Ɛfɛsa 6

1Wole dannu, wa wo sɔrɔnnɛnuna kumɛ bira bawo Marita mɔgɛ le wonu na. Ado wo le telenta. 2Alla ko, “I ni i fa anubɛ i na gbiliya alako i ni hɛrɛ anubɛ simayɛ sɔrɔn dugu kole kuma.” Tɔn kɛ, ale le tɔn fɔlɛ la lanyiri kirita minna ko la kɔni. 4Wole denbɛnu, wo kana wola dannu manyini fɔ ka anu makolo dɛnkɛninyɛ makololi-nya la. 5Wole yɔɔnnu, wo ni wo tiginuna kumɛ bira kilan anubɛ yɛrɛyɛran rɔ. Wo ni wola wɔlɛ kɛ wo yisi bɛɛ la iko wo ye a kɛla Kirasiti ye nya min. 6Wo ni wola wɔlɛ kɛ wo sɛbɛ la hali anu kɔma. Wo kana a ma alako anu ni wo matɔgɔ. Wo ni Alla-diyana-koenu kɛ wo yisi bɛɛ la iko wo ye wɔlila Kirasiti ye nya min. 7Nba, wo ni wola yɔɔnya-wɔlɛ kɛ sewɛ la iko wo ye a kɛla Mari ye nya min, wo tiginu dɔrɔn ma de! 8Wo ni a lɔn ko i mara yɔɔn na wo, i mara hɔrɔ la wo, Mari si mɔgɛ bɛɛ sara ala wɔlɔ-nyimɛla ko la. 9Wole yɔɔn-tiginu, wo ni wola yɔɔnnu bira wo nya na le fanan. Wo fara anu niyi ragbɛrɛnna anu ma. Wo ni a lɔn ko wobɛ wola yɔɔnnu, wo Tigi kelen de Arinyɛni tɔ. Ale ti mɔgɛ do lafisaya do ko. Bɛɛ kelen de a yala. 10Nba, ka kumɛ kundon, Marita sɛnbɛ ni a ma, wo ra ni gbɛlɛya. 11Alla ye kɛlɛ-kɛ-miran min bɛɛsi dila wo ma, wo ni wo bɛɛsi bi, woletɔ wo sɔnɛ si to Setanɛta halliya-yogomɛnu kuma. 12Ma sa mɔgɛnu kɛlɛla fɔ pinpirɔ-koe minnu ti yen yɛ la. Dogonta-koe minnu bi kan tinɛ bɛɛ rɔ, a nyina-kun-tigi wo, a fenfen min bi Alla kan ma wo, ma ye wonu denu kɛlɛla. 13Woletɔ fɔ wo ni Allata kɛlɛ-kɛ-miran kɛnu bi kaka! Ado wo kɛlɛ tele wa ke tumɛ min, wo si ke ka wo yoge kɛlɛ ka a nɔ. Wo wa ban kɛlɛ kɛla tumɛ min, wo sɔnɛ si to wo gbɛ rɔ gben! 14Wa wo rabɛn ka wo sɔ yiri! Wo ni wo buta kiri tonyɛ la. Wo ni telenbagayɛ ma wo kɔgɔ-matanka-fan la. 15Kibara-nyimɛ min si yisi-kimɛ di mɔgɛ ma, wo fɔɛ ni ma sanbarɛ la wo kian rɔ. 16Min sanɛ kɛnu kuma, wo ni dɛnkɛninyɛ ma nɛgɛ-lufɛ la, woletɔ Setanɛ wa ala kalabɛn-namalannɛnu nakɛ wo ma, wo si ke wo bɛɛ ladufenna. 17Wo ni kisi-koe ma wola kɛlɛ-fulɛ la. Allata Ni Sɛnimɛ ye ata kumɛ min dila wo ma, wo ni ma wola faan la. 18Wo ni to madiyali kɛla tuma-wo-tuma koe bɛɛla ko la iko ata Ni Sɛnimɛ ye wo labilala nya min. Wo yɛ bɛnnɛ ni to. Wo kana bandan madiyali kɛla Allata mɔgɛnu ye. 19Wo ni Alla matara nde, Pɔli ye fanan ko n ba wuli kumala tumɛ min, Alla ni kumɛ don n da rɔ. Wo ni ma alako n ni kuma yisi-latɛgɛ rɔ ka kibara-nyimɛ gbundu koe labɔ gbɛ ma. 20Bawo hali n bi yele la kaka, kilayɛ le n na kibara-nyimɛla ko la. Woletɔ wo ni Alla matara n ye ko n ni kuma yisi-latɛgɛ rɔ iko a bɛnnɛ n ni kuma nya min. 21Ma na kelen nyɔgɛ Tikika, ma diyana-mɔgɛ kɔni, mɔgɛ le wo la min si Allala wɔlɛ kɛ a sɛbɛ la. Min bi mala n na, ale le si wo bɛɛ fɔ wo ye. 22N bi a latala wo ma alako a ni ma damala koenu fɔ wo ye ka wo yisi-kima-kumɛ fɔ. 23N na kelen nyɔgɛnu, alamɛ ma Fa Alla anubɛ ma Mari Yisa, Allata-Mɔgɔ-Yabɔnɛ ya yisi-kimɛ di wo ma anubɛ keninteyɛ anubɛ dɛnkɛninyɛ. 24Alamɛ Allata hinɛ tora wo dama fɛ minnu bi ma Mari Yisa, Allata-Mɔgɔ-Yabɔnɛ kenina tɛban!

will be added

X\