Kɛwɔlɛnu 23

1Pɔli ya Yahudiyanuna kun tiginu mafɛlɛn sin! A ko, “N kɔrɔnu! N bara wɔlɛ min bɛɛ kɛ Alla yala, fɛɛ sa n na wo la feu! Ha bi, n sɔndɔmɛ ma n yiliki ko-yogomɛ kɛla ko la hali!” 2Minnu sɔnɛ Pɔli dafɛ, Saraka-Masɔla-Kun-Tigi Ananayasi ya a fɔ wonu ye ko anu ni Pɔli dɛ ratii. 3Pɔli ya a fɔ saraka-masɔla-kun-tigi-wɛ ye ko, “Ile nafigi, i manɛ iko dandan magbɛnɛ. I sɔn ma kin. Ado Alla si ile gbesi, yɔ! I siginɛ nyɔ nde kitila Nɛbi Musala tɔn rɔ kɔnɔ i ya a fɔ mɔgɛnu ye ko anu ni nde gbesi. I ya Allala tɔn le tinya wo la!” 4Minnu sɔnɛ Pɔli dafɛ, wo do ya a fɔ a ye ko, “I ye Allala saraka-masɔla-kun-tigi-wɛ le manyinina wo la. I ma wo lɔn?” 5Pɔli ya anu yabi ko, “N kɔrɔnu, n ma a lɔn ko saraka-masɔla-kun-tigi-wɛ le nun. Ado a sɛbɛnɛ Allata kitabu rɔ ko n kana kuma-yogomɛ fɔ mala kun tigi ma.” 6Pɔli ya a yen ko dan-nafarɛ ye nyama tɛma, a fan kelan Sadusi, a fan kelan fanan, Farisi. Woletɔ a gbele-gbelenta kun tiginu tɛma ko, “N kɔrɔnu! Farisi le nde la. Ado n fa fanan, Farisi le. Anu bi n kitila min ma yan, wo le ko furi-lawuli-yigi ye n ma!” 7A ya wo fɔ nkɛkuna, Farisinu anubɛ Sadusinu wulita sɔsɔli sala. Dan-nafarɛ donta nyama tɛma. ( 8Ado Sadusinu ko furinu ti wuli ka bɔ sayɛ rɔ. Anu ko melika sa, ado niyi sa. Kɔnɔ Farisinu lara wo ko sawɛ bɛɛ la.) 9Woletɔ sɔnkɔ-sɔnkɛ koloyara. Tɔn-karan-mɔgɛ do minnu bi Farisinuna dina rɔ, wonu sɔra ka sɔsɔli ba kɛ ko, “Ni kei kɛ ara ko-yogomɛ kɛ, male ma wo yen! Tumado tonyɛ le, nima-fan do ara kuma a ye nun, ni wo ma, melika.” 10Sɔsɔli warata ha kɛlɛ-den-kun-tigi-ba wo kilanta ko tumado, anu si Pɔli rafarafara iko kura-kore. Woletɔ a ya a fɔ ala kɛlɛ dannu ye ko anu ni ta Pɔli bi nyama tɛma ka ta a la bariki rɔ anu ti kɛ a ma kan min. 11Suyi wo rɔ, Mari sɔra Pɔli dafɛ, a ko, “I ni i kerintɛya! I wara sereyɛ bɔ n ye Yerusalɛm yan nya min, a fɛrɛ sa fɔ i ni wo nyɔgɔn ma n ye Romu fanan.” 12Wo banda kɛ, Yahudiya donu ya anu nadɛn ka ko-rabɛn-kɛ. Anu ya anu dato ko anu ti fen dɔn ka anu min, ni anu ma Pɔli faga fɔlɔn. 13Minnu ya koe kɛ rabɛn anu nyɔgɔn tɛma, anu siya mɔgɔ bi-nani ko. 14Donu tara saraka-masɔla-kunyɛnu anubɛ anuna kun tiginu bara. Anu ko, “Ma dama ara ma dato ko ni ma ma Pɔli faga, ma ti fen dɔn. 15Woletɔ wole kun-tigi-toenu ni sarakanɛ lata Romu kɛlɛ-den-kun-tigi-ba wara. Wo ni a ma iko wo ye a fɛ le ka Pɔlila koe fɛsɛfɛsɛ a kilɛ fɛ. Wo ni a fɔ a ye ko a ni ale Pɔli latenbi wo ma. Male si ma rabɛn ka a faga kilɛ la.” 16Kɔnɔ Pɔli berennɛ ya yanfɛ kɛ lamɔɛn. Woletɔ anu ya Pɔli lamara bɔn min na bariki rɔ, wo tara nyɔ ka a rakaran a ye. 17Nba, Pɔli