1 Yisa sɛgira ka bɔ Yorodan bɛ fɛ, a fanɛ Allata Ni Sɛnimɛ la. Wo kɔma, Allata Ni Sɛnimɛ tara a la wulɛ rɔ. 2 Tele bi-nani kɔrɔ, Setanɛ ya a magbɛrɛnkɛ nyɔ. Wati wo bɛɛ kɔrɔ, Yisa ma fenfen dɔn, woletɔ kɔnkɛ ya a bira bɛrɛkɛ! 3 Setanɛ ya a fɔ a ye ko, “Ni Allata dan le ile la, kuri kɛ yɛlɛma biredi la.” 4 Yisa ya a yabi ko, “A sɛbɛnɛ Allata kitabu rɔ ko hadama dan ti a to dɔntɛ dɔrɔn ma.” 5 Setanɛ tara a la ka duninya-mansayɛ bɛɛ yira a la nya-kun-kelen. 6 Setanɛ ya a fɔ a ye ko, “N si i sigi kɛ bɛɛ kun na ka nyɔ-gbiliyɛ bɛɛ di i ma bawo wo bɛɛ dinɛ nde le ma. Mɔgɛ min ba diya n ye, n si a bɛɛ di wo ma. 7 Ni i ya i nyɛnkin n kɔrɔ, kɛ bɛɛ si ma itɛ la.” 8 Yisa ya a yabi ko, “A sɛbɛnɛ Allata kitabu rɔ ko, ‘I ni ita Mari Alla kelen pe le bato ka ale kelen peta wɔlɛ kɛ!’ ” 9 Setanɛ tara Yisa la Yerusalɛm soe burɔ ka a sigi Alla Bato Bɔn kun-tɛma-sore kuma. A ya a fɔ a ye ko, “Ni Allala dan le ile la, i gban ka yigi dugi ma 10 bawo a sɛbɛnɛ Allata kitabu rɔ ko Alla si ala melika sɔ i lakanan tinɛ. 11 A sɛbɛnɛ fanan ko anu si anu bole sigi i kɔrɔ alako i kana i kian gbesi kurinu na.” 12 Yisa ya a yabi ko, “A sɛbɛnɛ Allata kitabu rɔ ko i kana ita Mari Alla kɔrɔbɔ.” 13 Setanɛ banta Yisa magbɛrɛnkɛna koe bɛɛ rɔ tumɛ min, a bɔra a fɛ wati-kunduni kɔrɔ. 14 Wo kɔma, Yisa sɛgira Kalili sigisɔn rɔ. Allata Ni Sɛnimɛ ye a fɛ. A mankan nyɛnsɛnta nyamanɛ wo bɛɛ rɔ. 15 A ya nyɔ-mɔgɛnu karan Yahudiyanuna dina-bɔnnu na. Ado anu dama ya a wɔlɔbɔ. 16 Wo kɔma, Yisa tara Nasarɛti soe burɔ, a makolota kan min. Sulen-Tele ma, a wulita ka ta Yahudiyanuna dina-bɔn la iko a duruta a mala nya min. A ya a lasɔ alako a ni Allata kitabu karan anu ye. 17 Anu ya Nɛbi Aiseyala kitabu don a bolo. A ya kan tinɛ wo laka a sɛbɛnɛ kan min ko, 18 “Marita Sɛnbɛ ye n tɔ. A ara n yabɔ alako n ni kibara-nyimɛ lake bolo-kolɔnnu ma. Minnu bi biralɛ rɔ, a ya n sɔ ka wonu boloka-koe fɔ anu ye anubɛ ka fiyɔnnu yɛ laka. Nɔɛ sanɛ minnu kuma, n si wonu hɔrɔya. 19 Mɔgɛnu bi hɔrɔyala san min ma, Mari ya n sɔ ka wo wara-koe fɔ anu ye.” 20 Yisa ya kitabu wo dɛ latogon ka a don a maralɛ bolo. A ya a mayigi. Min bɛɛ ye Yahudiyanuna dina-bɔn wo la, wonu ya anu yɛ sɔ a la. 21 A wulita kumala anu ye ko, “Allata kitabu kan tinɛ kɛ, wo ara bɔ a la bi iko n bara a karan wo ye nya min.” 22 Anu dama ya a tɔgɔ-nyimɛ fɔ ka kawa ala kuma-nyimɛnu ma. Anu ko, “Yusufula dan ma kɛ la, wa? Kɛ mara kama?” 23 Yisa ya a fɔ anu ye ko, “N lanɛ a la serr, ko wo si na tili kɛ tɛgɛ n ye ko, ‘Bɛsi-bɔlɛ, i nyɛrɛ lakɛndɛya.’ Wo si a fɔ n ye fanan ko, ‘Ma ya koe minnu namɔɛn i wara-koe rɔ Kapereniyam soe burɔ, i ni wonu ma i nyɛrɛta soe burɔ yan fanan.’ 24 Wa wo hɛnkili to kɛ ko! Nɛbi ti gbiliyɛ sɔrɔn a nyɛrɛta soe burɔ. 25 “Wo ni wo tole masɔ. Tonyɛ le, Nɛbi Ilayata wati rɔ, kɛɛ-musi siyaman bi Isirɛla mɔgɛnu tɛma nun. Bandɛ ma na san sawa anubɛ a tala tumɛ min, kɔnkɔ-fitinɛ donta dugi wo bɛɛ rɔ. 26 Hali wo, Alla ma Nɛbi Ilaya lata mɔgɔ wo mɔgɔ ma fɔ kɛɛ-musu kelen ma. Isirɛla ka ma musi wo la min siginɛ Saidon Sarɛfati soe burɔ. 27 Nɛbi Ilaisata wati rɔ, fɛrɛma-kirayato siyaman bi Isirɛla mɔgɛnu tɔ. Kɔnɔ wonu fenfen ma kɛndɛya fɔ Siriya kɛ Neyaman. Isirɛla ka ma ale fanan na.” 28 Minnu bi Yahudiyanuna dina-bɔn la, wonu ya wo lamɔɛn tumɛ min, anu diminyara. 29 Anu ya anu nasɔ ka Yisa gben ko a ni bɔ soe burɔ. Anuna soe sɔnɛ kuru-gbilɔn-ba min kuma, anu tara Yisa la nyɔ alako anu ni a labui filon rɔ. 30 Kɔnɔ a tununta nyama ma ka ta a ye. 31 Wo kɔma, Yisa tara Kalili-Kapereniyam soe burɔ. A ke nyɔ, a ya mɔgɛnu karan Sulen-Tele ma. 32 A ya anu karan nya min, anu dama kawara wo ma bawo fanka ye ala kumɛ rɔ. 33 Lunyɛ do, kei do ye Yahudiyanuna dina-bɔn la nun, nyina-yogomɛ ye min fɛ. A gbele-gbelenta ko, 34 “E! Ile Yisa Nasarɛti kɛ, i ye nfen fɛ ma bolo? I nara yan ma halaki koe la, wa? N ya ile lɔn. Allata kilaya sɛnimɛ le ile la!” 35 Yisa ya nyinɛ makuma, a ko, “A sigi-a-la! Bɔ a fɛ!” Nyinɛ ya kei labui anu dama yala. A bɔra a fɛ. A ma a madumɛ hali doni! 36 Mɔgɛ bɛɛ kawara ka a fɔ anu nyɔgɔn ye ko, “Nfen kuma sufa ye kɛ la? Kei kɛ ara kuma nyina-yogomɛnu ma sɛnbɛ anubɛ fanka la. Anu bi bɔla anu fɛ.” 37 Yisa mankan nyɛnsɛnta nyamanɛ wo bɛɛ rɔ. 38 Yisa bɔra Yahudiyanuna dina-bɔn la ka ta Saimon warɛ. Fɛrɛma-kaliya-kirayɛ ye Saimon biran-musi la. Anu ya musi wo wara koe fɔ Yisa ye. 39 Yisa tara a sɔ nyɔ dafɛ a sanɛ kan min. A ya fɛrɛma-kaliyɛ wo makuma. A kɛndɛyara kelenna! A wulita tiriya ka wɔlɛ kɛ anu ye. 40 Tele yigi wati, kirayatoe ye mɔgɛ min bɛɛ bolo kiraya su bɛɛ, anu nara wonu na Yisa wara. A ya a bole sa anu dama kuma ka anu nakɛndɛya. 41 Nyinɛnu fanan gbele-gbelenmatoe bɔra nyinatoenu fɛ, anu ko, “Allala dan le ile la!” Anu ya a lɔn Allata-Mɔgɔ-Yabɔnɛ la min kɛ, Yisa ya a fɔ anu ye ko anu kana kuma. 42 Banda-ka-dɛ ma, Yisa bɔra soe burɔ ka ta a dan na kan tinɛ do rɔ. Mɔgɛnu ya a nyinɛ dabira. Anu ya a yen tumɛ min, anu ya a madiya alako a kana ta. 43 Kɔnɔ a ya a fɔ anu ye ko, “A fɛrɛ sa fɔ n ni Allala mansayɛ kibara-nyimɛ lake soe donu fanan tɔ bawo Alla ya n sɔ wo lela ko la.” 44 Nba, a ya kawandili bɔ Yahudiyanuna dina-bɔnnu na Yudiya nyamanɛ rɔ.
