Kɛwɔlɛnu 22

1Pɔli ya a fɔ anu ye ko, “N fanubɛ n kɔrɔnu, wo ni wo wɔlɔ matɔlɔ n na, n ni n nyɛrɛ fɛka wo yala!” 2Anu ya a lamɔɛn a ye kumala anuna kan rɔ tumɛ min, anu ya anu made don! Pɔli ko worɔ, 3“Yahudiya le nde la. N sɔrɔnta Tarasa soe burɔ Salesiya nyamanɛ rɔ kɔnɔ n makolota n karan-mɔgɔ Kameliyɛ bolo Yerusalɛm yan karan-denyɛ la. N ya ma benbanuna tɔn lɔn a kila bɛrɛbɛrɛ fɛ! N bara n nyɛrɛ di Allata wɔlɛ ma fasai iko wo dama ye nya min yan bi. 4N ya Yisata mɔgɛ kɛnu tɔrɔya ka wo donu faga anu tɔ. N ya keinubɛ musinu bira ka anu nadon yele la. 5Saraka-masɔla-kun-tigi-wɛ anubɛ anuna mɔgɔ ba dama si ke wo sereyɛ bɔla ko n bi tonyɛ le fɔ tinɛ wo la. Anu denu ya kɛdinu di n ma minnu sɛbɛnɛ ma na kelen nyɔgɛ Yahudiyanu ma Damasika soe burɔ alako n ni ta mɔgɛ wonu bira tinɛ nyɔ nun. N tara alako n si anu kiri yɔlɔkɛnu na nya min ka sɛgi anu na Yerusalɛm anu tɔrɔ tinɛ. 6“Nba, n gbɛrɛnnɛ Damasika soe ma tele latelan wati, wan-belebele bɔra san ma tiriya ka nna foolɛ bɛɛ lamalan. N buira dugi ma. 7N ya kuman kan lamɔɛn n manyinikala ko, ‘Sɔli, Sɔli, i ye n tɔrɔla nfenna?’ 8N ya nyinikalɛ kɛ ko, ‘N fa, yon bi ile la?’ A ya n yabi ko, ‘Yisa, Nasarɛti kɛ le nde la, i ye min tɔrɔla.’ 9N ta-nyɔgɛ wonu ya waan yen kɔnɔ anu ma kuman kan lamɔɛn. 10N ya nyinikalɛ kɛ ko, ‘Mari, n ni nfen ma?’ Nba, Mari ya n yabi ko, ‘I lasɔ. I ni ta Damasika. Alla ara koe min bɛɛ latɛgɛ ile ye, wo bɛɛ si fɔ i ye nyɔ.’ 11Waan wo ya n nafiyonya woletɔ n ta-nyɔgɛnu ya n bole bira ka ta n na Damasika soe burɔ. 12“Kei do ye nyɔ nun, a tɔgɛ Ananayasi. Mɔgɔ-telennɛ le min si Nɛbi Musata tɔn bɛɛ bira. Yahudiya min bɛɛ siginɛ Damasika, wonu si a gbiliya bɛrɛkɛ! 13Wo nara n bara ka sɔ n dafɛ. A ko, ‘N diyana-mɔgɛ Sɔli, i ni fen yen de gbɛ!’ Wo wati nyɛrɛ rɔ, n ya fen yen tun. 14Ananayasi ko, ‘Ma benbanuta Alla ara ile yabɔ ko i ni a lɔn i ye min mala a ye. A ara ile yabɔ alako i ni ala Wɔli Kɛla Telennɛ yen ka a kuman kan fanan lamɔɛn. 15I wara min yen ka a lamɔɛn, i ni ma sereyɛ la wo la mɔgɛ bɛɛ ye. 16Nba kaka, i ye nfen makɔnɔna tun? I lasɔ ka batasi. I ni Alla matara Yisa tɔgɛ rɔ alako i hakɛ bɛɛ ni yesi ka ban feu!’ 17“Nba, n sɛgira Yerusalɛm. N bi Alla-matarɛ kun na Alla Bato Bɔn la tumɛ min, n ya ko-rayirɛ do rayen. 18N ya Mari le yen ko-rayirɛ wo rɔ. A ya a fɔ n ye ko, ‘I kaliya ka bɔ Yerusalɛm bawo i ye sereyɛ min bɔla n ye, yan-mɔgɛnu ti wo bira.’ 19N ya a fɔ ko, ‘Mari, n tara ileta mɔgɛnu gbesi dina-bɔnnu na nya min ka wonu bira, bɛɛ ya wo lɔn serr! 20Hali Sitifen min fagara ala kumɛla ko la, nde nyɛrɛ ye nyɔ nun ka sɔn a faga koe ma ka a fagalɛnuna durukinu makandan.’ 21Kɔnɔ Mari ya a fɔ n ye ko n ni ta bawo a si n nata kan-tina-yanrɔ-sibolo-gbɛrɛnu ma.” 22Mɔgɛnu ya anu tole masɔ Pɔli la kɔnɔ a ya wo fɔ tumɛ min, anu gbele-gbelenta kan ba la ko, “Wa a bɔ yan ka a faga! A ma bɛn a kɛndɛ ni to!” 23Anu tora gbele-gbelenna. Anu ya anuna kurɛnu firifiri ka gbangban nyɛnsɛn san ma diminyɛ bolo. 24Romu kɛlɛ-den-kun-tigi-ba ya a fɔ ala kɛlɛ dannu ye ko anu ni ta Pɔli la bariki rɔ mɔgɛnu ti kɛ a ma kan min. A ko anu ni a gbesi bosɛ la ka a lɔn Yahudiyanu bi sɔnkɛ layɛlɛla a ma minna ko la. 25Kɔnɔ anu ya a kiri tumɛ min a gbesi koe la, kun tigi min bi a dafɛ, Pɔli ya a fɔ wo ye ko, “Romu tɔn rɔ, a bɛnta ile ni nde, Romu kɛ gbesi min yilikini ma, wa?” 26Kun tigi wo ya wo lamɔɛn tumɛ min, a tara ala kun-tigi-ba wara ka a manyinika ko, “I ye nfen mala? Romu kɛ le kei wo la!” 27Woletɔ kɛlɛ-den-kun-tigi-ba wo tara Pɔli wara ka a manyinika ko, “A fɔ n ye, wa, Romu kɛ le ile la?” Pɔli ya a yabi ko, “Ɔnde, Romu kɛ le nde la.” 28Kun-tigi-ba wo ko, “Nde ya wodi ba bɔ alako n ni ma Romu kɛ la.” Pɔli ya a fɔ a ye ko, “Kebi n sɔrɔnta, Romu kɛ le nde la.” 29Tiriyante wo rɔ, minnu bi tala Pɔli gbesi tinɛ ka a fɛsɛfɛsɛ nun, wonu ya a masɛgi a la. Kun-tigi-ba wo ya a lɔn tumɛ min ko Romu kɛ le ale Pɔli la, ado a ya a kiri yɔlɔkɛnu na, ale fanan kilanta kati! 30Yahudiyanu ya Pɔli maburi minna ko la, kun-tigi-ba wo ye a fɛ ka wo lɔn, yɔ! Woletɔ wo banda kɛ, a ya yɔlɔkɛnu bɔ Pɔli ma. A ya a fɔ saraka-masɔla-wɛnu ye ko anubɛ anuna kun tigi dama ni na ladɛn kɛ. Wo kɔma, a tara Pɔli la anu yakɔrɔ.

will be added

X\