Kɔlɔsi 1

1Nde, Pɔli min mara kilayɛ la Yisa Kirasiti bolo Alla sako fɛ, mabɛ n na kelen nyɔgɛ Timoti le ye kɛdi kɛ sɛbɛla 2ka a lata wole, Allala mɔgɛnu ma Kɔlɔsi soe burɔ. Ma na kelen nyɔgɛ le wole la ka a tɛgɛ wola dɛnkɛninyɛ ma Kirasiti rɔ. Ado lanaya-mɔgɛ le wole la fanan. Alamɛ ma Fa Alla hinara wo la ka yisi-kimɛ di wo ma. 3Ma tenbi tarali kɛla wo ye, ma ye baraka birala Alla ye tumɛ bɛɛ. Alla kɛ, ma Mari Yisa Kirasiti Fa le wo la. 4Ma ye wo mala bawo wo lara Yisa Kirasiti la nya min anubɛ Allala mɔgɛnu keninɛ wo bolo nya min, ma ara wo lamɔɛn. 5Ado kebi wo ya kibara-nyimɛ kɛ lamɔɛn a fɔlɛ rɔ, wo tora lala wo la ka wo yigi sa a kuma gben! Wo ye wo mala bawo wota sewɛ maranɛ wo ye Arinyɛni tɔ. 6Kibara-nyima-kelan kɛ min nara wole ma, wo ye nyɛnsɛnna duninya kan tinɛ bɛɛ rɔ. Kebi wo ya Allata hinɛ lɔn tumɛ min a bɛrɛbɛrɛ-wɛ ma, ha bi, a ye mɔgɛnu yɛlɛmana iko a ara wole yɛlɛma nya min. 7Ma diyana wɔli-kɛ-nyɔgɛ Ɛpafarasi ya wo karan wo ma. Kirasitita lanaya-wɔli-kɛlɛ le ale Ɛpafarasi la male gbɛ rɔ. 8Allala Ni Sɛnimɛ ara keninteyɛ min nyɔgɔn di wo ma, a ya wo rakaran ma ye. 9Wo le ya a to, kebi ma ya wo wara-koe lamɔɛn, ma ye Alla matarala wo ye tumɛ bɛɛ. Ma ye a matarala ko Alla ye min fɛ wo bolo, wo ni wo lɔn. Ma ye a matarala fanan ko a ni Allata Ni Sɛnimɛta hɛnkili anubɛ ata lɔnnɛ di wo ma. 10Ni wo mara, wo si ke ko ladanna iko Mari ye a fɛ, wo ni ko ladan nya min. Wo si a hɛnɛ koe bɛɛ rɔ tumɛ bɛɛ. Wo kɔma, wo si to ko-nyimɛ kɛla mɔgɛnu ye. Wo bɛɛ rɔ, wo si to koloyala Alla-lɔn-koe rɔ. 11Ma ye a matarala fanan ko wo ni sɛnbɛ sɔrɔn bɛrɛkɛ ka bɔ ata sɛnbɛ-makawanɛ rɔ. Wo le si a ma, wo ni ke a birala wo rɔ ka wo munyu koe bɛɛ rɔ. Ado wo bɛɛ rɔ, wo 12ye baraka birala n Fa Alla ye sewɛ rɔ. A ara ko-rabɛn-kɛ ko wo ni wotɛ sɔrɔn min maranɛ ala mɔgɛnu ye. Ado wo siginɛ ata mansaya-waan kɔrɔ. 13A ara ma kisi pinpita sɛnbɛ ma ka na ma la a diyana-danta mansaya-sɛnbɛ kɔrɔ. 14Alla le ya ma hakɛ bɛɛ makoto Yisata sayɛ fɛ, min ya a ma, ma ara hɔrɔya. 