Kalesiya 1

1Nde, Pɔli le ye kɛdi kɛ sɛbɛla. Ado mɔgɔ ma n sɔ wɔlɛ kɛ la. Mɔgɔ ma n ma kilayɛ la fɔ Yisa Kirasiti anubɛ ma Fa Alla min ya Yisa lawuli ka bɔ furinu tɛma. 2Mabɛ ma na kelen nyɔgɛ dɛnkɛninya-mɔgɛ min bɛɛ ye yan, ma ye wole Kalesiya dɛnkɛninya-mɔgɛnu kɔndɔnna. 3Alamɛ ma Fa Alla anubɛ ma Mari Yisa, Allata-Mɔgɔ-Yabɔnɛ ya hinɛ yira wo la ka yisi-kimɛ di wo ma. 4Kirasiti ya ma Fa Alla sako kɛ ka a nyɛrɛ niyi ni male hakɛ tiginuna ko la. A ya wo ma alako ma ni hɔrɔya wati-yogomɛ kɛ ma. 5Gbiliyɛ ni to Alla ye habadan! Amina. 6N kawanɛ wole Kalesiya kɛnu ma! Wo ara Allata kilɛ boloka tiriya! Ado ale le ya wo yabɔ ata hinɛ fɛ kɔnɔ wole lara ko-gbɛrɛkɛ la, anu bi min kelela ko kibara-nyimɛ. 7Kɔnɔ kibara-nyima-gbɛrɛkɛ sa mumɛ! Mɔgɛ donu bi nyɔ minnu bi wo tɔrɔla. Anu bi anu tayala ka foninyɛ basan Kirasitila kibara-nyimɛ la. 8Ni mɔgɔ ya kibara-nyima-gbɛrɛkɛ kawandili bɔ wo ye min faranɛ mala kawandili kɛ la, alamɛ a yilikira nyahanama rɔ pɔ! Hali male le ya wo ma, ni wo ma, melika ka bɔ Arinyɛni tɔ, alamɛ a yilikira. 9Ma ara kɛ fɔ nun. Ado kaka, n bi a fɔla tun. Ni mɔgɔ wo mɔgɔ ya kibara-nyima-gbɛrɛkɛ kawandili bɔ wo ye, alamɛ a yilikira nyahanama rɔ pɔ! 10N sa n tayala ka mɔgɛ hɛnɛ koe kɛnu tɔ! N bi a fɛ ka Alla kelen pe le hɛnɛ. Wo miri ko n bi n tayala ka diya mɔgɛnu ye, wa? Ni n bi n tayala ka diya mɔgɛnu ye, n ti ma Kirasitila wɔli kɛlɛ la nun mumɛ! 11N na kelen nyɔgɛnu, n ni kɛ fɔ wo ye. N bi kibara-nyima-kawandili min bɔla, wo ma bɔ hadama-den-miriya rɔ. 12N ma a sɔrɔn mɔgɔ bolo. Ado n ma wo karan mɔgɔ bolo. Yisa Kirasiti nyɛrɛ, wo le ya a labɔ gbɛ rɔ n ye. 13N bi nya min nun, wo tumɛ n bi Yahudiyanuna dina rɔ, wo ya wo lɔn. N ya a lagbɛlɛya Allata chɔchi kuma nun dɔgɔma ma de! Ado kinikini woo sa n tɔ nun anuna ko la fɔ anu kasara koe. 14N tenbira n ta-nyɔgɔn siyaman na Yahudiyanuna dina rɔ. Ma benbanuna namunyɛ hɔnya taranta n na bɛrɛkɛ! 15Kɔnɔ yanni n ni sɔrɔn, Alla le ya n yabɔ ata hinɛ fɛ. A ya n kele ko n ni wɔlɛ a ye. 16A ya a latɛgɛ ko a ni ala dan labɔ gbɛ rɔ n ye. A ko n ni ala kibara-nyima-kawandili bɔ wole sibolo gbɛrɛnu ye. Ado n ma ta mɔgɔ wo mɔgɔ wara alako n ni hɛnkili sɔrɔn. 17Minnu mara kilayɛnu na n yarɔ nun Yerusalɛm, n ma ta wonu fanan bara. N tara Arebiya nyamanɛ le rɔ kelenna. Wo kɔma, n sɛgira Damasika soe burɔ. 18San sawa wo kɔma, n tara Yerusalɛm ka kuma Pita ye. N tora a fɛ lɔgɔkun fila. 19N ma kilaya gbɛrɛ yen fɔ Mari Yisa dɔgɛ Yemesi. 20Alla le n sere la! N bi min sɛbɛla kɛ, tonyɛ le serr! N sa foninya fɔla. 21Wo kɔma, n tara Siriya anubɛ Salesiya nyamanɛnu tɔ. 22Wo wati bɛɛ kɔrɔ, dɛnkɛninya-mɔgɛ minnu bi Yudiya nyamanita chɔchinu tɔ, wonu ma n yen bɛ nun. 23Anu bi a lamɔɛnna le dɔrɔn ko, “Kei min ya a lagbɛlɛya ma kuma fɔlɔ nun, a ye dɛnkɛninya-koe-kawandili bɔla kaka. Ado a ya a raya ka mala dɛnkɛninyɛ wo tinya nun!” 24Woletɔ anu ya Alla tanto ndela ko la.

will be added

X\