Hiburunu 2

1Wo le ya a to, ma ara tonyɛ minnu namɔɛn, ma ni wonu bira gben! Wo si a ma, ma ti porokɔlɔ ka bɔ a rɔ. 2Alla ya tɔn minnu di ma benbanu ma melikanu baraka rɔ, wonu gbɛlɛ ma kuma. Ado minnu ma tagama iko tɔn wo ya a fɔ nya min, a kakɛn, a ni tɔrɔyɛ min nyɔgɛ sɔrɔn, a si wo sɔrɔn. 3Min tenbira wo la, ma Mari Yisa nyɛrɛ fɔlɔn ya kisi-koe min nabɔ gbɛ rɔ ma ye, ni ma ma ma tole masɔ kisi-ko-wɛ wo la, ma kunyɛ si bɔ a rɔ kama? Minnu ya a lamɔɛn, wonu ya a yira ma la ko tonyɛ le. 4Wo wati nyɛrɛ rɔ, Alla ya kabana koe anubɛ kɛwɔli-sɛnbɛmɛ-su-siyaman kɛ. A ya ata sereyɛ labɔ gbɛ rɔ kabana koe wonu fɛ. A ya ata Ni Sɛnimata kɔ-fannu fanan tafara iko a di a ye nya min. 5N bi kɛ-nya-kurɛ su min ma, Alla ma wo ladon melikanuna kun-tigiyɛ kɔrɔ. 6Kɔnɔ iko a sɛbɛnɛ Allata kitabu kan tinɛ do rɔ nya min, a ko, “E Alla, nfen bi hadama dan la min bi a tola, i ye i mirila a ma? Nfenna gbu, i miriya ye kɛla mɔgɔni-finyɛ ma? 7I ya melikanu natenbi ale la wati-kunduni kɔrɔ. I ya mansaya-gbiliyɛ anubɛ bonyɛ di a ma 8ka a ma fan bɛɛ kun tigi la.” A sɛbɛnɛ ko Alla ya ale le ma “Fan bɛɛ kun tigi la.” Ado fan bɛɛ ara don ala sarati kɔrɔ feu! Kɔnɔ ma sa ale yenna kun-tigiyɛ kɛla fan bɛɛ kun na kaka. 9Kaka, ma ye Yisa le yenna mansayɛ kɛla bonyɛ anubɛ gbiliyɛ rɔ ka a tɛgɛ ata saya-tɔrɔyɛ ma. Melikanu tenbira a la nun wati-kunduni kɔrɔ alako a si faga mɔgɛ bɛɛ ye nya min Allata hinɛ baraka rɔ. 10Ado Alla min bi dali-mansɛ la, a bɛnta ko a ni Yisa lakanbali tɔrɔyɛ fɛ. A ya wo ma alako Allata den siyamɛnu si ata gbiliyɛ sɔrɔn a fɛ nya min. Ado Yisa le sɔra anu yarɔ anu kisi-koe la. 11A ye mɔgɛnu sɛninyala ka anu bɔ anuna hakɛnu tɔ. Nba, Yisa wo, a ye minnu sɛninyala wo, anu dama Fa kelen de anu na. Woletɔ a ma miliya ka anu kele ko a na kelen nyɔgɛnu. 12A ya a fɔ Alla ye ko, “E Alla, nna mɔgɛnu ba anu nadɛn i bato tinɛ tumɛ min, n si ila koe fɔ anu ye ka i tanto-bɛtinu bɔ.” 13A ko fanan, “N si n yigi sa Alla kuma.” Wo kɔma, a ko, “Alla ara dan minnu di n ma, mabɛ wonu bi yan.” 14Nba, dan wonu, fɛrɛ-bɔnkɛ anubɛ yele le anu na. Yisa nyɛrɛ mara iko anu denu ka anuna mɔgɔyɛ-nyɔgɔn bi. A ya wo ma alako a si Setanɛta sɛnbɛ kasara nya min ata sayɛ fɛ. Ado sɛnbɛ ye Setanɛ bolo nun ka mɔgɛnu faga. 15Ata sayɛ ya ma hɔrɔya bawo male minnu kilannɛ sayɛ ma nun, ma mani de nun iko yɔɔnnu sayɛla kilan kɔrɔ. 16Ado a gbɛnɛ ko Yisa ma na melikanu dɛnbɛn tinɛ bawo a sɛbɛnɛ Allala kitabu rɔ ko, “A ye Iburayima bɔnsɔnnu denu dɛnbɛna.” 17Woletɔ fɔ a ni ma iko male, a na kelen nyɔgɛnu, koe bɛɛ rɔ. A ni wo ma alako a si kinikini ma ma nya min ka wɔli Alla ye a yisi bɛɛ la. A mara mala saraka-masɔla-kun-tigi-wɛ la min kɛ, a ya sarakɛ bɔ ma ye ma hakɛnuna ko la. 18Nba, minnu bi magbɛrɛnkɛ rɔ kaka, a si ke wonu dɛnbɛna bawo a nyɛrɛ magbɛrɛnkɛnta ka tɔrɔ.

will be added

X\