Luka 21

1Yisa ye Alla Bato Bɔn la tumɛ min, a ya nɔnfulu-tigi donu yen, anu bi anuna kɔ-fannu sala wodi sa tinɛ rɔ nyɔ. 2A ya kɛɛ-musi bolo-kolɔn do fanan yen. A ye wodi-mɛsɛni fila sala a rɔ. 3Yisa ko, “N bi a fɔla wo ye ko kɛɛ-musi bolo-kolɔn kɛ ara min sa, wo kolo doinu bɛɛtɛ ko. 4Bawo doinu ya min sa, anu ya wo bɔ anuna nɔnfulu-wɛ denu tɔ. Kɔnɔ iko ale bolo-kolonyanɛ ye nya min, a ara a beli-fan bɛɛ sa a rɔ.” 5Ala karan dan donu bi kumala nun ka a bɛn Alla Bato Bɔn wara-koe ma. Kuru nyimɛ minnu bi nyɔ, anubɛ mɔgɛnu ya kɔ-fan minnu di Alla ma Bato Bɔnla ko la, anu bi kawala wonu ma. Yisa ko, 6“Wo ye min bɛɛ yenna kɛ la, tumɛ ye nala, kuri kɛnu, hali kelen bɛrɛn ti to a gbɛ rɔ. A bɛɛ ra si nyɛnsɛn.” 7Anu ya Yisa manyinika ko, “Karan-mɔgɔ, kɛ si ma tumɛ nyamintan? Tamasere nyamintan si a yira ma la ko a kɛ-tumɛ ara ke?” 8Yisa ya a yabi ko, “Wo ni a ma wo fɛrɛma. Wo kana sɔn, mɔgɔ wo mɔgɔ ni wo mayuwaya bawo mɔgɔ siyaman si na n tɔgɛ rɔ ka a fɔ ko, ‘Ale le nde la!’ Anu si a fɔ fanan ko, ‘A wati ara ke!’ Kɔnɔ wo kana bila wonu fɛ. 9Wo wa kɛlɛ koenu anubɛ murutiya koenu namɔɛn tumɛ min, wo kana kilan. A fɛrɛ sa fɔ wonu ni ma kɔnɔ ala ban ma wonu na fɔlɔn.” 10Wo kɔma, Yisa ko, “Sibolo gbɛrɛnu si wuli anu nyɔgɔn kan ma. Nyamanɛnu si wuli anu nyɔgɔn kan ma. 11Dugu-yɛrɛyɛran si kɛ anubɛ kɔnkɔ-fitinɛ anubɛ kiraya-fitinɛnu kan tina siyaman tɔ. Ko-makilannɛnu anubɛ tamasere-wɛnu si kɛ san kole rɔ fanan. 12Kɔnɔ yanni koe kɛ bɛɛ ni ma, anu si wo bira ka wo bɛnsɛnkɔninya. Anu si wo ladon Yahudiyanuna dina-bɔnnu na ka wo kiti ka wo mara. Anu si ta wo la mansɛnu anubɛ kun tiginu bara ndela ko la. 13Wo si ma lafɛrɛ la wo ye ka kibara-nyimɛ lake. 14Yanni a wati ni ke, wo ni wo hɛnkili masɔ ko wo si wo nyɛrɛ fɛka nya min, wo kana hɔn wola ko la 15bawo n si kumɛnu don wo da rɔ ka hɛnkili di wo ma. Wo si min fɔ, hali wo yogo kelen ti ke wo sɔsɔla ka wo nɔ. 16Wo sɔrɔnnɛnu wo, wo na kelen nyɔgɛnu wo, wo kebila-nyɔgɛnu wo, wo diyana-mɔgɛnu wo, wonu dama si wo don wo yogenu bolo tɔ. Ado anu si donu faga wo rɔ. 17Bɛɛ si wo kɔn ndela ko la 18kɔnɔ hali wo, wo kun-sigi kelen bɛrɛn ti to-a-rɔ. 19Wo ni wo sɔ yiri bawo wo si ni-bɛrɛ sɔrɔn wo le fɛ. 20“Wo wa Yerusalɛm lafoonɛ yen kɛlɛ dannu na tumɛ min, wo si a lɔn worɔ ko a kasara-tumɛ ara gbɛrɛn. 