15Alla min ti yen, ata muninyɛ le Kirasiti la. Yanni fenfen ni dan, a ye nyɔ nun ado dali-fan-bɛɛta kun tigi le ale la. 16Alla ya fan bɛɛ dan ale le baraka rɔ. Min bi san kole rɔ wo, min bi dugu kole kuma wo, fan min si yen wo, min ti yen wo, Allata nima-fan bɛɛ, a mara a melika la wo, a mara a nyina la wo, a mara a hadama den na wo, Alla ya fan bɛɛ dan ale le baraka rɔ. A ya wonu dan alako wonu ni ma atɛ la. 17Yanni fenfen da ni bira, ale ye nyɔ nun. Ado ale le si dali-fan-bɛɛ mara a kɔɛn rɔ. 18Chɔchi kunyɛ le Kirasiti la, a bagbuyi kɔni. Ale le fɔlɔn wulita furinu tɛma. Wo mara le alako a ni sɔ-tina fɔlɛ sɔrɔn koe bɛɛ rɔ. 19Ado Alla le nyɛrɛ ya a latɛgɛ ko a nyɛrɛ kɛ-nya-bɛɛ ni to Kirasiti rɔ. 20Fan minnubɛ Alla faranɛ nun, a ya wo bɛɛsi lasɛgi a nyɛrɛ ma tun Yisa Kirasiti baraka rɔ. Alla ya yisi-kimɛ ladon duninya rɔ Yisata sayɛ fɛ kɔlɔma ma. Fan minnu bi dugu kole kuma wo, fan minnu bi san kole rɔ wo, a ya fan wo bɛɛ lasɛgi a nyɛrɛ ma ale Yisata sayɛ fɛ. 21Fɔlɔ nun, wo gbɛrɛnni ma Alla ma! Wola kɛwɔli yogomɛ anubɛ wo miriyanu ya a ma, wo mara a yogenu na. 22Kɔnɔ kaka gbɛ, Alla ara wo ma a diyana-mɔgɛnu na ala danta sayɛ fɛ. A ye a fɛ, a ni na wo la a fa Alla ma, wo sɛninyanɛ de worɔ. Fɛɛ woo sa wo la, ado wo ara ma mɔgɔ-magbalanɛ la. 23Nba, wo ni wo sɔ yiri, wola dɛnkɛninyɛ rɔ. Wo kana sɔn, wo ni maga ka bɔ yigi wo rɔ. Wo ya kibara-nyimɛ lamɔɛn tumɛ min, wo ya yigi wo sɔrɔn. Nde, Pɔli le mara kibara-nyimɛ wota wɔli kɛlɛ la. Ado kibara-nyimɛ wo ara ke duninya-mɔgɛ bɛɛ ma. 24Nba, anu ba n tɔrɔ tumɛ min, n si sewa wola ko la. Bawo n bagbuyi ye tɔrɔyɛ min sɔrɔnna, n bi Kirasitila tɔrɔyɛ le makofula ata chɔchila ko la wo la, a bagbuyi kɔni. 25Alla ara n ma ata kuma-lakelɛ la alako n ni ata kumɛ-mumɛ-bɛɛ-lakofunɛ lake wole sibolo gbɛrɛnu tɛma. 26Alla ya gbundu koe min dogon fɔlɔ-mɔgɛnu ma, a ara wo labɔ gbɛ rɔ a nyɛrɛta mɔgɛnu ye gbɛ! 27Ado Allata ko-rabɛn le wo la alako ata mɔgɛnu ni ala gbundu koe lɔn. Gbundu koe wo makawara, a gbiliyanɛ. Gbundu koe wo le ko Kirasiti siginɛ wole sibolo gbɛrɛnu fanan yisi rɔ. Yigi le wo la alako wo fanan ni wotɛ sɔrɔn Allata gbiliyɛ wo rɔ iko male Yahudiyanu. 28Woletɔ ma wa ta kan tinɛ min bɛɛ rɔ, ma si Yisa Kirasitita kawandili bɔ mɔgɛ bɛɛ ye nyɔ. Ma ye mɔgɛ bɛɛ lalɔnna ka anu karan a ma ma hɛnkili bɛɛ la alako ma ni mɔgɔ kelen-kelennamɛ-bɛɛ-kanbalinɛ lana Alla ma Kirasiti rɔ. 29N bi wɔlila wola ko la ka n taya bɛrɛkɛ! Kirasiti ye fanka min dila ma ma, fanka wo ye wɔlila n tɔ.

will be added

X\