Kalesiya 3

1Wole Kalesiya kɛnu, kuntan le wole la! Nfen bara don wo rɔ? Yisa Kirasiti fagara kɔlɔma ma nya min, n bara wo labɔ gbɛ ma wo ye feu! 2N bi min lɔn-koe rɔ wo bolo, wo le kɛ la -- wo ya Allala Ni Sɛnimɛ sɔrɔn tɔn-birɛ le fɛ, wa? Ade! Wo ya kibara-nyimɛ lamɔɛn min kɛ ka la a la, wo ya ata Ni Sɛnimɛ sɔrɔn wo le fɛ. 3Wo ara kun-takolonyɛ kɛ kama? Wo ya min dabira Allala Ni Sɛnimɛ baraka rɔ, wo si ke wo da fala wo nyɛrɛta sɛnbɛ le la, wa? Wo ti ke mala ni! 4Koe min bɛɛ ara ma wo ye nun, wo dama ara ma fuyi la, wa? Wo ni a lɔn ko koe kɛnu ma kɛ fufafu! 5Alla le ya ata Ni Sɛnimɛ di wo ma ka kabana koenu kɛ wo tɛma. A ya wo ma le ka a tɛgɛ tɔn kitabu ara min fɔ, wa? Ade, a ya wo ma ka a tɛgɛ wo ara kibara-nyimɛ lamɔɛn nya min ka dɛnkɛninya Yisa ma. 6Wo ni wo miri min mara ma benba Iburayima la. A sɛbɛnɛ Allala kitabu rɔ ko, “Iburayima dɛnkɛninyara Alla ma min kɛ, Alla ya a rabira iko mɔgɔ-telennɛ.” 7Wo ni a lɔn ko dɛnkɛninyɛ ye min bolo, Iburayima bɔnsɔn-bɛrɛbɛrɛ le wo tigi la. 8Allala kitabu ya a labɔ gbɛ rɔ ma ye bi ma, ko Alla si sibolo gbɛrɛnu fanan natelen a nyɛrɛ ye dɛnkɛninyɛ fɛ. Wo le ya a ma, Alla ya kibara-nyimɛ wo fɔ Iburayima ye. A sɛbɛnɛ ko Alla si ata duwɛ kɛ duninya-mɔgɛ bɛɛ ye Iburayima baraka rɔ. 9Iburayima dɛnkɛninyara min kɛ, a ya Allata duwɛ sɔrɔn. Woletɔ min bɛɛ dɛnkɛninyanɛ, wonu bi duwɛ sɔrɔnna le iko ale. 10Kɔnɔ minnu yigi sanɛ anuna tɔn-birɛ kuma, wonu bi dankɛ kɔrɔ bawo a sɛbɛnɛ Allala kitabu rɔ ko, “Ni min ti tɔn bɛɛsi bira, wo tigi ye Allata dankɛ kɔrɔ!” 11Nba, a ara gbɛ feu, ko mɔgɔ wo mɔgɔ ti ke telenna Alla ye tɔn-birɛ fɛ. Ado a sɛbɛnɛ Allata kitabu rɔ fanan ko, “Min ba telen Alla ye dɛnkɛninyɛ fɛ, wo tigi si nimayɛ sɔrɔn.” 12Dɛnkɛninyɛ mako sa tɔn wara-koe la. Iko a sɛbɛnɛ Allala kitabu rɔ nya min ko, “Ni min si tɔn mumɛ bɛɛ bira, wo tigi si nimayɛ sɔrɔn tɔn-birɛ wo fɛ.” 13Nba, Kirasiti sɔnta mala dankɛ bila min kɛ, a ya ma hɔrɔya mala dankɛ wo ma min sɛbɛnɛ tɔn kitabu rɔ. A sɛbɛnɛ Allala kitabu rɔ ko, “Mɔgɔ wo mɔgɔ furi dunnɛ kɔlɔma la, wo tigi ye Marita dankɛ kɔrɔ” 14Wo bɛɛ mara le alako male fanan ni Allata Ni Sɛnimɛ sɔrɔn dɛnkɛninyɛ fɛ iko Alla ya lanyiri kiri ma ye nya min nun. Alla ya lanyiri min kiri Iburayima ye, sibolo gbɛrɛnu fanan ni lanyiri kelan wo sɔrɔn ka a tɛgɛ Yisa Kirasiti ya min ma ma ye. 15N na kelen nyɔgɛnu, n bi a fɛ ka Allata