Kɛwɔlɛnu 19

1Apɔlɔsi ye Kɔrɛnti soe burɔ tumɛ min, Pɔli bɔra kantɔ-nyamanɛnu tɔ ka na ke Ɛfɛsa soe burɔ. A ya Marita mɔgɛ donu taran nyɔ. 2A ya anu manyinika ko, “Wo dɛnkɛninyara Yisa ma tumɛ min, wo ya Allala Ni Sɛnimɛ sɔrɔn nun, ba?” Anu ya a yabi ko, “Male ma a lamɔɛn bɛ nun defan ko Allata Ni Sɛnimɛ ye nyɔ.” 3Pɔli ya anu manyinika ko, “Nba, wo ya batasili sufa nyamintan sɔrɔn worɔ?” Anu ya a yabi ko, “Yɔni ya mɔgɛnu karan batasili min na, ma ya wo le sɔrɔn.” 4Pɔli ko, “Yɔni ya mɔgɛnu batasi alako anu ni anu kan-kɔ sɔ anuna hakɛ la ka anu ya-lamunun Alla la. A ya a fɔ Yahudiyanu ye ko anu ni la mɔgɔ gbɛrɛ la min bi nala ale kɔma. Ado Yɔni ye Yisa le ma nun.” 5Anu ya kɛ lamɔɛn tumɛ min, anu batasira Mari Yisa tɔgɛ rɔ. 6Pɔli ya a bole sa anu kuma tumɛ min, anu fanan ya Allata Ni Sɛnimɛ sɔrɔn. Anu kumara kan gbɛrɛnu tɔ ka wɔlɔyiya-kumɛ fɔ iko fɔlɔ-mɔgɛnu. 7Anu dama lakofunɛ, kei tan-ni-fila. 8Karɛ sawa kɔrɔ, Pɔli tara don Yahudiyanuna dina-bɔn la ka kuma mɔgɛnu ye yisi-latɛgɛ rɔ Allala mansayɛla ko la. Anu fanan ni la wo la. 9Kɔnɔ anu donu yisi gbɛlɛyanɛ. Anu ma sɔn dɛnkɛninya-koe ma. Anu ya Marita kilɛ lafɛya nyama bɛɛ yala. Woletɔ Pɔli bɔra anu fɛ ka ta Marita mɔgɛnu na a bolo Tairanala karan-bɔn la. Tele-wo-tele, a ye anu makawandila nyɔ nun. 10A tora anu fɛ san fila kɔrɔ. Woletɔ mɔgɛ min bɛɛ siginɛ Esiya nyamanɛ rɔ, a Yahudiya wo, a sibolo gbɛrɛ wo, bɛɛ ya Marita kumɛ lamɔɛn. 11Alla ya kabana-ko-kɛ-sɛnbɛ di Pɔli ma. 12Hali ala pɔkitanɛnu anubɛ ala wɔli-kɛ-durukinu, anu ba ta wonu na kirayatoenu ma, anu si kɛndɛya. Nyina-yogenu si bɔ anu fɛ. 13Nba, Yahudiya do minnu bi tagamana dinkirɛnu tɔ ka nyinɛnu gben mɔgɛnu fɛ, wonu wulita Mari Yisa tɔgɔ rakelela nyina-gben-koe la mɔgɛnu fɛ. Anu ya a fɔ nyina-yogomɛnu ye ko, “Pɔli ye Yisa minna koe kawandili bɔla, n bi wo bɔla wo tɔgɛ rɔ.” 14Yahudiyanuna saraka-masɔla-wɛ do min tɔgɛ Sifa, wola den kemini wɔrɔnfila le ya wo ma. 15Kɔnɔ nyina-yogomɛ ya a fɔ wonu ye ko, “N ya Yisa lɔn! N ya Pɔli wara-koe lamɔɛn kɔnɔ yon bi wole la?” 16Nyina-yogomɛ ye kei min fɛ, wo buira anu ma sɛnbɛ la. A ya anu dama tanban. Anu burimatoe bɔra ala bɔn la, anu nakolɔn. 17Yahudiyanu anubɛ sibolo gbɛrɛ minnu siginɛ Ɛfɛsa soe burɔ, wonu ya kɛ lamɔɛn tumɛ min, anu dama kilanta bɛrɛkɛ! Anu ya Mari Yisa tɔgɛ gbiliya bɛrɛkɛ! 18Dɛnkɛninya-mɔgɔ siyaman wulita anu sɔn-yogomɛ rakaranna ka wo labɔ gbɛ rɔ. 19Minnu bara duriyɛ kɛ, wonu ya anuna duruya-bukunu nadɛn ka anu mintan mɔgɛ bɛɛ yala. Anu ya buku wonu sɔnkɛ yatɛ tumɛ min, wo bɛɛ bɛnta wodi-gbɛ-gbu waga bi-loli (50,000) le ma. 20Marita kumɛ tora nyɛnsɛnna ka koloya sɛnbɛ-ba la wo nya. 21Koe kɛ bɛɛ tenbinɛ, Pɔli ya a latɛgɛ a yisi rɔ ko a tenbi tala Yerusalɛm, a ni ta Masidoniya anubɛ Akeya sigisɔnnu tɔ. A ko, “N ba bɔ nyɔ rɔ tumɛ min, fɔ n ni ke Romu soe fanan.” 