Yemesi 1

1Alla anubɛ Mari Yisa, Allata-Mɔgɔ-Yabɔnɛla wɔli kɛlɛ, Yemesi le ye kɛdi kɛ sɛbɛla. N bi Allala mɔgɛ bɛɛ kɔndɔnna minnu nyɛnsɛnnɛ duninya kan tinɛ bɛɛ rɔ. 2N na kelen nyɔgɛnu Kirasiti rɔ, wo wa don kɔrɔbɔli-subolo-siyamɛ rɔ tumɛ min, wo ni wo bɛɛ lɔn sewɛ la. 3Wo ni a lɔn ko anu ba wo kɔrɔbɔ wola dɛnkɛninyɛla ko la tumɛ min, wo si a ma, wo ni wo munyu. 4Wo ni a lɔn serr, ko wola munyɛ wo da wa fa, do si sa wola sɔn-nyimayɛ kuma alako wo da ni fa feu! 5Ni min hɛnkili dasanɛ, wo tigi ni Alla matara. A si hɛnkili di a ma bawo Alla le si mɔgɛ kɔ foninsereyɛ la. A si sewa wo tigi la ado a ti mɔgɔ lafɛya. 6Kɔnɔ wo wa Alla matara tumɛ min, wo ni wola lanayɛ sa a kuma feu! Wo kana sika hali! Ado ni min bara sika, wo tigi mani de iko kɔgɔ-yi ye ta-ni-sɛgi kɛla fɔnyɔ bolo nya min. 7Wo mɔgɔ sufa kana a miri ko a si fen sɔrɔn Mari bolo 8bawo a ye koe min bɛɛ kɛla, a kunyɛ rabasannɛ, a ti ko-wo-ko latɛgɛ a nyɛrɛ wara-koe rɔ. 9Ma ta-nyɔgɛ bolo-kolɔnnu ni sewa bawo Alla ara anu lɔn nɔnfulu-tigi la. 10Alla wa ma ta-nyɔgɛ nɔnfulu-tiginu famayigi, wonu bɛrɛn ni sewa bawo anuna nɔnfuli si ban tiriya iko kɔn-fere. 11Tele wa yɛlɛ, a wuyan si kɔn-fere wo lafɔsɔ. A fere si yalan. Ala kinyɛ si tinya pɔ! Nɔnfulu-tiginu fanan wara-koe si ka-a-la wo nya na le anu tenbi anuna ko ladannu na. 12Mɔgɔ-sewanɛ le wo mɔgɛ la min si lanayɛ kɛ kɔrɔbɔlɛ rɔ bawo ala kɔrɔbɔlɛ wa ban tumɛ min, a si barayi min sɔrɔn, wo le a niyi-bɛrɛ la. Minnu bara Alla keni, Alla ara lanyiri kiri wonu ye ko a si barayi di anu ma. 13Ni ko-yogoma-kɛ-sɔgɛ ya mɔgɛ do bira, a kana a fɔ ko Alla le ya a sɔ wo ma tinɛ bawo ko-yogoma-kɛ-sɔgɛ ti Alla bira. Ado Alla fanan ti mɔgɔ wo mɔgɔ sɔ ko-yogoma-ma-tinɛ. 14Sɔn-yogoyɛ min bi mɔgɔ yisi rɔ, wo le si a ma, a ni ko-yogomɛ kɛ. 15Ata ko-yogomɛ min bi a yisi rɔ, wo si buyi bi ka mui hakɛ la. Hakɛ wa tagbaya a kuma tumɛ min, a si a laban sayɛ ma. 16N diyana na kelen nyɔgɛnu, mɔgɔ kana wo yanfa! 17Kɔ-fen-nyimɛ-bɛɛ anubɛ kɔ-fen-kanbalinɛ-bɛɛ ye bɔla Arinyɛni tɔ. A ye yigila ka bɔ Alla bolo min ya san-koleta wan-takɛ-fannu dan. Ale Alla ti yɛlɛma iko ninɛ yɛlɛmanɛ ye nya min. 18Ka a tɛgɛ ala keninteyɛ ma mala ko la, a ya ma ma ala dan la kamasɔrɔn a ya tonya-bɛrɛ di ma ma iko a ya a latɛgɛ nya min. A ya wo ma alako male ni sɔ-tina fɔlɛ sɔrɔn ala dali-fan bɛɛ tɛma. A halalɛ le male la gbɛ! 19N diyana-mɔgɛnu, wo ni wo hɛnkili to kɛ ko! Mɔgɛ bɛɛ ni a kaliya ko-lamɔɛnna kɔnɔ a kana kuma yona. A kana diminya yona. 20Ado mɔgɔta diminyɛ ti Allala telenbagayɛ labɔ gbɛ ma iko a ya a latɛgɛ nya min. 21Wo ni ko-latinyanɛ bɛɛ boloka anubɛ kɛ-nya-yoge bɛɛ. Wo ni sɔnnaya Alla ye ka ala kumɛ bira min siginɛ wo yisi rɔ. Ado kumɛ wo si ke wo kisila le. 22Wo kana wo tole masɔ Allala kumɛ la gbansan fɔ ka a kɛ le serr! Wo kana wo nyɛrɛ mayuwaya tole-masɔɛ dɔrɔn na! 23Ado min bi a tole masɔla kumɛ la kɔnɔ a sa a birala, wo mani de iko mɔgɛ min bi a nyɛrɛ mafɛlɛnna nyɛrɛ-mafɛlan rɔ. A si ke ala fɛɛ bɛɛ yenna kɔnɔ a sa wo fenfen tabɛnna. 24A wa a nyɛrɛ mafɛlɛn, a ni ta a ye, wo kɔma, a ye nya min nun, a ni nyina wo ko salon! 25Kɔnɔ Allala tɔn-kanbalinɛ min si mɔgɔ hɔrɔya, mɔgɛ ni to wo mafɛlɛnna. Mɔgɔ woo wa a yigi sa a rɔ, ado a ma a tole masɔ dɔrɔn ka a yili bɔ kumɛ wonu ko, Allatala ye nyinina min ma, a ye wo bɛɛsi mala. Wo tigi wa a bole bila ko-wo-ko rɔ, Alla si a lasabati. 26Ni mɔgɛ do ya a miri ko Allata mɔgɛ le ale la, ni a ma a dɛ mara, fuyi le ala dina wo la. A ye a nyɛrɛ mayuwaya tinɛ le dɔrɔn. 27Ma Fa Alla si sɔn dina min ma, wo le kɛ la. Wo tigi ni kelennɛnu anubɛ kɛɛ-musinu dɛnbɛ anuna tɔrɔyɛ rɔ. A ni a nyɛrɛ sɛninyanɛ mara duninya-ko-yogomɛ-bɛɛ ma. Dina kɛ, fɛɛ woo sa a la, ado dina-latinyani ma.

will be added

X\