21Minnu bi Yudiya nyamanɛ rɔ, wonu ni anu buri kɔnkɛnu tɛma. Minnu bi soe burɔ, anu ni bɔ nyɔ rɔ. Minnu bi sɛnɛ rɔ, wonu kana sɛgi soe. 22Wo bɛɛ si ma tɔrɔya-telenu na. Ado Allata kitabu ya min fɔ, wo bɛɛ ni bɔ a la. 23Wo telenu tɔ, gbalo-belebele si na musu-kolomɛnu anubɛ denbɛnu kuma! Gbalo-yogoma-wɛ si na nyamanɛ kɛ rɔ. Allala diminyɛ si na mɔgɛ kɛnu kan ma. 24Donu si faga faan la. Donu si ta yɔɔnyɛ rɔ nyamanɛ bɛɛ rɔ. Sibolo gbɛrɛnu si Yerusalɛm radɔn ha anuta wati ban tumɛ. 25“Tamaserenu si sa tele anubɛ karɛ anubɛ lolenu ma. Duninya-mɔgɛ bɛɛ yigi si tɛgɛ ka kilan kɔgɔ-yi wɔyɔ-kan anubɛ a mɔrɔn-wɛla ko la. 26Min bi nala kɛla duninya bɛɛ rɔ, anu bi wo makɔnɔna. Mɔgɛnu kuma si kɔ ha anu ni kirɔn-a-la bawo san-koleta-sɛnbɛnu ta si maga ka bɔ anu gbɛ rɔ. 27Nba, nde, Hadama dan si bɔ gbɛ rɔ wo wati rɔ. N bi nala banda-fin-gbɛ rɔ sɛnbɛ anubɛ gbiliyɛ ba rɔ. 28Koe kɛnu da wa bira tumɛ min, wo ni wo sɔ gben! Wo ni wo kunyɛnu nasɔ bawo wo kisi-tumɛ ara gbɛrɛn.” 29Wo kɔma, Yisa ya tili kɛ tɛgɛ anu ye. A ko, “Wo ni wo hɛnkili to toro-kuri anubɛ kɔlɔma toe bɛɛ ko. 30Wo wa anu yen anu matiila tumɛ min, wo si a lɔn worɔ ko samɛ ara gbɛrɛn. 31A ye wo nya na le, wo wa koe kɛ bɛɛ yen mala tumɛ min. Wo si a lɔn worɔ ko Allala mansayɛ na-tumɛ ara gbɛrɛn. 32“Wa wo hɛnkili to kɛ ko! Minnu bi anu kɛndɛ la kɛ wati rɔ, yanni wo bɛɛ ni faga, koe kɛ bɛɛ si bɔ a la. 33San kole anubɛ dugu kole si tenbi kɔnɔ nna kumɛ ti tenbi mumɛ! 34“Wo ni a ma wo fɛrɛma wo nyɛrɛla ko la! Wo kana wo nyɛrɛ ma nugulamɛ anubɛ gbɛɛ-minnɛnu na. Wo kana hɔn niyi kɛ koenu na. Ni wo ya wonu ma, tele wo si wo latɛrɛna. 35A si duninya-mɔgɛ bɛɛ latɛrɛna iko gbɛrɛ si soge latɛrɛna nya min. 36Wo ni wo yɛ lakalan ka madiyali kɛ tuma-wo-tuma alako wo ni sɛnbɛ sɔrɔn ka tanka koe kɛ bɛɛ ma minnu si ma. Wo ni sɛnbɛ sɔrɔn alako wo si wo sɔ nde, Hadama dan yakɔrɔ nya min.” 37Tele-wo-tele, Yisa ye mɔgɛnu karanna Alla Bato Bɔn la. Suyi wa ke tumɛ min, a ni ta ki Ɔlifi kɔnkɛ kuma. 38Mɔgɛnu si suri subaga dɛ ma ka ta Alla Bato Bɔn la anu tole masɔ tinɛ a la.

will be added

X\