Hiburunu 5

1Alla si saraka-masɔla-kun-tigi-wɛ bɛɛ yabɔ ka bɔ a ta-nyɔgɔ-saraka-masɔlɛnu tɛma. Ata wɔlɛ ye min na, wo le ka a sɔ Alla anubɛ mɔgɛnu tɛma. A ye kɔ-fannu anubɛ sarakɛnu bɔla anuna hakɛla ko la. 2Nba, saraka-masɔlɛ-yisi rafaganɛ nya siyaman ma min kɛ, a si ke ka dinyɛ yira a hadama-den-nyɔgɛnu na. Anu hɛnkili sa ado anu si sama iko ale. 3Nba, a rafaganɛ min kɛ, fɔ a ni sarakɛ bɔ a nyɛrɛta hakɛla ko la. Wo kɔma, a si mɔgɛnuna sarakɛnu masɔ anuna hakɛ fananna ko la. 4Mɔgɛ wa ma saraka-masɔla-kun-tigi-wɛ la, gbiliyɛ le wo la. Kɔnɔ mɔgɔ wo mɔgɔ ti sɔ tinɛ wo bi a nyɛrɛ ma bawo a ye nyinina a ma fɔ Alla wa a kele iko ma benba Aruna keleta nya min. 5A mara wo nya Kirasiti fanan ye. A ma a nyɛrɛ ma saraka-masɔla-kun-tigi-wɛ la. A ma gbiliyɛ bi a nyɛrɛ ye kɔnɔ Alla le ya a fɔ a ye ko, “Nna dan le ile la. N bara ma i fa la bi.” 6A sɛbɛnɛ kan-tina-gbɛrɛ rɔ fanan ko, “I si saraka-masɔ-wɔlɛ kɛ tolon, iko Mɛlikisidaki ya a ma nya min.” 7Yisa ye dugu kole kɛ kuma tumɛ min, Alla min si ke a kisila sayɛ ma, a ya wo madiya a kulu mayɛlɛnɛ anubɛ diyi la a bolo. Alla ya a wɔlɔ matɔlɔ Yisa la bawo a ya a famayigi ka madiyali kɛ, ado a telenta. 8Hali Allala dan le ale la, ala tɔrɔyɛ fɛ, a ya a fala kuma-birɛ makaran. 9Ado kuma-birɛ wo kanbalinɛ min kɛ, minnu bi ale fananta kumɛ birala, a si ke wonu kisila habadan! 10Alla ya a ma saraka-masɔla-kun-tigi-wɛ la wo nya iko Mɛlikisidaki. 11Ko siyaman bi ma bolo ka a fɔ wo ye ka a bɛn Yisata saraka-masɔlayɛ ma. Kɔnɔ a faranfasi koe gbɛlɛ wo ye bawo wo ti ke ko nya-yenna tiriya! 12A kakɛn, wo ni ma karan-mɔgɛnu na kɔnɔ ha kaka, wole bɛrɛn makoe ye karan-mɔgɔ la. Ha bi, wo makoe ye Allala kumɛ dabira koenu na. Wo ti ke dɔn-fen-bɛrɛ dɔnna fɔ ka to wo susunna dɛɛ. 13Ado min bi a susunna, den pulan le wo la fɔlɔn. A ma ko-nyimɛ anubɛ ko-yogomɛ dan-nafarɛ lɔn. 14Kɔnɔ kinanu si dɔn-fen-bɛrɛ dɔn. Minnu bara koloya, wonu bara ko-nyimɛ anubɛ ko-yogomɛ dan-nafarɛ makaran.

will be added

X\