Yemesi 4

1Kɛlɛ anubɛ sɔsɔlɛ minnu bi wo tɛma, wonu bɔnɛ mi? Anu bɔnɛ wola natanu denu tɔ minnu bi kɛlɛla wo yisi rɔ. 2Fen-sɔgɛ ye wo birala kɔnɔ wo ti ke a sɔrɔnna min kɛ, woletɔ mɔgɔ-faga-sɔgɛ ye wo birala. Wo ye wola nata sala fannu kuma kɔnɔ wo ti ke anu sɔrɔnna min kɛ, wo ye kuma-gbondanɛnu fɔla ka wo nyɔgɔn kɛlɛ. Wo sa wonu sɔrɔnna bawo wo sa Alla tarala wonuna ko la. 3Ado wo wa Alla tara, wo ti a sɔrɔn bawo wo sɔndɔmɛ lafinnɛ. Wo ye fan tarala wo nyɛrɛ diyana koenu kɛ-koe le la dɔrɔn. 4Wole lanayabɛlɛnu, ka a fɔ ko ni duninya kɛ diyara mɔgɔ wo mɔgɔ ye, Alla yoge le wo tigi la, wo ma wo lɔn, wa? N ni a fɔ tun, mɔgɛ min bi mala duninya kɛ diyana-mɔgɛ la, wo si a nyɛrɛ ma Alla yoge la. 5Allala kitabu wa a fɔ ko, “Allala Ni Sɛnimɛ min siginɛ ma rɔ, a ye a fɛ, ma ni telen a kelen pe le ye,” wo kana wo miri ko a ara kuma-fuyi le fɔ wo la. 6Alla ye keninteyɛ min yirala ma la, wo sɛnbɛ kolo kati! Ado Allala kitabu ko, “Alla kɛlɛ-nyɔgɛ le mɔgɔ-wasinɛnu na kɔnɔ mɔgɛ min famayiginɛ, a si wonu kɔntɔ-diya.” 7Woletɔ wo ni wo famayigi Alla ye ka wo kan-kɔ sɔ Setanɛ la. Setanɛ si a buri wo kɔrɔ. 8Wo ni wo gbɛrɛn Alla ma. A si a gbɛrɛn wo ma. Hakɛ-tiginu, wo ni wo bole laku feu! Wole nafiginu, wo ni ko-yogomɛ bɔ wo sɔndɔmɛ rɔ feu! 9Wo ni nimisa ka a tɛgɛ wo ara ko-yogomɛ minnu kɛ. Wo ni wola yɛlan yɛlɛma di-kɛ la ka wola sewɛ yɛlɛma yisi-tinya la! 10Wo ni wo famayigi Alla ye. Ni min ya wo ma, a si wo mɔgɛ layɛlɛ. 11N na kelen nyɔgɛnu, wo kana wo nyɔgɔn mapandin ha ka wo nyɔgɔn yiliki. Ni wo ya wo ma, wo ye Alla leta tɔn mapandinna ka a yiliki. Ka a fɔ i si ke a fɔla ko, “Tɔn kɛ bɛnta, tɔn kɛ ma bɛn,” wo kiti-tɛgɛla ma ile la. Ado, ita wɔlɛ ye min na, wo le, ka tɔn wonu bira wo bolo filɛ la. 12Ale Alla kelan le tɔn dila ka kiti tɛgɛ. A kelen pe le si ke ka kisili anubɛ halakili kɛ. Yon bi ile la min si i hadama-den-nyɔgɛ yiliki? 13Nba, wo ni wo tole masɔ n kan la. Wole min ko, “Bi, ni wo ma, sina, ma si ta soe do rɔ yilaya kɛ tinɛ san kelen ka tɔnɔ-wɛ sɔrɔn.” 14Wo ma a lɔn defan, wo niyi si ma nya min sina! Wo mani de iko duri min si yigi ka watini bɔ, wo kɔma, a ni tunu yen! 15A fisa, wo ni a fɔ ko, “Ni Mari sɔnta, ma si kɛ ma, ni wo ma, ma si wo ma.” 16Kɔnɔ kaka, wo wasinɛ. Wo ye wo nyɛrɛ matɔgɔla. Ado nyɛrɛ-matɔgɔ-su wo yogo. 17Wa wo hɛnkili to kɛ ko. Ni mɔgɛ ya ko-nyimɛ-kɛ nya-lɔn kɔnɔ a ma a kɛ, hakɛ le wo la.

will be added

X\