Luka 15

1Wati do, duti-makelelɛnu anubɛ Alla batobɛlɛ siyaman nara ka anu tole masɔ Yisa la. 2Farisinu anubɛ tɔn-karan-mɔgɛnu wulita gbunyala ko, “Kei kɛ ye Alla-batobɛlɛnu tabirala ka fen-dɔn-kɛ anu fɛ!” 3Woletɔ Yisa ya tili kɛ sa anu ye ko, 4“Saga kɛmɛ ye wole min bolo, ni wo kelen tora-a-rɔ, saga tigi si nfen ma? A si saga bi-kɔnɔntɔ ani kɔnɔntɛ wonu to gbɛkole ma ka ta saga-tununɛ wo nyini ha a ni a yen. 5A wa a yen tumɛ min, a si sewa ka a sigi a kan ma 6ka sɛgi a la a warɛ tun. Ni a kera nyɔ, a si a diyana-mɔgɛnu anubɛ a sigi-nyɔgɛnu nadɛn anu nyɔgɔn fɛ ka a fɔ anu ye ko, ‘Wo na, ma ni sewa ma nyɔgɔn fɛ bawo nna saga min tora-a-rɔ, n bara a yen!’ 7N bi a fɔla wo ye, hakɛ tigi kelen ba tubi, sewɛ si kɛ Arinyɛni tɔ wo kelenna ko la ka tenbi mɔgɔ-telennɛ bi-kɔnɔntɔ anubɛ kɔnɔntɛ la minnu miriya ko anu mako sa tubi koe la. 8“Ni wodi-mɛlɛn tan ye musi do bolo, kelen ba to-a-rɔ a ma, a si nfen ma? A si lɛnpu lamalan ka ala bɔn firan a nyini tinɛ ha a ni a yen. 9A wa a yen tumɛ min, a si a diyana-mɔgɛnu anubɛ a sigi-nyɔgɛnu nadɛn anu nyɔgɔn fɛ ka a fɔ anu ye ko, ‘Ma ni sewa ma nyɔgɔn fɛ bawo nna wodi-mɛlan min tora-a-rɔ, n bara a yen!’ 10N bi a fɔla wo ye, hakɛ tigi kelen ba tubi, Allala melikanu si sewa wo nya na le.” 11Yisa tora kumala, a ko, “Kei do ye nyɔ nun, den kei fila ye a bolo. 12A dɔgɔmɛ ya a fɔ a fa ye ko, ‘N fa, ila fen-kolomɛnu fara ka ntɛ di n ma gbɛ!’ A fa ya ala fen-kolomɛnu fara ala den filɛ tɛma. 13A ma mɛ, a dɔgɔmɛ ya ata fen-kolomɛ wonu fere wodi la ka ta a ye. A tara nyamanɛ gbɛrɛkɛ rɔ pon! A ke nyɔ, a ya ala wodi bɛɛ kasara yabatoyɛ la. 14A ya a bolo-fan bɛɛ ban. Wo kɔma, kɔnkɔ-fitina-belebele nara nyamanɛ wo rɔ. Fenfen sa a bolo tun. 15Woletɔ a tara sigi duguran do fɛ. Wo ya a lata gbɛkole ma kɔsɛnu fɛ-bira tinɛ. 16Bɛɛ ya a bɛn dɔn-fan la. Ado kɔsɛnu bi sɔsɔ-fɔrɔn min dɔnna, kɔnkɛ ya a bira ha sɔsɔ-fɔrɔn wo dɔn-sɔgɛ ya a bira. 17Tɔ-a-la, a ya a hɛnkili masɔ. A miriya tara a fala wɔli kɛlɛnu ma. Wonu bi fen dɔnna, anu ti a ban kɔnɔ ale ye fagala nyɔ kɔnkɛ bolo! 18A ko a ni sɛgi a fa wara ka a fɔ a ye ko, ‘N fa, n bara hakɛ kɛ Alla anubɛ ile fanan na. 19A ma bɛn tun i ni n kele ko ila dan. I ni n ma iko ila wɔli kɛlɛ do.’ 20Nba, a wulita ka sɛgi a fa wara. “Yanni a ni ke nyɔ, a fa ya a yen nala wula-yan la. A yisi fara kinikinɛ la. A ya a buri ka a bole mini ala dan kan ma ka a sunbu. 21Ala dan ko, ‘N fa, n bara hakɛ kɛ Alla anubɛ ile fanan na. A ma bɛn tun i ni n kele ko ila dan.’ 22Kɔnɔ a fa ya ala wɔli kɛlɛnu kele. A ko, ‘Wo ni na duruku-nyima-ba la ka a bila a kan na tiriya! Wa dɛɛn don a bolo-nɔlɔnɛ la ka sanbarɛ don a kian rɔ. 23Wo ta ninki-den-tɔlɔnɛ faga. Ma ni ladiyɛ ladan ka sewa 24bawo nna dan kɛ ara faga nun kɔnɔ kaka, a ye a niyi la. A tonɛ-a-rɔ nun kɔnɔ kaka, n bara a yen.’ Nba, anu ya ladiyɛ kɛ a kilɛ fɛ. 25“Wo wati ya a taran, dan wo kɔrɔ keminɛ ye sɛnɛ rɔ nun. A sɛgimatoe, a gbɛrɛnta bɔn ma tumɛ min, a ya tolon-kan anubɛ dɔn-kɛ-kan lamɔɛn. 26A ya wɔli kɛlɛ do manyinika ko, ‘Nfen mara?’ 27Wɔli kɛlɛ wo ya a yabi ko, ‘I dɔgɛ ara na. I fa ara ninki-den-tɔlɔnɛ faga bawo a ara ala dan yen tun, a kɛndɛ, a ye a niyi la.’ 28“A kɔrɔ diminyara bɛrɛkɛ! A ma sɔn ka don bɔn la woletɔ a fa bɔra ka a madiya ko a ni don. 29A ya a fɔ a fa ye ko, ‘I yɛ lana. San mumɛ kɛ bɛɛ kɔrɔ, n bi wɔlila i kɔrɔ iko yɔɔn. N ma ila kumɛ tinya hali kelen. I ya nfen di nde ma? Hali baa, i ma a di nde ma alako mabɛ n diyana-mɔgɛnu ni sewa ma nyɔgɔn fɛ! 30Kɔnɔ ila dan kɛ min bara ila nɔnfuli bɛɛ tinya yɛlannu fɛ, wo ara na min kɛ tun, i wara ninki-den-tɔlɔnɛ faga wo ye!’ 31A fa ya a fɔ a ye ko, ‘Nna dan, ile ye n dafɛ wati bɛɛ. Ntɛ bɛɛ, itɛ le. 32Kɔnɔ a bɛnta ma sewanɛ ni ladiyɛ kɛ bawo i dɔgɔ faganɛ le nun kɔnɔ kaka, a ye a niyi la. A tonɛ-a-rɔ nun kɔnɔ kaka, ma ara a yen tun.’ ”

will be added

X\