22A ya a dɛnbɛna filɛ lata Masidoniya nyamanɛ rɔ, Timoti anubɛ Irasiti kɔni. Ale nyɛrɛ tora Esiya nyamanɛ rɔ watini kɔrɔ. 23Wo wati rɔ, tɔrɔya ba wulita Ɛfɛsa soe burɔ ka a tɛgɛ Marita kilɛla ko la. 24Siyaki do ye nyɔ, a tɔgɔ Dimitiya. Bɛsi-musi min tɔgɛ Atɛmisi, a ye wola kɔ tinɛla muninyɛnu nadanna wodi-gbɛ la. Ala wɔlɛ wo mara tɔnɔ-ba la a wɔli-kɛ-nyɔgɛnu ye. 25Woletɔ minnu bi wɔlɔ kelan wo kun na, anu ya wonu nadɛn kan-tina-kelen ka a fɔ anu ye ko, “N bɔnu, wo ya a lɔn ko ma ye nɔnfuli sɔrɔnna wɔlɛ kɛ rɔ. 26Pɔli kɛ ye min mala kɛ la, a ye mɔgɛnu tɔrɔla Ɛfɛsa soe burɔ yan nya min, wo ya wo yen. A tora doni, a ni ke Esiya nyamanɛ bɛɛ rɔ. A ye a fɔla ko male ye bɛsɛ minnu nadanna, Alla ma wonu na mumɛ! 27Mɔgɛnu si wuli mala wɔlɛ kɛ rasɛla. Ado wo dɔrɔn ma. Bɛsi-musumɛ-makawanɛ Atɛmisila kɔ tinɛ si ma fuyi la mɔgɛnu yala. Esiya nyamanita-mɔgɛ bɛɛ ye bɛsi-musumɛ wo kɔla anubɛ duninya-mɔgɛ bɛɛ! Mɔgɛnu bi nala nyinala a ko!” 28Bɛsi-ladannɛnu ya kumɛ kɛnu namɔɛn tumɛ min, anu diminyara ka sɔnkɔ layɛlɛ ko, “Ɛfɛsa kɛnuna Atɛmisi kolo!” 29Sɔnkɔ-sɔnkɛ wo kɛra soe fan bɛɛ rɔ. Nyama ya Pɔli ta-nyɔgɛnu Keyasi anubɛ Aritaka bira minnu bɔra Masidoniya nyamanɛ rɔ. Anu burumatoe tara wonu na ladɛn tinɛ. 30A sɔgɛ ya Pɔli nyɛrɛ bira ka ta nyama yakɔrɔ kɔnɔ Marita mɔgɛnu ma sɔn wo ma. 31Pɔli diyara nyamanita-mɔgɔ-ba donu ye. Wonu fanan ya sarakanɛ lata a ma ka a madiya ko ale nyɛrɛ kana a kunyɛ ladon ladɛn tinɛ. 32Ladɛn bɛɛ mara sɔnkɔ-sɔnkɛ la. Donu bi gbele-gbelenna koe dola ko la, ni wo ma, ko gbɛrɛla ko la bawo anu nadɛnta nyɔ minna ko la, anu siyaman ma wo lɔn. 33Tɔ-a-la, mɔgɛ donu ko Alɛsanda le koe wo kunyɛ la bawo Yahudiyanu ya a sɔ anu yarɔ. Alɛsanda ya a bole sa a dɛ la ko mɔgɛnu ni anu sabari. A ya a raya ka a nyɛrɛ fɛka mɔgɛnu yala. 34Kɔnɔ anu ya a lɔn tumɛ min ko Yahudiya le, anu dama gbele-gbelenta anu nyɔgɔn fɛ hawa fila kɔrɔ ko, “Ɛfɛsa kɛnuna Atɛmisi kolo!” 35Tɔ-a-la, mɔgɔ ba do ya nyama lakala. A ko, “N ta-nyɔgɛ Ɛfɛsa kɛnu! Bɛɛ ya a lɔn ko Ɛfɛsa kɛnuna soe le Atɛmisi bala kɔ tinɛ kandannɛ la. Bɛɛ ya a lɔn ko kuri min buira ka bɔ san ma, ma ye wo le kɔla. 36Mɔgɔ wo mɔgɔ ti ke koe kɛnu masɔsɔla. Woletɔ wo ni wo sabari. Wo kana ko-wo-ko kɛ tengbereyɛ la. 37Wo ara na mɔgɛ minnu na yan, wonu ma kankanyɛ kɛ bɛsi kɔ tinɛnu tɔ. Wonu ma kuma-yogomɛ fɔ mala bɛsi-musumɛ le ma. 38Ni ko do ye Dimitiya anubɛ a wɔli-kɛ-nyɔgɛnu burɔ mɔgɛ do kan ma, kiti-tɛgɛlɛnu anubɛ mɔgɔ banu bi ma bolo. Anu si anu nyɔgɔn samasi nyɔ. 39Kɔnɔ ni kuma gbɛrɛkɛ ye wo bolo, fɔ wo ni wo latɛgɛ dugurannu tɛma. 40Mɔgɛnu kana a fɔ ko ma ara sɔnkɔ-sɔnkɛ lawuli bi. Ma ti ke fenfen fɔla anu ye sɔnkɔ-sɔnkɛ kɛla ko la! Ado ma ti ke ladɛn-kɛ-kɔrɛ yirala anu na.” 41A banta kɛ fɔla tumɛ min, a ya nyama lasɛgi.

will be added

X\