛ sɔrɔn ka tenbi tɔrɔyɛ bɛɛ la min nyɔgɔn ma kɛ bɛ kebi duninya danta. Ado a nyɔgɔn ti kɛ fanan mumɛ! 20Kɔnɔ Mari ara ban do bɔla tele wonu na. Ni a ma wo ma nun, mɔgɔ wo mɔgɔ ti kisi. Kɔnɔ Mari si do bɔ tele wonu na ala mɔgɔ yabɔnɛnuna ko la. 21“Nba, ni mɔgɔ wo mɔgɔ ya a fɔ wo ye ko, ‘I yɛ lata, Allata-Mɔgɔ-Yabɔnɛ ye yan,’ ni wo ma, ‘A ye pan!’ wo kana la wo la. 22Ado minnu ya anu nyɛrɛ mayira iko Alla le ya anu sɔ, wonu si bɔ gbɛ rɔ. Donu si anu nyɛrɛ ma nɛbinu na fanan. Anu si kabana-ko-belebele-wɛnu kɛ Allala mɔgɔ yabɔnɛnu yanfa koe la, ni a si ke mala kɔni. 23Wo ni a ma wo fɛrɛma! N bara kɛ fɔ wo ye yanni a wati ni kɛ. 24“Tɔrɔya-tele wonu ba tenbi tumɛ min, tele la si fin. Karɛ ti gbɛ tun. 25Lolenu si bɔ san kole rɔ ka bui. San-koletɔ-fannu na si maga ka bɔ anu gbɛ rɔ. 26Mɔgɛnu si nde, Hadama dan yen nala banda-fin-gbɛ rɔ sɛnbɛ-ba anubɛ gbiliya-wɛ la n bolo. 27N si nta melikanu nata duninya-tonko-nanɛ bɛɛ rɔ. Anu si nna mɔgɔ yabɔnɛnu nadɛn ka bɔ duninya kan tinɛ bɛɛ rɔ. 28“Wo ni hɛnkili sɔrɔn toro-kuri fɛ. A bolɔnnu ba a matii tumɛ min ka yanba-kun-nɛnu nabɔ, wo si a lɔn wo le ma ko samɛ ara gbɛrɛn, ka, n foni? 29A ye wo nya na le, wo wa koe kɛ bɛɛ yen tumɛ min, wo si a lɔn ko wati ara gbɛrɛn. A sɔnɛ dɛ la. 30Wa wo hɛnkili to kɛ ko! Minnu bi anu kɛndɛ la kɛ wati rɔ, yanni wo bɛɛ ni faga, koe kɛ bɛɛ si bɔ a la. 31San kole anubɛ dugu kole si tenbi kɔnɔ nna kumɛ ti tenbi mumɛ! 32“Koe kɛ bɛɛ si ma wati min, mɔgɔ wo mɔgɔ ma wo tele lɔn, ni wo ma, a wati, hali Arinyɛnitɔ-melikanu. Hali nde, Allata Dan, n ma a lɔn fɔ n Fa kelen pe, wo le ya a lɔn. 33Wo ni a ma wo fɛrɛma ado wo yɛ lakalannɛ ni to bawo wo ma wo na-tumɛ lɔn. 34A si ma iko kei min bɔra a warɛ ka ta tagama rɔ. Wo ya ala wɔli kɛlɛnu to ala bɔn kun na. A ya wɔlɛ to anu kelen-kelennamɛ-bɛɛ bolo. A ya a fɔ da-kandannɛ ye ko a ni a yɛ lakalan. 35Woletɔ wo yɛ lakalannɛ ni to bawo wo ma bon-tigi na-tumɛ lɔn. Wo ma a lɔn ni a si na wurɛ la, suyi tɛma, dondɔn-keke-wati, ni wo ma, sun-tele-fɛran. Wo ma a lɔn. 36Ado ni a nara yona, a kana wo taran kinɔgɛ rɔ. 37Nba, n bi min fɔla wo ye, n bi wo le fɔla bɛɛ ye. Wo yɛ lakalannɛ ni to tolon!”

will be added

X\