Kɛwɔlɛnu 20

1Sɔnkɔ-sɔnkɛ banta tumɛ min, Pɔli ya dɛnkɛninya-mɔgɛnu kele anu nyɔgɔn fɛ ka anu sɛnbɛ don. A ya a masara anu na ka Masidoniya nyamanita-kilɛ bira. 2A tenbira nyamanɛ min bɛɛ rɔ, a ya Marita mɔgɛnu makawandi siyaman. Wo kɔma, a tara Akeya sigisɔn rɔ 3ka karɛ sawa bɔ nyɔ. Pɔli ye a rabɛnna ka ta Siriya nyamanɛ rɔ kulɔn rɔ tumɛ min, a ya Yahudiyanuna dunbu koe lɔn a kan ma. Woletɔ a ya a latɛgɛ ko a ni sɛgi Masidoniya kilɛ fɛ. 4Pairihusila den kei Sopata min bɔra Bɛriya soe burɔ, wo bilara a fɛ. Aritaka anubɛ Sɛkunda minnu bɔra Tɛsalonaika soe anubɛ Keyasi min bɔra Dabi soe anubɛ Timoti, wonu fanan tara. Tikika anubɛ Tarofimasi fanan bilara a fɛ ka bɔ Esiya nyamanɛ rɔ. 5Wonu tara ma yarɔ ka ma makɔni Taroyasi soe burɔ. 6Biredi-Yɛlɛbɛlɛ-Dɔn-Ladɛn banta tumɛ min, ma donta kulɔn rɔ ka bɔ Filipai soe burɔ. Tele loli kɔma, ma ya anu taran Taroyasi. Ma ya lɔgɔkun kelen bɔ nyɔ. 7Sinbiri wurɛ la, ma ya ladɛn kɛ ka Marita kima dɔn ma nyɔgɔn fɛ. Pɔli kumara mɔgɛnu na. Nba, a tora kumala ha suyi tɛma bawo wo banda kɛ, a ye bɔla anu fɛ ka ta. 8Ma ladɛnnɛ san-bɔn la kan min nun, lɛnpu siyaman bi nyɔ. 9Keminɛ min tɔgɛ Yutikasi, wo siginɛ wundan la nun. Pɔli ye kumala tumɛ min, kinɔgɛ ya ale keminɛ wo yɛ bira kati! Tɔ-a-la, kinɔgɛ tenbira a ma peru! A bɔra san-bon sawa nyɔgɛ la ka bui dugi ma fugbu! Anu bi tala a bila tumɛ min, anu ya a taran, a ara faga! 10Pɔli yigira ka a madu a kuma ka a bole mini a ma. A ko, “Wo kana haminya. A fagani ma!” 11Wo kɔma, a sɛgira san-bɔn la tun Marita kima dɔn tinɛ. Pɔli mɛra kumala anu na ha banda-ka-dɛ ma. Wo kɔma, a tara. 12Anu nyagalennɛ ya keminɛ kɛndɛ bi ka ta a la a warɛ. 13Ma donta kulɔn rɔ ka ta Pɔli yarɔ Asosi soe burɔ. A ya a fɔ ma ye nun ko a ye tala nyɔ a kian la ka na kofu ma ma kulɔn rɔ. 14A ya ma taran Asosi soe burɔ tumɛ min, a kofura ma ma. Ma tara Mitilini soe burɔ. 15Wo banda kɛ, ma kera Kayosi yi-tɛma-dugi ma. Wo banda kɛ, ma kera Semosi yi-tɛma-dugi ma. Wo banda kɛ fanan, ma kera Mailita soe. 16Pɔli ara a latɛgɛ ko a ni tenbi Ɛfɛsa soe la alako a kana wati matanba Esiya nyamanɛ rɔ. A ye a lakaliyala nun ko a ni Pɛntikɔsi tele kɛ Yerusalɛm soe burɔ. 17Pɔli ye Mailita soe burɔ tumɛ min, a ya kilayɛ lata Ɛfɛsa soe dɛnkɛninya-mɔgɔ-banu ma ko anu ni na ke a ma. 18Mɔgɔ ba wonu ke Mailita tumɛ min, a ya a fɔ anu ye ko, “Kebi n nɛ fɔlɛ Esiya nyamanɛ rɔ, n bara to wo fɛ nya min, wo ya wo bɛɛ lɔn. 19Yahudiya donu ya dunbɛ rasa n ma ka a lagbɛlɛya n kuma ha n ya-yi bɔra kɔnɔ n ya nna wɔlɛ bɛɛ kɛ Mari ye famayigi rɔ. 20Koe min bɛɛ si ma wo dɛnbɛn koe la, n ma wo beli wo fenfen na iko wo ya a lɔn nya min. N ya kawandili bɔ ka wo karan gbɛ rɔ anubɛ wola bɔnnu na. 21A Yahudiya wo, a sibolo gbɛrɛ wo, n ya a fɔ anu filɛ bɛɛ ye ko anu ni anu kan-kɔ sɔ anu hakɛ la ka anu yɛ lamunun Alla la ka dɛnkɛninya Mari Yisa ma. 22Nba kaka, n bi tala Yerusalɛm Allata Ni Sɛnimɛla kuma-birɛ fɛ. Koe minnu si ma n na nyɔ, n ma wonu lɔn. 23N ba ta soe bɛɛ rɔ, Allata Ni Sɛnimɛ ye n nalɔnna ko yelela-don anubɛ tɔrɔyɛ ye n makɔnɔna Yerusalɛm. 24Kɔnɔ n ma n nyɛrɛ niyi lɔn fenfen na wo rɔ fɔ n ni nna kilayɛ lakanbali. Mari Yisa ya wɔlɛ min di n ma, fɔ n ni wo ban. Allata hina-wɛ, n ni to wo kibara-nyimɛ fɔla. 25“N bara tagama wo bɛɛ tɛma ka Allala-mansayɛ-kawandili bɔ kɔnɔ kaka, n ya a lɔn ko wo fenfen ti n yen kɛ kɔma tun. 26Woletɔ n bi a fɔla wo ye ko ni wo fenfen halakira bi kɔma, wo dunɛ ti to nde kuma 27bawo n ma Alla sako fenfen to a fɔbɛlɛ la wo ye. 28Wo ni ma saga-fɛ-biralɛnu na ka Allata mɔgɛnu fɛ-bira. Wo ni wo yili to wo nyɛrɛ ko anubɛ wo kurɔn ko Allata Ni Sɛnimɛ ara min bɛɛ don wo bolo. Ado a ya wonu ma atɛ la ala danta sayɛ fɛ. 29N ya a lɔn ko n ba ta tumɛ min, mɔgɛ donu si kɛ wo ma iko suluku-feremɛnu si kɛ saga-kurɔn ma nya min. 30Mɔgɛ donu si bɔ wo nyɛrɛta kurɔn kɛ rɔ ka foninyɛ fɔ alako dɛnkɛninya-mɔgɛnu ni bila anu fɛ. 31Woletɔ wo ni wo yɛ lakalan. Wo yili ni to kɛ ko. San sawa, n tɔrɔta wola ko la ka wo kelen-kelennamɛ-bɛɛ karan su-ni-tele. 32“Nba kaka, n bara wo dantɛgɛ Alla ma. Wo yili ni to ala hina-kumɛ ko min si ke wo sɛnbɛ donna ka ata duwɛ di wo ma. Ado a ara duwɛ wo lamara ala mɔgɛ bɛɛ ye. 33N ma n niyi sa mɔgɔ wo mɔgɔla wodi-gbɛ anubɛ ala sɛnɛ kuma, hali ala kurɛ. 34Wo nyɛrɛ ya a lɔn ko n bole kɛnu bara wɔlɛ kɛ n ye. N ya n nyɛrɛ makoe bɛɛ nyinya anubɛ n fɛ-mɔgɛnutɛ. 35Wo si to sɛnbɛbɔnɛnu dɛnbɛna nya min, n bara wo dama yira wo la nta wɔli-gbɛlɛmɛ fɛ. Mari Yisa nyɛrɛ ya kumɛ minnu fɔ, wo ni wo yili to wonu ko. A ko, ‘Min bi fan nila, wota sewɛ kolo ka tenbi a ye a dila min ma.’ ” 36Pɔli banta kumala tumɛ min, a ya a nyɛnkin anu dama fɛ ka Alla matara. 37Anu dama dira ka Pɔli ramɔnsɔn ka a sunbu. 38A ya a fɔ min kɛ ko anu ti a yakɔrɛ yen tun, wo ya anu yisi tinya bɛrɛkɛ! Woletɔ anu tara a fɛ ha kulun dɛ la.

will be added

X\