Hiburunu 7

1Mɛlikisidaki ye so-tigiyɛ le la Selam soe burɔ nun. A ye saraka-masɔlayɛ fanan na Alla ye, Alla min Bi Fan Bɛɛ Kun Na kɔni. Ma benba Iburayima bɔnɛ mansɛ doinu nɔ tinɛ kɛlɛ rɔ, anubɛ Mɛlikisidaki bɛnta kilɛ la. Ale Mɛlikisidaki duwara Iburayima ye. 2Iburayima ya nɔnfulu min bɛɛ sɔrɔn kɛlɛ rɔ, a ya wo bɛɛ yaka bɔ ka a di ale so-tigi ma. (Mɛlikisidaki tɔgɔ-kɔrɛ le, “Mansa Latelennɛ.” Ado Selam soe tɔgɔ-kɔrɛ le, “Yisi Kimɛ,” woletɔ ale so-tigi le “Yisi Kima Mansɛ” la.) 3Ale Mɛlikisidaki kɛ, fenfen sɛbɛni ma Allala kitabu rɔ a fa anubɛ a nala ko la anubɛ a bɔnsɔn wara-koe rɔ. A sɔrɔn-koe anubɛ a faga-koe fanan ma sɛbɛ. A mani de iko Allala dan bawo a tonɛ saraka-masɔlayɛ la habadan! 4Wa wo miri Mansa Mɛlikisidakila gbiliya-makawanɛ ma, a ye nya min! Ma benba Iburayima ya fan min bɛɛ sɔrɔn kɛlɛ rɔ, wo ya wo bɛɛ yaka di a ma. 5Lifayi bɔnsɔn minnu bi saraka-masɔlayɛ la, a sɛbɛnɛ tɔn kitabu rɔ ko anu ni yaka makele Isirɛla mɔgɛnu bolo. Anu bi wo makelela anu nyɛrɛta nyamanita-mɔgɛnu bolo, hali anu bɛɛ bɔra Iburayima bɔnsɔn le tɔ. 6Mɛlikisidaki kɛ, Lifayi bɔnsɔn ma nun kɔnɔ a ya yaka bira Iburayima bolo. Ale Iburayima min ya Allala lanyiri sɔrɔn, ale Mɛlikisidaki duwara wo ye. 7Sika mumɛ sa kɛ rɔ. A gbɛnɛ feu, ko ale Mɛlikisidaki min duwara, a tenbira Iburayima la a duwara min ye. 8Saraka masɔlɛ minnu si yaka makele, mɔgɔni-gbuyi le wonu na dɔrɔn. Lunyɛ do, anu si faga. Kɔnɔ Mɛlikisidaki min ya yaka bira, wola faga-ko sɛbɛni ma Allata kitabu rɔ. 9Minnu bi yaka makelela mɔgɛnu bolo, Lifayi bɔnsɔn le wonu na. Ma si ke a fɔla worɔ ko Iburayima ya yaka bɔ tumɛ min, Lifayinu fanan ya yaka bɔ iko Iburayima. 10Hali Lifayi ma sɔrɔn bɛ nun, a ye a benba Iburayima soge rɔ, ma si ke a fɔla le wo rɔ ko a ye nyɔ nun. Ado Mɛlikisidaki ya Iburayima labɛn tumɛ min, Lifayi ye nyɔ nun. 11Nɛbi Musata tɔnnu anubɛ Lifayi bɔnsɔnta saraka-masɔlayɛ ye wɔlila anu nyɔgɔn fɛ. Nba, Lifayi bɔnsɔn saraka masɔlɛnu, ni wonuna tɔnnu si ke mɔgɛnu natelenna le nun, ma mako ti taran saraka-masɔla-gbɛrɛ la nun. Kɔnɔ ma mako ye saraka-masɔla-gbɛrɛ la, Mɛlikisidaki su kɔni, Aruna su ma de! 12Ado saraka-masɔla-su-gbɛrɛ wa na tumɛ min, a fɛrɛ sa fɔ tɔn fanan ni yɛlɛma ka a bɛn wo ma. 13Nba, ma ye koe kɛnu fɔla ma Mari Yisa minna ko la, wo