ya kɛlɛ-den-kunyɛ do kele ka a fɔ a ye ko, “Ta keminɛ kɛ la kɛlɛ-den-kun-tigi-ba wara. Koe do fɔ-sɔgɛ ye a la a ye.” 18Kɛlɛ-den-kun-tigi tara a la ala kɛlɛ-den-kun-tigi-ba wara. A ko, “Pɔli min bi yele la, wo le ko n ni na keminɛ kɛ la i wara. A ko kumɛ ye a bolo ka a fɔ i ye.” 19Ale kɛlɛ-den-kun-tigi-ba tara keminɛ wo la a dan na ka a manyinika ko, “Nfen fɔ-sɔgɛ ye i la?” 20Keminɛ wo ko, “Yahudiyanu bara a rabɛn ko sina, anu ni i madiya ko i ni Pɔli lata anuta kun tiginu ma. Anu bi a mala iko kun tiginu bi ala koe fɛsɛfɛsɛla a kilɛ fɛ. 21Mɔgɔ bi-nani nyɔgɔn bara anu dato ko ni anu ma ale Pɔli faga, anu ti fen dɔn ka anu min fɔlɔ. Anu tabɛnnɛ kaka ka kɛ a ma kilɛ la. Anu bi ile makɔnɔna ka a lɔn ni i ye min fɔla. I yandi, i kana sɔn anu ye.” 22Kɛlɛ-den-kun-tigi-ba wo ko, “I kana a fɔ mɔgɔ wo mɔgɔ ye ko i wara kɛ fɔ n ye.” A ya keminɛ boloka. Wo tara. 23Nba, kɛlɛ-den-kun-tigi-ba ya ala kɛlɛ-den-kun fila kele. A ko, “Wo ni kɛlɛ den kɛmɛ fila (200) bi, anubɛ so-laburila bi-wɔrɔnfila (70), anubɛ tanba-tigi kɛmɛ fila (200). Anu ni anu tabɛn ka ta Sɛsariya bi suyi rɔ mɔgɛnu-sun-wati (9 pm). 24Wo na soee donu na Pɔli ye. Wo ni a kandan kilɛ la alako a kɛndɛ ni ke Sigisɔn-Mansa Filikisi ma.” 25Wo kɔma, kɛlɛ-den-kun-tigi-ba ya kɛdi sɛbɛ ka le. A ko, 26“Nde, Kalodiyasi Lisiyasi ye ile Sigisɔn-Mansa-nyimɛ Filikisi kɔndɔnna bɛrɛkɛ! 27Yahudiyanu ya kei kɛ bira. A tora doni anu ni a faga. N ya hɛnkili sɔrɔn a ma ko Romu kɛ le, woletɔ mabɛ nna kɛlɛ dannu tara ka a bɔ anu bolo. 28Anu bi a maburila koe min na, n bi a fɛ ka wo lɔn nun. Woletɔ n tara a la anuna kun tiginu bara. 29Kɔnɔ n ya a yen ko a ma ko-wo-ko ma a si faga minna ko la, hali ka a ladon yele la minna ko la. Anu bi a maburila anuna dina tɔnla ko la dɔrɔn. 30A fɔra n ye ko Yahudiyanu bi yanfɛ donna a ma. Woletɔ n ya a latɛgɛ kelenna, ko ka a lata i ma. N ya a fɔ a maburilɛnu ye ko ni koe min bi anu kɔntɔ ale kan ma, anu ni wo fɔ ile yala.” 31Kɛlɛ dannu tara Pɔli la suyi wo rɔ fɔɔ Antipatari soe burɔ iko a fɔra anu ye nya min. 32Wo banda kɛ, kɛlɛ dan minnu tara anu kian la, wonu sɛgira anuna bariki rɔ. So-laburilɛnu tara Pɔli la. 33Wonu tara Pɔli la ha Sɛsariya soe burɔ ka a don Sigisɔn-Mansa Filikisi bolo. Anu ya kɛdi fanan don a bolo. 34Sigisɔn-mansɛ ya kɛdi wo karan. A ya Pɔli manyinika ko, “I bɔra nyamanɛ mintan tɔ?” A ya a lɔn tumɛ min ko a bɔra Salesiya nyamanɛ le tɔ, 35a ko, “I maburilɛnu ba ke yan tumɛ min, n si n tole masɔ ila kumɛ la worɔ.” Wo kɔma, a ya a fɔ ko kandannɛnu ni Pɔli mara bolɔn la Mansa Hɛrodi ya min sɔ nun.

will be added

X\