Luka 17

1Yisa ya a fɔ ala karan dannu ye ko, “Koe minnu si mɔgɛnu nabui hakɛ rɔ, fɔ wonu ni ma. Kɔnɔ min si a ma, a ni bui, gbalo ye wo tigi kuma! 2Yanni a ni denni nɛ kɛ kelen nabui hakɛ rɔ, a fisa wo mɔgɛ ye, kuru-belebele-wɛ ni kiri a kan la ka a lakɛ kɔgɔ-yi dumɛ rɔ. 3Wo ni a ma wo fɛrɛma! “Ni i na kelen nyɔgɛ ya hakɛ kɛ i la, ta a fɔ a ye. A wa i madiya, a makoto. 4Ni a ya hakɛ kɛ i la kinyama wɔrɔnfila tele kelan kɔrɔ, a ni na i wara wo bɛɛ rɔ ko, ‘I yandi, n makoto,’ nba, i ni a makoto.” 5Yisala kilayɛnu ya a fɔ Mari ye ko, “Mala dɛnkɛninyɛ kuma sa.” 6Mari ya anu yabi ko, “Ni wola dɛnkɛninyɛ koloyara ka ke foni kole rɔ, wo si a fɔ toro-kuri kɛ ye ko, ‘I nyɛrɛ wurun dugi rɔ ka ta i sɔ tungban tɛma!’ A si ila kumɛ bira. 7“Ni wɔli kɛlɛ ye wole do bolo min bi sɛnɛ sala, ni wo ma, a ye sagɛnu fɛ-birala, a wa na tumɛ min ka bɔ sɛnɛ rɔ, i ti a fɔ a ye ko a ni a mayigi fen dɔn tinɛ. 8I si a fɔ a ye ko, ‘Ta, nta kima rabɛn fɔlɔn ka wo sigi n kɔrɔ. Wo kɔma, a ni na to a dɔnna.’ 9Mɔgɔ ti baraka bira wɔli kɛlɛ wo ye bawo i ya a sɔ min na, a ara wo le ma. 10A ye wo nya na le wole fanan bolo. Min fɔra wo ye, wo wa wo bɛɛ ma tumɛ min, wo si a fɔ ko, ‘Wɔli kɛlɛ le male la dɔrɔn. Ma ara mala wɔlɛ le dɔrɔn kɛ.’ ” 11Yisa ye tala Yerusalɛm tumɛ min, a tenbira Samariya anubɛ Kalili sigisɔnnu tɔ. 12A ye donna so nɛ do rɔ tumɛ min, kunato mɔgɔ tan ya a labɛn kilɛ la. Anu ya anu mata a la 13ka gbele-gbelen ko, “Ma tigi Yisa! Kinikini ma ma!” 14Yisa ya anu yen tumɛ min, a ya a fɔ anu ye ko, “Wo ta saraka masɔlɛnu bara, anu ni wo lakɔrɔsi.” Anu bi tala tumɛ min, anu dama kɛndɛyara. 15Mɔgɔ kelen de anu tɔ, wo ya a yen tumɛ min ko a ara kɛndɛya, a sɛgira Yisa wara. A ye Alla tantola a kulu mayɛlɛnɛ la. 16A ya a sa dugi ma Yisa kin kɔrɔ ka baraka bira a ye. Ado Samariya kɛ le kei wo la. 17Yisa ya nyinikalɛ kɛ, a ko, “Wo mɔgɔ tan de ma kɛndɛya nun, ba? Mɔgɔ kɔnɔntɔ toe doi don? 18Nfenna anu dama ma sɛgi ka baraka bira Alla ye? Fɔ sundan kɛ dɔrɔn, wo le nara?” 19Yisa ya a fɔ a ye ko, “I lasɔ, i ni ta. Ila dɛnkɛninyɛ ara i lakɛndɛya.” 20Farisi donu ya Yisa manyinika Allala mansayɛ na-tumɛ ma. A ya anu yabi ko, “Allala mansayɛ, fen de wo la i ti min namatoe yen. 21Mɔgɔ ti a fɔ ko, ‘A mafɛlɛn, a ye yan!’ ni wo ma, ‘I ma a yen pan!’ Wo ti yen bawo Allala mansayɛ ye wo burɔ.” 22A ya a fɔ ala karan dannu ye worɔ ko, “Tumɛ wo ye nala, nde, Hadama dan na-wati-sɔgɛ si wo bira kɔnɔ hali tele kelen, wo ti wo yen! 23Donu si a fɔ wo ye ko, ‘A mafɛlɛn pan, a ye nyɔ!’ ni wo ma, ‘A mafɛlɛn yan, a ye yan!’ Kɔnɔ wo kana ta n nyini tinɛ. 24Iko bandɛ si a nyin masɔgɔ san kolo tɔnkɔn kelan rɔ ha ka malan a tɔnkɔn doi rɔ nya min, nde, Hadama dan si na wo nya na le. 25Kɔnɔ fɔ n ni tɔrɔyɛ sɔrɔn fɔlɔn bɛrɛkɛ! Ado bi-mɔgɛnu si anu ban n na. 26Nde, Hadama dan ta wati si ma iko koe minnu kera Nowata wati rɔ. 27Bɛɛ tora fen-dɔn-kɛla ka anu min, keinu ya musinu furu, musinu tara kei-wara-sigi rɔ. Anu tora wo bɛɛ mala ha Nowa donta kulɔn rɔ lunyɛ min. Nba, yi nara ka anu damasi kasara. 28A si ma fanan iko a mara nya min Lɔtila wati rɔ. Bɛɛ tora fen dɔn la ka anu min. Anu bi yilayɛ kɛla ka sɛnɛ sa anubɛ ka bɔnnu sɔ. 29Lɔti bɔra Sɔdɔm soe burɔ lunyɛ min, tɛ anubɛ munku-gbɛ yigira ka bɔ san kole rɔ ka anu dama halaki. 30A si ma wo nya na le fanan nde, Hadama dan wa bɔ gbɛ rɔ lunyɛ min. 31“Ni wo tele ya a taran, i ye bɔn kuma, i kana don bɔn la i bolo-fannu bi tinɛ. A ye wo nya na le fanan, ni wo tele ya i taran ila sɛnɛ rɔ, i kana sɛgi bɔn la tun. 32Ado min mara Lɔtila musi la, wo ni wo hɛnkili lamiri wo ma! 33Mɔgɔ wo mɔgɔ min ba a raya ka a nyɛrɛ niyi lakisi, wo si bɔnɔ a rɔ. Mɔgɔ wo mɔgɔ min ba bɔnɔ a niyi rɔ, wo si a sɔrɔn. 34N bi a fɔla wo ye, su kelan wo rɔ, mɔgɔ fila si taran kinɔgɔla kan-tina-kelen, kelen si bi, doi si to. 35Musu fila si taran fen tugula anu nyɔgɔn fɛ, kelen si bi, doi si to. [ 36Kei fila si taran sɛnɛ rɔ, kelen si bi anu tɔ, doi si to.”] 37Karan dannu ya Yisa manyinika ko, “Mari, kɛ si ma mintɔ?” Yisa ya anu yabi ko, “Suyi taranta kan min, dogɛnu si anu nadɛn nyɔ le.”

will be added

X\