1 Mɔgɔ waga siyaman nadɛnta anu nyɔgɔn fɛ ha anu tora anu nyɔgɔn matenna. Yisa kumara ala karan dannu fɔlɔn ye ko, “Wo ni a ma wo fɛrɛma Farisinuna biredi-yɛlɛ-fanla ko la. N bi min ma, wo le anuna kolandiyɛ la. 2 Fan min dogonnɛ, wo si bɔ gbɛ ma. Gbundu koe bɛɛ si na lɔn. 3 Wo ara min fɔ pinpi rɔ, wo la si mɔɛn gbɛ rɔ. Wo ara wɛwɛ-kumɛ min bɛɛ fɔ wola kankannu kɔma, wo la si wanka ka bɔ bɔn kun tɛma. 4 “N diyana-mɔgɛnu, n bi a fɔla wo ye, minnu si fɛrɛ-bɔnkɛ kɛ faga dɔrɔn ka dan wo ma, wo kana kilan wonu na. 5 Wo ni kilan min na, n si wo yira wo la. Wo ni kilan Allatala la bawo sɛnbɛ ye a bolo ka wo niyi bi, wo kɔma, a ni wo lakɛ nyahanama rɔ. Ɔnde, n bi tonyɛ le fɔla wo ye, wo ni kilan wo la! 6 “Serelan loli ti san wodi-mɛlɛn fila la, wa? Kɔnɔ hali wo, kelen sa anu tɔ Alla nyinanɛ min ko. 7 Hali wo kun-sigi dannɛ kelen-kelanyɛ ma Alla bolo. Woletɔ wo kana kilan. Wo tenbira serelan siyaman na! 8 “N bi tonyɛ fɔla wo ye, min ba a sɔn a la gbɛ rɔ ko ntɛ le ale la, nde, Hadama dan si wo nyɔgɔn ma ale fanan ye Allala melikanu yala. 9 Kɔnɔ min ba a ban nde la gbɛ rɔ ko nta ma ale la, nde, Hadama dan si n ban ale fanan na Allala melikanu yala. 10 “Min ba kuma-yogomɛ fɔ nde, Hadama dan ma, wo ma si koto. Kɔnɔ min ba kuma-yogomɛ fɔ Allata Ni Sɛnimɛ ma, wo ma ti koto mumɛ! 11 “Anu ba ta wo la Yahudiyanuna dina-bɔnnu na tumɛ min ka wo niyi ragbɛrɛn, ni wo ma, kun tiginu yakɔrɔ, ni wo ma fanan, mansɛ yakɔrɔ, wo si wo nyɛrɛ fɛka nya min wo, wo si min fɔ wo, wo kana hɔn wonu na. 12 Bawo a kakɛn, wo ni min fɔ wati kelan wo rɔ, Allata Ni Sɛnimɛ si wo karan wo la.” 13 Mɔgɛ do ya a fɔ a ye nyama tɛma ko, “Karan-mɔgɔ, a fɔ n na kelen nyɔgɛ ye ko ma fa ya nɔnfuli min to ma bolo, a ni wo fara ka ntɛ di n ma.” 14 Yisa ya a fɔ a ye ko, “N bɔ, yon ya wo sɛnbɛ di n ma ko n ni ma kiti-tɛgɛlɛ anubɛ fen-faralɛ la wo filɛ tɛma?” 15 Wo kɔma, a ya a fɔ anu dama ye ko, “Wo ni a ma wo fɛrɛma wasabɛlɛnuna ko la bawo mɔgɔ niyi ti suma ka a bɛn a bolo-fannu ma, hali a bananyara nya bɛɛ ma.” 16 Wo kɔma, Yisa ya tili kɛ tɛgɛ anu ye ko, “Dugu lamonɛ taranta nɔnfulu-tigi do bolo minna ki-fannu sabatinɛ bɛrɛkɛ! 17 A wulita a mirila a nyɛrɛ ma ko, ‘Dinkira sa n bolo n si nna ki-fan bɛɛ lamara kan min. N si nfen ma?’ 18 A ya a fɔ a nyɛrɛ ye ko, ‘N si min ma, wo le kɛ la. N si nna fen-namara-bɔnnu wayan ka a kinama wɛnu sɔ. N si nna fui-fan anubɛ nna bolo-fan toe bɛɛ mara nyɔ rɔ. 19 Wo kɔma, n si a fɔ n nyɛrɛ ye ko, “Nde harayɛgɛ-tigi, n mako ye fen nyimɛ min bɛɛ la san siyaman kɔrɔ, n bara wo bɛɛ sɔrɔn. N ni n sigi n fanbolo fen dɔn tinɛ ka n min gbɛɛtorenu fɛ ka n nyɛrɛ lasewa!” ’ 20 Kɔnɔ Alla ya a fɔ a ye ko, ‘Ile kuntan, bi suyi nyɛrɛ rɔ, wobɛ i niyi si fara wo nyɔgɔn na. Wo kɔma, i wara fan minnu namara i nyɛrɛ ye, wonu si ma yontɛ la gbɛ?’ ” 21 Yisa ko, “Min bɛɛ ye nɔnfuli ladɛnna anu nyɛrɛ ye, a ye wo nya na le wonu ye fanan. Kɔnɔ nɔnfulu-tigi ma anu na Alla yala.” 22 Wo kɔma, Yisa ya a fɔ ala karan dannu ye ko, “N ya a fɔ wo ye ko wo makoe ye fan min bɛɛ la, a mara dɔn-fen la wo, a mara fɛrɛya-bɔ la wo, wo kana hɔn wonuna ko la. 23 Niyi ma tenbi dɔn-fan la, wa? Fɛrɛ-bɔnkɛ ma tenbi fɛrɛya-bɔɛ la, wa? 24 Wo ni mansa-wala-konanu mafɛlɛn. Anu ti sugi fui. Anu ti a tɛgɛ. Anu ti a kɛ fen-namara kan tinɛnu tɔ, ni wo ma, birɛ la. Kɔnɔ Alla ye anu dama kandanna! Wole don? Wo ma tenbi konanu na, wa? 25 Yon bi wo tɛma min si hɔn ha a ni san do sa a nyɛrɛ siyi kuma? 26 Ni wo ti ke ko-nyantarani wonu mala, nfenna wo haminyanɛ fan-toe bɛɛla ko la? 27 Wo ni kɔn-ferenu sabati-nya mafɛlɛn. Anu sa wɔlila ka anu nyɛrɛ fɛrɛya bɔ. Kɔnɔ n bi a fɔla wo ye, hali Mansa Silamɛni min bananyara nun, a makiri-nya ma ke kɔn-fere kɛ kelen tɔ. 28 Binyɛ don? A ye tola watini dɔrɔn, wo kɔma tɛ ni a mintan. Alla min bi binyɛ wo fɛrɛya bɔla, a ti wole fanan fɛrɛya bɔ wo nya na, wa? Wola dɛnkɛninyɛ dɔgɔ de! 29 “Nba, wo kana hɔn ka a fɔ ko i si dɔn-fan anubɛ minni-fan sɔrɔn mintɔ? 30 Hali Alla-lɔnbɛlɛnu bi nyinina fan kɛnu ma tuma-wo-tuma kɔnɔ wo Fa Alla ya a lɔn ko wo makoe ye fan kɛ bɛɛ la. 31 Min fisa, wo ni Allala mansayɛ fɔlɔn nyini. Wo kɔma, ale ni na to fan kɛ bɛɛ dila wo ma. 32 “Wole, nna saga-kurun-nɛ, wo kana kilan bawo wo Fa fonde ara sa ka mansayɛ di wo ma. 33 Wo ni wo bolo-fan bɛɛ mayira ka wodi wo di bolo-kolɔnnu ma. Wo ni wodi-bɔrɛnu kara wo nyɛrɛ ye wo si wola wodinu namara minnu tɔ Arinyɛni tɔ. Woe sa anu ma. Fen ti bɔ wola wodinu na. Kankan ti ke a kankanna nyɔ. Kisinu ti a dɔn nyɔ. 34 Ado mɔgɔla nɔnfuli ye kan min, a hɛnkili ye nyɔ tuma-wo-tuma. 35 “Koe minnu bi nala mala, wo ni wo rabɛn wo bɛɛla ko la. Wo ni wo mabɛn! Wola lɛnpunu malannɛ ni to 36 iko wɔli kɛlɛ minnu bi anu tigi makɔnɔna ka bɔ kɔnyɔ-masɔ-ladiyɛ rɔ. A wa na tumɛ min ka bonda-dɛ matugu, anu si a laka a ye tiriya! 37 Wɔli kɛlɛ minnu tigi si anu taran, anu tabɛnnɛ, anu bi anu ya la, a si sewa anu na! Wa wo hɛnkili to kɛ ko! A si anu nasigi ka a nyɛrɛ mabɛn wɔli kɛ koe la anu ye. 38 Hali a ma na ha suyi tɛma, ni wo ma, banda-ka-dɛ ma, ni a ya anu tabɛnnɛ taran, a si sewa wonu na. 39 Wo ni wo hɛnkili to kɛ ko! Ni bon-tigi ya kankan na-wati lɔn ala bɔn la, a ti sɔn kankan ni ala bɔn tinya ka don. 40 Wo fanan tabɛnnɛ ni