Kɛwɔlɛnu 26

1Mansa Agaripa ya a fɔ Pɔli ye ko, “Nba, itɛ lakaran!” Pɔli ya a bole layɛlɛ. A ya a nyɛrɛ fɛka ka le, a ko, 2“Mansa Agaripa! N na kelen nyɔgɛ Yahudiyanu bi n maburila minna ko la, a ara a diya don n tɔ ko n bara fɛrɛ sɔrɔn bi ka n nyɛrɛ fɛka i yala wo bɛɛla ko la 3bawo ile ya Yahudiya-namu anubɛ mala sɔsɔli-kurinu lɔn feu! Woletɔ n bi i madiyala ko i ni i munyu n kɔrɔ ka i wɔlɔ matɔlɔ. 4“Yahudiya bɛɛ ya n sɔn lɔn kebi n dennɛ. Anu ya a lɔn n bara ma nya min n nyɛrɛta nyamanɛ rɔ anubɛ Yerusalɛm soe burɔ. 5Ni anu si sɔn ka wo sereyɛ bɔ, anu ya a lɔn serr, ko kebi fɔlɔ n tora Farisiyɛ rɔ iko mala dina gbɛlɛmɛ ye nya min. 6Nba, Alla ya lanyiri min kiri ma benbanu ye, anu bi n kitila wola ko la gbɛ! 7Su-ni-tele, ma bɔnsɔn tan-ni-filɛ bɛɛ ye Alla batola ka anu yigi sa lanyiri kelan wo kuma. Mansɛ, Yahudiyanu bi n maburila wo yigi lela ko la! 8Ka a fɔ ko Alla ye furinu nawulila, nfenna a gbɛlɛ wo ya la ka la wo la? 9“Nde nyɛrɛ ya n miri ko fɔ n ni wuli Yisa Nasarɛti kɛ kan ma ka a tɔgɛ tinya koe bɛɛ rɔ. 10Ka a dabira Yerusalɛm, n ya wo ma. N ya sarati sɔrɔn saraka-masɔla-wɛnu bolo ko n ni Allala mɔgɔ siyaman nadon yele la. Anu faga koe fɔra tumɛ min, nde nyɛrɛ sɔnta wo ma. 11N ya anu tɔrɔ mata dina-bɔnnu na kinyama siyaman. N ya n taya ko anu ni anuna dɛnkɛninyɛ boloka. N yisi bɔra anu kan ma ha n tara sibolo gbɛrɛnuta soenu tɔ anu tɔrɔ tinɛ. 12“Nba, Mansɛ, saraka-masɔla-wɛnu sɔnta nun ko n ni ta Damasika soe burɔ anu bira koe la. 13N bi Damasika kilɛ la tumɛ min tele-latelen-wati, n ya wan-belebele yen min waan tenbira teletɛ la. Waan wo bɔra san ma ka yigi mabɛ n ta-nyɔgɛnu dafɛ. 14Ma dama buira dugi ma. N ya kuman kan do lamɔɛn. A ye a fɔla n ye Hiburu kan rɔ ko, ‘Sɔli, Sɔli, i ye n tɔrɔla nfenna? I ye i nyɛrɛ le madumala dɔrɔn iko turɛ min bi a kiri-kɔlɔma tɛnna.’ 15N ya nyinikalɛ kɛ ko, ‘N fa, yon bi ile la?’ Mari ya n yabi ko, ‘Yisa le nde la i ye min tɔrɔla. 16Nba, i lasɔ. N bara bɔ gbɛ rɔ i ye ka i ma nna wɔli kɛlɛ la. I wara min yen n bolo bi, anubɛ n bi nala min yirala i la, i ye wo le fɔla mɔgɛnu ye.’ 17A ko, ‘N bi i latala Isirɛla mɔgɛ anubɛ sibolo gbɛrɛ minnu ma, n si i kisi wonu masibɛ ma. 18I ni anu yɛ laka alako anu ni bɔ pinpi rɔ ka anu nana waan rɔ. I ni anu bɔ Setanɛta sɛnbɛ kɔrɔ ka anu nana Alla ma alako anuna hakɛ ma si koto anuna dɛnkɛninyɛ fɛ nya min. Anu si anuna sɔ tinɛ sɔrɔn Allala mɔgɔ yabɔnɛnu tɛma.’ 19“Woletɔ Mansa Agaripa, ko-rayirɛ min bɔra san kole rɔ, n ma wo masɔsɔ. 