Hiburunu 3

1N na kelen nyɔgɛ dɛnkɛninya-mɔgɛnu, Alla ara wole kele ko wo ni ma atɛnu na. Woletɔ wo ni wo miri Yisa le ma. Alla ara a sɔ mala saraka-masɔla-kun-tigi-wayɛ la mala dɛnkɛninyɛ kun na, ma sɔnɛ min tɔ gben! 2Alla ya Yisa yabɔ ata wɔlɛla ko la. Ado lanaya-mɔgɛ le ale la iko Nɛbi Musa mara lanaya-mɔgɛ la nya min Allata mɔgɛnu ye. 3Bon-sɔlɛta gbiliyɛ kolo bɔn nyɛrɛ ko. Ado gbiliya-wɛ bɛnnɛ Yisa fanan ma wo nya na le ka tenbi Nɛbi Musa la. 4Bon kelen-kelennamɛ-bɛɛ sɔra mɔgɛ le bolo. Ado Alla le wara fan bɛɛ dan. 5Nɛbi Musa le wɔli kɛlɛ wo la min wɔlita Allata mɔgɛnu tɛma a kilɛ fɛ. Alla ye nala min fɔla ma ye yarɔ, ale Musa mara wo misalɛ la. 6Kɔnɔ Kirasiti le dan wo la min bi lanayɛ kɛla a fa Allata mɔgɛnu kuma. Ni ma tora mata yisi-latɛgɛ rɔ ka ma yigi sa ale rɔ, Allata mɔgɛnu denu bi male la worɔ. 7Iko Allata Ni Sɛnima ya a fɔ nya min, a ko, “Ni wo ya nna kuman kan lamɔɛn bi, 8wo kana ma tengberannu na iko wo benbanu murutiyara n ma nya min. Anu ya n kɔrɔbɔ wulɛ rɔ nya min, wo kana wo yisi gbɛlɛya wo nya na tun. 9Hali anu mara nta kabana koenu sere la san bi-nani kɔrɔ, wo benbanu ya a lagbɛlɛya n kuma ka n tɔrɔ. 10Wo le ya a to, n diminyara mɔgɛ wonu ma. Anu ya n boloka ka ta anu kun fɛ! Anu ma sɔn nna kumɛ birala mumɛ! 11N yisi bɔnɛ ya n keli. N ko kɛnu ti don nyamanɛ wo rɔ anu si anu sulen kan min mumɛ!” 12Woletɔ n na kelen nyɔgɛnu, wo ni a ma wo fɛrɛma. Ni-yogoyɛ wo, dɛnkɛninyabɛlitayɛ wo, wo fenfen kana taran wo tɛma min si a ma, wo ni wo kan-kɔ sɔ Alla nimɛ la. 13Fananta ma ye a fɔla bi ma ko, “Bi,” wo ni to wo nyɔgɔn dɛnbɛna tele-wo-tele alako wo fenfen kana yanfa hakɛ bolo. Wo kana ma sɔndɔma-gbɛlɛ-tiginu na. 14Ni ma tora lanayɛ kɛla ka bi a fɔlɛ ha ala ban, ma dama ye ta-nyɔgɔnyɛ kɛla Kirasiti fɛ worɔ. 15A sɛbɛnɛ Allata kitabu rɔ ko, “Ni wo ya Allala kuman kan lamɔɛn bi, wo kana ma tengberannu na iko wo benbanu murutiyara Alla ma nya min.” 16Yon bi wonu na minnu ya Allala kuman kan lamɔɛn ka murutiya a ma? Nɛbi Musa bɔra mɔgɛ minnu na ka bɔ Iyipiti nyamanɛ rɔ, wonu denu denu bi, yɔ! 17Alla diminyara yonnu ma san bi-nani kɔrɔ? A diminyara hakɛ tigi wonu denu ma, ado wonu suyi sanɛ tora wulɛ rɔ. 18Alla ya a keli tumɛ min ko kɛnu ti don nyamanɛ wo rɔ anu si anu sulen kan min, a ya wo fɔ yonnuna ko la nun? Minnu murutiyara a ma nun, a ya wo fɔ wonu denuna ko la. 19Ma ara a yen worɔ ko anu ma ke donna bawo anu ma dɛnkɛninya Allata kumɛ ma.

will be added

X\