taran wo nya na le bawo wo hɛnkili sa nde, Hadama dan na-koe ma tumɛ min, n bi nala tumɛ wo le tɔ, yɔ!” 41 Pita ko, “Mari, i ye tili kɛ fɔla male ye, ka, i ye a fɔla mɔgɛ bɛɛ le ye?” 42 Mari ya a yabi ko, “Wɔli kɛlɛ latelennɛ anubɛ hɛnkilimɛ ye yon na wo tɛma? Ale le wo la, min tigi si a sigi wɔli kɛlɛnu kun na alako a ni anuna dɔn-fan di anu ma a wati bɛnnɛ rɔ. 43 Bon-tigi wa sɛgi a warɛ tumɛ min, ni a ya ala wɔli kɛlɛ taran wɔlila, a si sewa wɔli kɛlɛ wo la. 44 Wa wo hɛnkili to kɛ ko! Wɔli kɛlɛ wo tigi si a sigi a bolo-fan bɛɛ kun na. 45 Kɔnɔ ni wɔli kɛlɛ ya a fɔ a nyɛrɛ ma ko, ‘N tigi sa nala fɔlɔn,’ wo kɔma, a ni wuli wɔli kɛla keimɛ anubɛ a musumɛnu gbesila ka fen dɔn ka a min koikoi ha a hɛnkili ni tinya, 46 nba, wɔli kɛlɛ wo tigi si na wulɔn tele le ma, yɔ! Ado a hɛnkili sa tele wo ko, a ma a na-wati lɔn mumɛ! A tigi si a ratɛgɛtɛgɛ ka anubɛ lanayabɛlɛnu don kan-tina-kelen. 47 “Wɔli kɛlɛ min ya a tigi diyana koe lɔn bɛrɛkɛ, ado a ma a nyɛrɛ rabɛn ka wo ma, wo si gbeseli-belebele sɔrɔn. 48 Kɔnɔ wɔli kɛlɛ min ma a tigi diyana koe lɔn, ni wo ya koe do ma, a si gbeseli sɔrɔn minna ko la, a ti gbeseli siyaman sɔrɔn. Fen siyamɛ dinɛ minnu ma, fen siyaman ma si kele wonu bolo. Fen-siyaman-wɛ dinɛ minnu ma, a siyaman-wɛ ma si kele wonu bolo. 49 “N nara ka tɛ tugu duninya kɛ rɔ. Ado ni n ya tɛ-tugunɛ taran nun, wo si diya n ye nun! 50 N bi nala ko-gbɛlɛmɛ do sɔrɔnna. Fɔ n ba dumɛ siyaman sɔrɔn yanni a ni to banna. 51 Wo yili ye a ma ko n nara yisi-kimɛ la duninya rɔ, wa? N bi tonyɛ fɔla wo ye, yisi-kimɛ ti na fɔ dan-nafarɛ. 52 Ka a dabira bi ma, ni mɔgɔ loli le taranta bon kelan la, dan-nafarɛ si na anu tɛma ndela ko la, sawɛ si taran filɛ kan ma, filɛ si taran sawɛ kan ma. 53 Den keinubɛ anu fanu si taran anu nyɔgɛnu kan ma. Dunmusinubɛ anu nanu si taran anu nyɔgɛnu kan ma. Mama-musunɛnubɛ anu mamanu si taran anu nyɔgɛnu kan ma.” 54 Yisa ya a fɔ anu ye fanan ko, “Wo wa banda finyɛ yen wulila tele-yigi-wara la tumɛ min, wo si a fɔ kelenna ko, ‘Bandɛ ye nala bi.’ Ado wo si na. 55 Wo wa fɔnyɔ yen bɔla dugula wara la tumɛ min, wo ko, ‘Wusi ye nala bi.’ Ado wo si na. 56 Wole kolandinu! Wo wa dugu kole anubɛ san kole mafɛlɛn, wo si ke a lɔnna tele wo si ma nya min kɔnɔ nfenna wo ti ke wati kɛ kɔrɛ faranfasila? 57 “Nfenna wo ti kiti latelennɛ tɛgɛ wo nyɔgɔn tɛma? 58 Ni wobɛ mɔgɔ kumara, a ni ta i la kiti-tɛgɛ-bɔn la. Wo tamatoe, i raya ka koe wo ban wo tɛma, woletɔ a ti ta i la nyɔ rɔ. Ni wo ma, kiti-tɛgɛlɛ si i don i maralɛ bolo. Wo fanan si i sa yele la. 59 N bi tonyɛ fɔla i ye, i ti bɔ nyɔ ni! Fɔ i ni yili wo bɛɛ sara feu!”
