Luka 16

1Yisa ya a fɔ ala karan dannu ye ko, “Nɔnfulu-tigi do ye nyɔ nun, a ya mɔgɛ do sigi kun-tigiyɛ la. Anu ya a fɔ nɔnfulu-tigi wo ye ko, ‘I ya kun tigi min sigi, a ye ila wodi tinyana kɔɔ!’ 2A ya a kele bɔn la ka a manyinika ko, ‘N bara min namɔɛn ila ko rɔ kɛ la, wo ye kama? N ya nɔnfuli yirika min don i bolo, i ni dantɛgɛ-kɛdi di n ma bawo ile ti ma kun tigi la n ye tun!’ 3Ale kun tigi ya a fɔ a nyɛrɛ ye ko, ‘N tigi ye n boloka tinɛ le kɛ la. N si nfen ma gbɛ? Sɛnɛ-sa-sɛnbɛ sa n bolo ado n si miliya ka tarali kɛ. 4N bi min mala, n bara wo lɔn de gbɛ! A wa n boloka wɔlɛ la tumɛ min, n si n diyana-mɔgɛnu sɔrɔn minnu si n tabira anu barɛ.’ 5“Woletɔ a tigila yili ye mɔgɛ min bɛɛ la, a ya wonu kele. A ya a fɔ a fɔlɔtɛ ye ko, ‘N tigila yili min bi i la, nfen nyɔgɔn?’ 6A ya a yabi ko, ‘Tulu durɔmu kɛmɛ.’ Nba, kun tigi ko, ‘Ila yili-kɛdi le kɛ la. I sigi ka bi-loli sɛbɛ tiriya!’ 7A ya a fɔ doi ye fanan ko, ‘Ile don, yili ye ile bolo?’ A ya a yabi ko, ‘Fui-fan bɔrɔ kɛmɛ nani.’ Nba, kun tigi ya a fɔ a ye ko, ‘Ila yili-kɛdi le kɛ la. Kɛmɛ sawa ani mogan sɛbɛ.’ 8“Kun tigi kensunte kɛ tigi ya a matɔgɔ halliyɛ su wola ko la bawo duninya-kɛ-mɔgɛnu halliyanɛ anuna koenu tɔ ka tenbi wonu na minnu bi waantɛ la.” 9Yisa ya a fɔ ko, “N bi a fɔla wo ye, wo ni wo diyana-mɔgɛnu nyini wo nyɛrɛ ye duninya-nɔnfuli rɔ, woletɔ ila nɔnfuli wa ban tumɛ min, Alla si wo rabira a warɛ Arinyɛni tɔ! 10Minnu telennɛ ko-mɛsɛnu tɔ, wo si lanayɛ kɛ ko-wɛnu fanan tɔ. Min kensunyanɛ ko-mɛsɛnu tɔ, wo si kensunyɛ kɛ ko-wɛnu fanan tɔ. 11Ni wo ma lanayɛ kɛ duninya-kɛ-nɔnfuli la, yon si la wo la nɔnfuli bɛrɛla ko la? 12Ni wo ma lanayɛ kɛ mɔgɛ doinutɛ la, Alla si ke itɛ dila i ma kama? 13“Wɔli kɛlɛ ti ke wɔlila tigi fila ye wati kelan rɔ. Ni a ya wo ma, kelen si diya a ye, kelen si gboya a ye. A si kelan gbiliya ka kelan lafɛya. Wole fanan bi wo nya na le. Wo ti Alla anubɛ nɔnfuli nyini nya-kun-kelen.” 14Farisinu ya kɛ bɛɛ lamɔɛn tumɛ min, anu ya Yisa mayɛlɛn bawo wodi di anu ye kati! 15Yisa ya a fɔ anu ye ko, “Minnu bi anu nyɛrɛ yen-nya rabɛnna mɔgɛnu yala, wole le wonu na kɔnɔ Alla ya wo burɛ lɔn. Ado mɔgɛ ye a mirila min ma ko a kolo, kisimiriya koe le wo la Alla yala. 16“Alla ya tɔn minnu di Musa ma wo, nɛbinu ya kɛdi minnu sɛbɛ wo, mɔgɛnu bi anu tole masɔla wonu na nun ha Yɔni-Batasi-Kɛlɛta wati ma. Kɔnɔ kebi wo tumɛ, mɔgɛnu bi anu tole masɔla Allata mansaya-kibara-nyimɛ la. Mɔgɛ bɛɛ ye a rayala ka don a rɔ. 17Kɔnɔ iko san kole anubɛ dugu kole kɛ ti ban nya min, hali tɔn kɛ nyantarani kelen bɛrɛn ti ban worɔ. 18“Kei min ba ala musi boloka ka dogbɛrɛ furu, wo ara yɛlɛnyɛ kɛ. Ado kei min ba musu bolokanɛ wo furu, wo fanan bara yɛlɛnyɛ kɛ. 19“Nɔnfulu-tigi do ye nyɔ nun min fɛrɛya bɔnɛ kura-da-gbɛlɛnu na. Tele-wo-tele, a si to dɔn-fen-nyimɛ dɔnna. 20Bolo-kolɔn do ye nyɔ fanan nun, a tɔgɛ Lasarasi. Tɛlɛ ye a fɛrɛ mumɛ bɛɛ ma. Anu si na a la nɔnfulu-tigila bonda-dɛ la tuma-wo-tuma, 21fɔsɔkɔrɛ dɔn-fen-pɛrɛnɛ minnu bi buila nɔnfulu-tigila tebulu kɔrɔ, a si wonu dɔn. Wulinu fanan bi ala tɛlɛnu dɛ ranɛɛla. 22“Bolo-kolɔn wo fagara. Melikanu tara a la Iburayima tɔgɔfɛ Arinyɛni tɔ. Nɔnfulu-tigi fanan fagara. Anu ya a togon. 23Ale nɔnfulu-tigi ye tɔrɔyɛ rɔ lakira. A ya a yɛ layɛlɛ ka Iburayima yen wulɛ la, ado Lasarasi ye ale Iburayima tɔgɔfɛ. 24Woletɔ a gbele-gbelenta, a ko, ‘N fa Iburayima! Kinikini n ma. I ni Lasarasi sɔ alako a ni a bolo-nɔlɔnɛ don yi rɔ ka n nagan makima bawo n bi duma ba rɔ tɛ kɛ burɔ.’ 25“Kɔnɔ Iburayima ko, ‘Nna dan, i miri fɔlɔn. I kɛndɛ tumɛ min, i ye fen-nyimɛ bɛɛ sɔrɔnna kɔnɔ wati wo rɔ, Lasarasi kɛ ye fen-nɔgɔnɛnu gbansan sɔrɔnna. Nba kaka, ale le ye sewɛ la yan, ile ye dumɛ rɔ. 26Ka tenbi wo bɛɛ la, denka filun bɛ ye male anubɛ ile tɛma. Ado ni minnu bi a fɛ ka bɔ yan ka ta i wara nyɔ, wonu ti ke tala nyɔ. Mɔgɔ ti ke bɔla i warɛ nyɔ fanan ka na male warɛ yan.’ 27Nɔnfulu-tigi ko, ‘Nba, n fa, n bi i madiyala, i ni Lasarasi sɔ. A ni ta n fala bɔn la. 28N na kelen nyɔgɛ mɔgɔ loli ye nyɔ. A ni ta ka anu makawandi alako anu kana na tɔrɔya su kɛ rɔ yan.’ 29“Iburayima ko, ‘Nɛbi Musa anubɛ nɛbi doinu bi i na kelen nyɔgɛnu bolo nyɔ ka anu makawandi. I na kelen nyɔgɛnu ni anu tole masɔ wonu na.’ 30Nɔnfulu-tigi ya a sɔsɔ. A ko, ‘N fa Iburayima, wo ti a bɔ! Kɔnɔ ni mɔgɛ do wulita ka bɔ furinu tɛma ka ta anu makawandi, anu si yɛlɛma ka tubi.’ 31Kɔnɔ Iburayima ko, ‘Ni anu ti anu tole masɔ Nɛbi Musa anubɛ nɛbi doinu na, hali ni mɔgɛ do wulita ka bɔ furinu tɛma ka ta anu makawandi, anu ti la a la.’ ”

will be added

X\