Kɔlɔsi 3

1Wobɛ Kirasiti la ara wuli wo nyɔgɔn fɛ min kɛ, nba, wo ni to wo mirila wo koenu ma minnu bi Arinyɛni tɔ. Ado Kirasiti siginɛ nyɔ rɔ ala mansaya-sigi-fan kuma Alla kɔɛn-nyimɛ rɔ. 2Wo ni to wo mirila nyɔ-koenu ma dɛɛ! Wo kana wo miri dugu-kole-kɛ-koenu ma dɔrɔn. 3Wo ni wo ma bawo wola nimayɛ maranɛ Kirasiti fɛ Alla baraka rɔ. A manɛ iko wo ara faga koe wonu ma. 4Ka Kirasiti ma i Mari la, wo si ma nimaya-bɛrɛ la wo ye worɔ. Nba, Kirasiti wa bɔ gbɛ rɔ tumɛ min, wo dama si gbiliyɛ sɔrɔn wo nyɔgɔn fɛ. 5Duninya-nata min bi wɔlila wo rɔ, wo ni wo faga. Yɛlɛnyɛ wo, ko-kɔsɔnɛ wo, keni-yoge wo, nata-yogomɛnu wo, wonu fenfen kana sigi tina sɔrɔn wo yisi rɔ. Fan minnu bi duninya kɛ rɔ, wonu bi-sɔgɛ kana wo bira bawo bɛsi kɔ koe su do le wonu na. 6Koe kɛnu bi a mala, Allala diminyɛ si na ala kuma-birabɛlɛnu kan ma. 7Nba, wo tumɛ wo ye tagamana nata wonu tɔ, wo nyɛrɛ fanan bi wonu sufa le mala nun. 8Nba, wo ni koe kɛ bɛɛ boloka kaka, yisi-bɔɛ wo, diminyɛ wo, anubɛ wunduyogoyɛ. Tanama-kumɛ anubɛ kuma-gbondanɛ kana bɔ wo dɛ rɔ mumɛ! 9Wo kana foninyɛ fɔ wo nyɔgɔn ye bawo wo ara mɔgɔya-kɔrɛ boloka anubɛ wo kɛ-nyanu. 10Wo ara ko-kurɛ bila wo kan na. Ko-kurɛ kɛ ladanta Alla le bolo ado a ye tola wo lakurayala alako a ni to wo lakanbalila Yisa-nyɛrɛ-lɔn-koe rɔ. Ale le ya ko-kurɛ kɛ ladon wo yisi rɔ. 11Yahudiya wo, Yahudiya ma minnu na wo, kemininya wo, kemininyabɛli wo, mɔgɔ gbɛrɛkɛ wo, ko-lɔnbɛli wo, hɔrɔ wo, yɔɔn wo, dan-nafarɛ sa wo fenfen tɔ ni-kurɛ kɛ rɔ. Kirasiti tenbira koe kɛ bɛɛsi la. Ado ale siginɛ wo bɛɛ yisi rɔ! 12Allala mɔgɛ le wole la. A ara wo keni ka wo yabɔ a nyɛrɛ ye. Woletɔ wo ni kinikinɛ anubɛ nyimayɛ anubɛ famayigiyɛ anubɛ dinyɛ anubɛ munyɛ don wo ma. 13Wo ni wo nyɔgɔn dɛnbɛ. Kumɛ wa wuli wo nyɔgɔn tɛma tumɛ min, wo ni wo nyɔgɔn makoto. Wo ni wo nyɔgɔn makoto iko Mari ara wo fɔlɔn makoto nya min. 14Keninteyɛ min bi wo kirila wo nyɔgɔn ma, wo ni sa kɛ bɛɛ kuma alako wo ni ma kelen na. 15Kirasiti ye yisi-kimɛ min dila mɔgɛnu ma, wo ni kun-tigiyɛ kɛ wo yisi rɔ. Alla ara wo ladɛn ka wo ma bagbu kelen na alako wo si yisi-kimɛ kɛ su lɔn nya min. Wo kana ma fisiriwɔlɛnu na. 16Kirasitita kumɛ ni sigi wo yisi rɔ ka wara nyɔ. Wo ni wo nyɔgɔn karan ka wo nyɔgɔn makawandi hɛnkilimayɛ la. Wo ni to bɛtinu bɔla Yaburi kitabu rɔ ka sigi-sɛnimɛnu sa. Wo ni bɛti wonu bɔ Alla ye baraka-birɛ la wo yisi rɔ. 17Wo ye koe min bɛɛ kɛla anubɛ wo ye koe min bɛɛ fɔla, wo ni wo bɛɛ kɛ Mari Yisa tɔgɛ rɔ. Wo ni baraka bira ma Fa Alla ye Mari Yisa baraka rɔ. 18Wole musinu, wo ni wola keinuna kumɛ bira bawo dɛnkɛninya-mɔgɛ le wole la. A bɛnnɛ wo ni wo ma. 19Wole keinu, wo ni wola musinu keni. Wo kana wo ya-ragbɛlɛya anu ma. 20Wole dennɛnu, wo ni wo sɔrɔnnɛnuna kumɛ bira tumɛ bɛɛ bawo wo le ye Alla hɛnɛna. 21Wole denbɛnu, wo kana wola dannu yakɔrɔ-mamɔ nya do ma min si anu yisi tinya. 22Wole yɔɔnnu, wo ni wo tiginuna kumɛ bira koe bɛɛ rɔ. Wo ni wola wɔlɛ kɛ, hali anu ya sa wo la. Wo ni anu hɛnɛ wo yisi bɛɛ la alako Mari ni gbiliyɛ sɔrɔn wo bolo. 23Wo ye wɔlɛ min bɛɛ kɛla, wo ni wo ma wo yisi bɛɛ la iko wo ye wɔlila Mari ye nya min. Wo sa a mala mɔgɔni-gbuyi ye. 24Wo ni wo hɛnkili to kɛ ko. Mari ya barayi min namara wo ye gben, a si wo di wo ma le! Wo tigi bɛrɛbɛrɛ le Mari la, wo ye wɔlila min ye kɔni. 25Kɔnɔ ni wo ya ko-yogomɛ kɛ, wo si wo sarɛ sɔrɔn bawo Alla ti mɔgɔ lafisaya a nyɔgɔn ko. Mɔgɛ bɛɛ kelen a yala.

will be added

X\