Yude 1

1Nde, Yude le ye kɛdi kɛ sɛbɛla, Yisa Kirasitila wɔli kɛlɛ, Yemesi dɔgɔ-keminɛ kɔni. Alla ara wole min kele, n bi a sɛbɛla wole le ma. Wo tonɛ n Fa Allala keninteyɛ rɔ, ado wo maranɛ Yisa Kirasiti ye. 2Alamɛ kinikinɛ anubɛ yisi-kimɛ anubɛ keninteyɛ mara wotɛ la ka wara wo bolo. 3N diyana-mɔgɛnu, a sɔgɛ ye n na bɛrɛkɛ ka kɛdi sɛbɛ wo ma nun ka a tɛgɛ kisi-koe ma kɔnɔ n ko a bɛnnɛ n ni kɛdi gbɛrɛkɛ sɛbɛ wo ma kaka. N bi wo makawandila ko Alla ara ban dɛnkɛninyɛ min dila ala mɔgɛnu ma, wo ni kɛlɛ kɛ wola ko la. 4Ado Alla-lɔnbɛlɛ donu bara basan ma la kewuyɛ la anu bolo. Anu bi a fɔla ko kinikinɛ ye Alla rɔ min kɛ, anu si ko-sufa-bɛɛ ladan, Alla ti anu yiliki. Anu ya anu ban Yisa Kirasiti la, ma tigi anubɛ Mari kelen pe kɔni. Anu bara yilikiyi min sɔrɔn, Allala kitabu ya wola koe fɔ kebi fɔlɔ. 5Hali wo ya koe kɛ bɛɛ lɔn, n bi a fɛ ka wo hɛnkili bila wola ko la. Alla ya Isirɛla mɔgɛnu kisi ka anu bɔ Iyipiti nyamanɛ rɔ kɔnɔ wo kɔma, a ya wonu halaki minnu dɛnkɛninyani ma a ma. 6Wo ni wo hɛnkili to melikanu fanan ko. Wo donu ma to anuna sɔ tinɛnu tɔ, fɔ ka anu ban anu nyɛrɛ sɔ tinɛ la. Alla ara wonu mara pinpi rɔ dugu kɔrɔ habadan-yɔlɔkɛ la. Anu si yiliki tele min ma, anu maranɛ wo tele makawanɛla ko la. 7Wo ni wo hɛnkili to Sɔdɔm anubɛ Kɔmɔra anubɛ anu dafɛ-soenu ko. Nyɔ-mɔgɛnu ya a ma iko melikanu ya a ma nya min. Anu ya yɛlɛnyɛ su kɛ min ma daga mumɛ! Anu bi tɔrɔla habadan-tɛ le tɔ alako anu ni ma misali-bɛrɛ la mɔgɛ bɛɛ ye. 8Foninya-karan-mɔgɔ kɛnu fanan bi ko-rayirɛ kɛla wo nya na le. Wonu bi anu nyɛrɛ bagbuyi latinyana. Anu bi Allala sɛnbɛ lafɛyala ka kuma-yogomɛ fɔ gbiliya-tiginu ma minnu bi san kole rɔ. 9Hali melika-kun-tigi Maikali ma wo ko su kɛ anubɛ Setanɛ ye kɛlɛla Musa furi kuma tumɛ min. Hali wo, Maikali ma sɔn Setanɛ mɔɛnna fɔ ka a fɔ ko, “Mari ni i makuma!” 10Kɔnɔ hali mɔgɛ kɛnu ma min lɔn, anu si wo lafɛya. Min ba na anu kunyɛ rɔ, anu bi wo le mala iko firarɔ-sogenu. Ado koe wonu nyɛrɛ le ye anu halakila. 