Kalesiya 5

1Kirasiti ara ma hɔrɔya feu! Wo ara hɔrɔya min kɛ, wo ni wola hɔrɔyɛ bira gben! Wo kana sɔn ko Nɛbi Musata tɔn kitabu ni wo ma yɔɔn la tun! 2Wa wo tole laka! Nde, Pɔli le ye kɛ fɔla wo ye. Ni wo sɔnta Yahudiyanuna kemininya-koe ma, Kirasiti ya min ma wo ye, wo ti ko-wo-ko nyinya wo ma tun! 3N bi a fɔla wo ye tun ka a gbɛ feu! Min ba sɔn Yahudiyanuta kemininyɛ ma, a fɛrɛ sa fɔ a ni Nɛbi Musata tɔn kitabu mumɛ bɛɛ bira. 4Wole minnu bi wo rayala ka telen Alla ye tɔn-birɛ fɛ, wo ara wotɛ bɔ Kirasiti wara-koe rɔ feu! Wo sa Allata hinɛ kɔrɔ tun. 5Male min tonɛ Allata Ni Sɛnimɛ baraka rɔ, Alla ara fan min lanyiri kiri, ma gbarannɛ ma nyɛrɛ la wo bɛɛ-sɔrɔn-koe la. A ya lanyiri wo kiri anu ye minnu telennɛ a ye dɛnkɛninyɛ fɛ. 6Ado ni ma lara Yisa Kirasiti la, ma kemininyanɛ anubɛ ma kemininyabɛlɛ, kelen de wonu na. Min kolo, wo le mala dɛnkɛninyɛ min si a ma, keninteyɛ ni to ma tɛma. 7Wola dɛnkɛninyɛ ye tala yarɔ nun a kin na! Ado ni min ya wo kunyɛ bɔ tonyɛ wo kɔrɔ, wo ma ko-nyimɛ kɛ. 8Alla min ya wo kele hɔrɔyɛ ma, wo ma mɔgɛ wo sɔ de! Wo ni wo yɛ lakalan! 9Iko anu bi a fɔla nya min, “Biredi-yɛlɛ-fan doni si a ma, biredi wo bɛɛ ni yɛlɛ.” 10Kɔnɔ Maritɛ le wole la. N lanɛ wole la feu! Wo ti bila mɔgɔ gbɛrɛta karan fɛ tun fɔ nde ara wo karan min na. Ado min bi wo tɔrɔla, a mara mɔgɔ wo mɔgɔ la, Alla si wo tigi tɔrɔ. 11N na kelen nyɔgɛnu, wa nta tɔrɔyɛ mafɛlɛn. N sa kawandili bɔla ko fɔ mɔgɛnu ni kemininya kɔnɔ ha bi, anu bi n tɔrɔla. N bi Kirasiti faga koe min kawandili bɔla, ni n ya kemininya-koe sa wo kuma nun, wo ti Yahudiyanu tɔrɔ. 12A sɔgɛ ye n na, minnu bi wo kɔndɔfilila, wonu kana dan kemininya-koe ma dɔrɔn. Anu ni anu nyɛrɛ ma tɛgannu na feu! 13N na kelen nyɔgɛnu, wo keleta hɔrɔyɛ le ma kɔnɔ wola hɔrɔyɛ kana ma masigima koe la wo fɛrɛ-natanu ma-tinɛ. Min fisa, wo ni to wo nyɔgɔn dɛnbɛna keninteyɛ rɔ. 14Ado tɔn bɛɛ kuri le tɔn kelan kɛ la ko, “I ni i sigi-nyɔgɛ keni iko i nyɛrɛ.” 15Kɔnɔ ni wo tora ko ladanna iko sogo-feremɛnu ka wo nyɔgɔn madumɛ ka wo nyɔgɔn dɔn, feda worɔ, wo ni a ma wo fɛrɛma, ni wo ma, wo si wo nyɔgɔn kasara pɔ! 16N bi min ma, wo le kɛ la. Ni wo bilara Allata Ni Sɛnimɛ fɛ, wo ti wo fɛrɛ-bɔnkɛ diyana koenu kɛ worɔ. 17Ma fɛrɛ-bɔnkɛ ye min fɛ, anubɛ Allata Ni Sɛnimɛ ye min fɛ, kelen ma wonu na. Wonu bi anu nyɔgɔn kɛlɛla wati bɛɛ. Wo ye a fɛ ka min kɛ, wo ti ke wo kɛla. 18Ado ni wo tora bilala ata Ni Sɛnimɛ fɛ, wo sa Nɛbi Musata tɔn kitabu kɔrɔ tun. 19Fɛrɛ-bɔnku-nata ye nya min, wo lɔn koe ma gbɛlɛ! A ye minnu kɛla, wo le kɛnu na, sɔn-yogoyɛ wo, miriya-yogomɛ wo, milibɛlitaya-koe wo, 20bɛsi-kɔɛ wo, anubɛ suwagayɛ. Gboyanayɛ anubɛ nyɔgɔn-kɛlɛ ti ban anu tɛma. Anu bi anu nyɔgɔn makeliyala ka diminya anu nyɔgɔn ma ka anu miri anu nyɛrɛ dɔrɔn ma. Hali anu kurɔn ladɛnnɛ, anu ta si nyɛnsɛn kɛlɛ-tɛgɛ-koe la. 21Anu sa nyinina ko-nyima woo ma anu bɔnuna ko la. Anu manɛ gbɛɛtoenu na. Anu bi anu fɛrɛ-bɔnku-natanu denu wasala tolon! Anu bi ko sufa wo bɛɛ mala. N bi a fɔla wo ye tun ko minnu bi ko sufa wo bɛɛ kɛla, wonu ti Allala mansayɛ sɔrɔn muk! 22Kɔnɔ Allata Ni Sɛnimɛ si wo labila min na, wo le kɛnu na, keninteyɛ wo, sewɛ wo, yisi-kimɛ wo, munyɛ wo, dinyɛ wo, nyimayɛ wo, lanayɛ wo, 23famayigi wo, anubɛ nyɛrɛ-birɛ. Tɔn sa ko sufa wonu ma. 24Wole min bara ma Kirasiti Yisatɛ la, wo ara wo sɔn-yogomɛ anubɛ nata bɛɛ faga. 25Allata Ni Sɛnimɛ ara ni-kurɛ di ma ma min kɛ, a fɛrɛ sa fɔ ma ni to ala sɛnbɛ kɔrɔ. 26Ma kana wasi. Ma kana ma nyɔgɔn nadiminya. Ma kana ma nyɔgɔn makeliya.

will be added

X\