lanyiri sanka koe do ma min bi mala tuma-wo-tuma. Mɔgɔ fila wa sara min ma, mɔgɔ wo mɔgɔ ti sarama-kan wo tinya. Ado mɔgɔ ti fenfen kofu wo ma tun. A sa wo nya na le? 16Nba, Alla ara lanyiri kiri Iburayima anubɛ a bɔnsɔn do ye. Ado a ma sɛbɛ ko lanyiri wo kirinɛ a bɔnsɔn bɛɛ le ye fɔ mɔgɔ kelen pe, Kirasiti kɔni. 17N bi min ma, wo le kɛ la. Alla ya lanyiri min kiri Iburayima ye, a ara wo kanbali. Nba, Nɛbi Musata tɔn kitabu nara san kɛmɛ nani ani san bi-sawa (430) lanyiri wo kɔma. Tɔn wonu ti ke Allala lanyiri wo tinyana ka a ma fuyi la. 18Ni ma ko fɔ ma ni tɔn kitabu bira alako ma ni duwɛ wo sɔrɔn, ma ma duwɛ wo sɔrɔn lanyiri fɛ worɔ. Kɔnɔ Alla le ya a di Iburayima ma bawo a ya lanyiri kiri a ye le. 19Nba, Nɛbi Musata tɔn kitabu dira nfenna worɔ? A kofura lanyiri ma le alako ka mala ko-yogomɛnu nabɔ gbɛ ma. Ado tɔn kitabu wo ni to ha lanyiri kirita Iburayima bɔnsɔn minna ko la, wo ni na tumɛ min. Alla ya ata tɔn kitabu di melikanu ma alako anu ni a don Nɛbi Musa bolo. Ale le ya a latenbi mɔgɛnu ma. 20Ni mɔgɔ fila ye sarama-kan kirila, anu makoe ye mɔgɔ gbɛrɛkɛ la min si taran anu tɛma. Kɔnɔ Alla kelen pe le mako sa sereyɛ la. 21Nba, Nɛbi Musata tɔn kitabu ye Allata lanyiri kan ma, wa? Ade, a sa wo nya na de! Ni tɔn do ya niyi di mɔgɛnu ma nun, mɔgɔ si telen Alla ye tɔn-birɛ fɛ nun. 22Kɔnɔ a sɛbɛnɛ Allala kitabu rɔ ko duninya bɛɛ ye hakɛ sɛnbɛ kɔrɔ. Woletɔ lanyiri wola duwɛ ye wonu ye minnu dɛnkɛninyanɛ Yisa Kirasiti ma. 23Ado yanni wati ni ke ka dɛnkɛninya Yisa ma, Nɛbi Musata tɔn kitabu ya ma dama mara iko yelela-mɔgɛnu, ha Alla ya a yira mɔgɛnu na anu ni dɛnkɛninya Yisa ma tumɛ min. 24Ado tɔn wara-koe tora ma kuma alako a si ma kolo nya min ha Kirasiti ni na. A nara alako ma si telen Alla ye dɛnkɛninyɛ fɛ nya min. 25Nba, ma dɛnkɛninyanɛ min kɛ, ma mako sa kolole wo la tun. 26Wo dama ara ma Allala dan la ka a tɛgɛ wola dɛnkɛninyɛ Yisa Kirasiti ma. 27Wola batasili rɔ, wobɛ Yisa Kirasiti ara ma kelen na. Wo mara tumɛ min, wo ara Kirasiti sɔn bila wo kan na iko fɛrɛya-bɔɛ. 28Woletɔ dan-nafara mumɛ sa Yahudiyanu anubɛ sibolo gbɛrɛnu tɛma worɔ. Hɔrɛ anubɛ yɔɔn wo, keinubɛ musinu wo, wo dama ara ma fen kelen na Yisa Kirasiti rɔ. 29Ni Kirasititɛ le wole la, Iburayima bɔnsɔn le wole la worɔ. Ado Alla ara lanyiri kiri Iburayima ye min na, wo si wotɛ sɔrɔn lanyiri wo rɔ.

will be added

X\