bɔra bɔnsɔn gbɛrɛ le rɔ, Yuda bɔnsɔn kɔni. Ado Yuda bɔnsɔn fenfen ma saraka-masɔ-wɔlɛ kɛ. 14Bɛɛ ya a lɔn ko Mari sɔrɔnta Yuda bɔnsɔn le tɔ. Ado Nɛbi Musa ya saraka masɔya koe fɔ tumɛ min, a ma bɔnsɔn wola ko fɔ. 15Koe kɛ ara gbɛ feu! Saraka-masɔla-gbɛrɛ ara bɔ gbɛ rɔ min manɛ iko Mɛlikisidaki ye nya min nun. 16A ma ma saraka masɔlɛ la hadama danta tɔn fɛ min ko a ni bɔ bɔnsɔn do rɔ. A mara saraka masɔlɛ la ka a tɛgɛ ata habadan-nimayɛ ma. 17A sɛbɛnɛ Allala kitabu rɔ ko, “Ile si ma saraka masɔlɛ la tolon iko Mɛlikisidaki.” 18Nba, tɔn-kɔrɔmɛ wo ara to a dan na bawo a sɛnbɛ sa, ado a ti ko nyinya mɔgɔ ma tun. 19Alla ya tɔn min di Nɛbi Musa ma, wo ma ke ko-wo-ko munanfagala bawo ma ara yigi-bɛrɛ sɔrɔn kaka. Ma dama ye magbɛrɛnna Alla ma, wo le baraka rɔ. 20Doi wonu mara saraka masɔlɛnu na tumɛ min, Alla ma a keli wonu ye. Kɔnɔ Yisa mara saraka masɔlɛ la min kɛ, Alla ya a keli a ye. A ya a fɔ a ye ko, “Nde, Mari ko i si ma saraka masɔlɛ la tolon! N ti n miriya yɛlɛma i wara la mumɛ!” 22Nba, ka a tɛgɛ Alla sarata min ma, wo le ya a ma, Yisa mara mɔgɛ la min ya a yira bɛrɛbɛrɛ-wɛ-kɛ ko ale sarama-kan-kurɛ, wo tenbira a fɔlɔtɛ la. 23Dan-nafarɛ gbɛrɛ ye nyɔ tun. Saraka masɔlɛ wonu siya nun bawo anu kɛnɛna fagala. Saraka-masɔla-gbɛrɛ si to ala wɔlɛ kɛla. 24Kɔnɔ Yisa ye a kɛndɛ la habadan! Woletɔ ala saraka-masɔ-wɔlɛ la ti tenbi mɔgɔ gbɛrɛ ma. 25Ado minnu bi nala Alla ma Yisa baraka rɔ, ale le si ke wonu nakisila feu, bawo a ye a kɛndɛ la habadan! A ye Alla madiyala wonu ye tɛban! 26Nba, mala saraka-masɔla-kun-tigi-wɛ Yisa si ma makoe bɛɛ nyinya! A sɛnima! Fɛɛ wo fɛɛ sa a la, ado a ma hakɛ si kɛ! A sa iko male hakɛ tiginu feu! A layɛlɛta san kole bɛɛ kuma pon! 27Ale sa iko saraka-masɔla-kun-tigi-wɛ doinu. Ka sarakɛ masɔ a nyɛrɛ hakɛla ko la tele-wo-tele, a mako sa wo la. A mako sa tele-wo-tele-sarakɛ la mɔgɛnu hakɛla ko la fanan. A ya saraka kelen pe le bɔ ka dan wo ma. A ya a nyɛrɛ niyi ni sarakayɛ la tumɛ min, a ya wo ma wo le tɔ. 28Alla ya tɔn min di Nɛbi Musa ma, wo ya mɔgɛnu yatɔnbɔn alako anu ni ma saraka-masɔla-kun-tigi-wɛnu na hali anu ma telen wo nya. Kɔnɔ Allata kelili sanɛ lanyiri min kuma, wo nara Nɛbi Musala tɔn kɔma le. Wo ye ata dan le yabɔla min si Allata ko-latɛgɛnɛ kanbali habadan!

will be added

X\