11Gbalo ye anu ma! Anu bara bila Kenta kilɛ fɛ. Anu bara anu nyɛrɛ di ko-yogomɛ ma wodila ko la iko Belam ya a ma nya min. Anu bara halaki murutiyɛ rɔ iko Kora murutiyara nya min. 12Wole denkɛninya-mɔgɛnu ba bɛn fen dɔn tinɛ, mɔgɛ kɛnu manyimanɛ wo tɛma. Anu bi hɔnna anu nyɛrɛ le dɔrɔn na anuna milibɛlitaya-fen-dɔn la anu bolo. Anu manɛ iko fɔnyɔ siginɛ banda-finyɛ min kɔrɔ. Anu manɛ iko kɔlɔma minnu ti gbɔ mumɛ, hali anu gbɔ-tumɛ kenɛ. Anu manɛ iko kɔlɔma minnu suli labɔnɛ dugi rɔ feu! Anu bara faga don! 13Anu manɛ iko kɔgɔ-yi tenbi tugula a rɔ. Anu bi miliya-kɛwɔlɛnu sala gbɛ ma iko yi-kanfɛ. Anu manɛ fanan iko lolo min bi tɛgɛla a la san ma. Alla ara pinpi-fin-bɛ mara mɔgɛ kɛnu ye tɛban! 14Ma benba Hadama bɔnsɔn wɔrɔnfila nyɔgɛ, n fa Inɔki kɔni, wo ya wɔlɔyiyɛ kɛ foninya-karan-mɔgɔ wonuna ko la kebi fɔlɔ. A ko, “Wa wo tole masɔ! Mari si na ala melika-sɛnimɛ waga siyaman na a bolo 15ka mɔgɛ bɛɛ kiti. A si Alla-lɔnbɛlɛ bɛɛ yiliki anuna kɛwɔlɛ-yogomɛla ko la. Alla-lɔnbɛlɛ wonu ya gbalo-kumɛ min fɔ Alla ma, anu si yiliki sɔrɔn wola ko la.” 16Foninya-karan-mɔgɔ wonu bi da-kɔrɔ-kumɛnu fɔla ka anu tɛgɛ sigi mɔgɔ gbɛrɛnu ma. Anu bilanɛ anu nyɛrɛ nata-yogomɛnu fɛ. Anu bi anu nyɛrɛ matɔgɔla ka kuma-diyamɛ fɔ donu ye alako anu ni anutɛ sɔrɔn nya min. 17Kɔnɔ n diyana-mɔgɛnu, wa wo miri de! Ma Mari Yisa, Allata-Mɔgɔ-Yabɔnɛla kilayɛnu ya min fɔ wo ye fɔlɔ, wo ni wo miri wo ma. 18Anu ya a fɔ wo ye ko, “Tele-laban-lunyɛ wa ke tumɛ min, wo mayɛlɛnnɛnu si na. Anu bilanɛ anu nyɛrɛ nata-yogomɛnu denu fɛ tolon!” 19Mɔgɛ wonu denu bi faralɛ kɛla bawo anu fɛrɛ-nata ye kun-tigiyɛ kɛla anu kun na dɔrɔn! Allala Ni Sɛnimɛ sa anu fɛ. 20Kɔnɔ wole, n diyana-mɔgɛnu, wo ni to sabatila wola dɛnkɛninya-sɛnimɛ rɔ. Wo ni madiyali kɛ Allata Ni Sɛnimɛ baraka rɔ. 21Wo ni to Allala keninteyɛ rɔ. Wo ye ma Mari Yisa, Allata-Mɔgɔ-Yabɔnɛ makɔnɔna alako a ni habadan-nimayɛ di wo ma ala kinikini-wɛ fɛ. 22Minnu sikanɛ, wo ni kinikini wonu ma. 23I ni donu fɔrɔn ka anu bɔ tɛ rɔ alako wonu ni kisi. Wo ni kinikini donu ma fanan hali wo kilannɛ anu na. Kɔnɔ hali anu bi kurɛ min donna anu fɛrɛ ma hakɛ kɛ tinɛ, wonu ni gboya wo ye. Wo kana wo gbɛrɛn mɔgɔ su wonu ma. 24Nba, ale Mari min si ke wo marala alako wo kana na bui, alamɛ wo sewanɛ sɔra a yakɔrɔ, fɛɛ woo sa wo la ala gbiliyɛ rɔ. 25Alla kelen pe, ma kisilɛ kɔni, wotɛ ye mansayɛ anubɛ gbiliyɛ anubɛ sɛnbɛ la Yisa Kirasiti baraka rɔ kebi fɔlɔ ma, ha ka a sigi kaka la, ha habadan! Amina.

will be added

X\