Yemesi 5

1Nba, wole nɔnfulu-tiginu, wo ni wo tole masɔ bɛrɛkɛ! Wo ni gbele-gbelen ka di yakɔrɔ-mamɔɛ wola ko la min bi nala wo yarɔ! 2Wola nɔnfulinu bara tuli ka ban feu! Kisinu bara wola kura-hakikɛnu dɔn sa! 3Wola sɛnɛ anubɛ wodi-gbɛ, mɔlɔn sa a la tun. Wo ara nɔnfuli ladɛn tele laban kɛnu kɔrɔ kɔnɔ wo si ma sereyɛ la wo kan ma ka wo fɛrɛ-bɔnkɛnu don tɛ rɔ pon! 4Mɔgɛ minnu wɔlita wo ye wola sɛnɛnu tɔ, wo ya wonu kensunya. Alla ara wola yasere-masa-kan lamɔɛn. Nba, minnu ya wola fui-fan tɛgɛ ka a ladɛn wo ye, wonu di-kɛ-kan ara ke Mari Alla Sɛnbɛ Bɛɛ Tigi tole rɔ! 5Wo siyi duninya kɛ rɔ, a fanɛ ladiyɛ anubɛ nyɛrɛ-diyana-koe gbansan le la. Wo ara wo nyɛrɛ matɔlɔ wo kan-natɛgɛ-tele ye. 6Wo ara mɔgɔ-magbalanɛnu yiliki ka anu faga. Sɛ sa anu ye ka wo kɛlɛ. 7Nba, n na kelen nyɔgɛnu, wo ni wo muin ha Mari ni na. Wo ni sɛni-salɛta munyu-nya mafɛlɛn. A ye ala sɛnɛ makɔnɔna munyu-ba rɔ, ha a ni banda-yi-kun-fɔlɛ anubɛ a laban sɔrɔn. A ye a fɛ, ala ki-fannu ni ma-a-la ka nanfa. 8Wole fanan ni wo munyu! Wo ni wo yigi don gbɛn, bawo Mari na-wati ara gbɛrɛn. 9N na kelen nyɔgɛnu, wo kana gbunya wo nyɔgɔn kɔrɔ, ni wo ma, Alla si wo kiti tɛgɛ. Wa wo yɛ lata. Kiti-tɛgɛlɛ sɔnɛ dɛ la. A sɔgɛ ye a la, a ni don. 10N na kelen nyɔgɛnu, nɛbi minnu kumara Mari tɔgɛ rɔ, wo ni wo hɛnkili to wonu ko. Wonu bara anu munyu tɔrɔyɛ kɔrɔ nya min ha a laban, wo ni ma misalɛ la wo ye. 11Ma ye mɔgɔ-munyanɛnu kelela ko mɔgɔ-sewanɛ bawo anu bara anu munyu. Wo ma Yobuta munyu koe lamɔɛn, ba? Ado Mari ya Yobu makoe nyinya nya min a laban, wo ma wo lɔn fanan, ba? Wo mara bawo Mari fanɛ kinikinɛ anubɛ hinɛ la. 12N na kelen nyɔgɛnu, kuma-kolomɛ le kɛ la. Wo tenbi lanyiri kirila tumɛ min, wo kana wo gboro. Wo kana wo gboro san kole rɔ, ni wo ma, dugu kole rɔ, ni wo ma fanan, fenfen tɔ. Wo ni a fɔ dɔrɔn ko, “Ɔnde,” ni wo ma, “Ade.” Wo le ya a to, wo ti hakɛ kɛ ka yiliki sɔrɔn Alla bolo. 13Mɔgɛ do tɔrɔnɛ wo tɛma, wa? A ni Alla matara. Do sewanɛ, wa? A ni tantoli-bɛti bɔ. 14Do kirɛ wo tɛma, wa? A ni chɔchi-mɔgɔ-banu kele. Wonu ni Alla matara a ye ka ɔlifi-tuli kɛ a ma Mari tɔgɛ rɔ. 15Alla-matarɛ min kɛnɛ dɛnkɛninyɛ rɔ, wo si kirayatoe lakisi. Mari si a lakɛndɛya. Ado a ara hakɛ minnu kɛ, wonu ma si koto. 16Nba, wo ni wo sɔ wo hakɛnu na wo nyɔgɔn ye ka Alla matara wo nyɔgɔn ye. Wo le ya a to, wo si kɛndɛya. Sɛnbɛ ba ye mɔgɔ-telennɛta Alla-matarɛ rɔ. 17Nɛbi Ilaya, mɔgɛ le nun iko male. A ya Alla matara a yisi bɛɛ la ko bandɛ kana na. Bandɛ ma na dugu kole kuma san sawa ani a tala. 18A ya Alla matara tun. Bandɛ nara. Ki-fan minnu bi dugu kole kuma, wonu nanfara ka sabati tun. 19N na kelen nyɔgɛnu, ni do samara wo tɛma ka tonyɛ boloka, ni mɔgɔ gbɛrɛ ya a lasɛgi tonya-kilɛ ma tun, 20wo ni wo hɛnkili to kɛ ko, min ba hakɛ tigi yɛlɛma ka bɔ a hakɛ kilɛ fɛ, wo si hakɛ tigi wo niyi lakisi sayɛ ma ka a ma, hakɛ siyamɛ ma ni koto.

will be added

X\