20Ka a dabira Damasika ha ka ke Yerusalɛm anubɛ Yudiya nyamanɛ bɛɛ ha sibolo gbɛrɛnu tɛma, n ya kawandili bɔ wo bɛɛ rɔ. N ya a fɔ anu ye ko anu ni fara hakɛ kɛla ko anu ni na Alla wara. N ko anu ni kɛwɔlɛ wonu kɛ min si a yira ko anu bara yɛlɛma. 21Wo le ya a to, Yahudiyanu ya n bira Alla Bato Bɔn la ka anu taya n faga koe ma. 22Kɔnɔ ha bi, Alla ye n dɛnbɛna. Woletɔ n sɔnɛ yan ka sereyɛ bɔ mɔgɛ bɛɛ ye, a nɔnfulu-tigi wo, a bolo-kolɔn wo, a filɛ bɛɛ. Nɛbi Musa anubɛ nɛbi doinu ya wɔlɔyiya-kumɛ minnu fɔ, n bi wonu denu fɔla anu ye. 23Anu ko a fɛrɛ sa, fɔ ale Allata-Mɔgɔ-Yabɔnɛ ni tɔrɔ. Wo kɔma, a ni ma a mɔgɔ fɔlɛ la min si wuli ka bɔ furinu tɛma. Anu ko a ni na waan la Yahudiyanu anubɛ sibolo gbɛrɛnu ye.” 24Pɔli ye a nyɛrɛ fɛkala tumɛ min, Sigisɔn-Mansa Fɛsitasi kumara a ma kan mayɛlɛnɛ la ko, “Pɔli, i wara yuwaya. Ila karan-wɛ kɛ ye i layuwayala.” 25Kɔnɔ Pɔli ya a fɔ a ye ko, “N tigi Fɛsitasi, n yuwayani ma. N bi kuma-kɛndɛ anubɛ tonya-kumɛnu denu fɔla. 26Ado Mansa Agaripa ya koe kɛnu lɔn serr! Woletɔ n si ke kumala i ye yisi-latɛgɛ rɔ. N lanɛ a la ko i wara koe kɛnu lɔn bɛrɛkɛ, bawo koe kɛnu ma kɛ dogɔn tɔ.” 27Pɔli ya a fɔ Mansa Agaripa ye ko, “Mansɛ, i lanɛ nɛbinuna kumɛnu na, nyɛ? N ya a lɔn ko i lanɛ wonu na!” 28Mansa Agaripa ya Pɔli fanan manyinika ko, “I ye i mirila ko i si ke a mala, n ni dɛnkɛninya Yisa ma wati-kundunɛ kɛ kɔrɔ, wa?” 29Pɔli ya a yabi ko, “Ni a mara wati-kundunɛ la wo, ni a mɛra wo, n bi Alla matarala ko wobɛ min bɛɛ wɔlɔ matɔlɔnɛ n na bi, wo ni ma iko nde ye nya min kɔnɔ anu kana yɔlɔkɛ kɛ wo ma!” 30Wo kɔma, Mansa Agaripa wo, Sigisɔn-Mansa Fɛsitasi wo, Bɛnasi wo, anubɛ mɔgɛ toe bɛɛ ya anu nasɔ. 31Yanni anu ni bɔ nyɔ tumɛ min, anu ya a fɔ anu nyɔgɔn ye ko, “Kei kɛ ma ko-wo-ko kɛ a si faga minna ko la. A ma ko tinya a si sa yele la min na.” 32Mansa Agaripa ya a fɔ Sigisɔn-Mansa Fɛsitasi ye ko, “Ni kei kɛ ma Romu nyamanɛ-kun-tigi-ba wo yen-koe fɔ nun, a si boloka le nun.”

will be added

X\