3 Yɔni 1

1Kɛdi kɛ bɔra nde, kɛmɔgɛ le bolo, ka a lata n diyana-mɔgɛ Keyasi ma min di n ye bɛrɛkɛ! 2N diyana-mɔgɛ, n bi Alla madiyala ko koe bɛɛ ni ta a kilɛ fɛ i bolo. Alamɛ i kɛndɛyara iko i sɔndɔmɛ kɛndɛ ye nya min. 3Ma na kelen nyɔgɛ donu nara tumɛ min, anu ya ila lanayɛ fɔ n ye. I tonɛ tonyɛ rɔ nya min, wo ya a ma, n sewara bɛrɛkɛ! 4Ado ka a lamɔɛn ko nna dannu tonɛ tonyɛ rɔ, fenfen ti n nasewa ka tenbi wo la. 5N diyana-mɔgɛ, i wara n na kelen nyɔgɛnu dɛnbɛ min kɛ, hali i ma sundan minnu lɔn, i wara ko-nyimɛ kɛ wonu ye. 6Anu bara ila keninteya-koe fɔ chɔchi-mɔgɛnu ye yan. I yandi, i ni to anu dɛnbɛna nya do ma min si Alla hɛnɛ anu tagama rɔ 7bawo anu wulita anuna tagama rɔ tumɛ min Kirasiti tɔgɔ rɔ, anu hɛnkili sa dɛnbɛni-ko ma wo bolo. Ado anu ma fenfen bɔ dɛnkɛninyabɛlɛnu bolo. 8A kakɛn, male dɛnkɛninya-mɔgɛnu ni mɔgɔ sufa kɛnu dɛnbɛ worɔ. Ni ma ya wo ma, ma ara matɛ kɛ anuna wɔlɛ rɔ tonyɛla ko la. 9N bara kɛdi-kunduni sɛbɛ chɔchi ma kɔnɔ ale Dayotefasi ti a tole masɔ wo la. A di a ye, ale ni ma kun tigi la. 10N ba ta tumɛ min, n si a labɔ gbɛ ma wo ye ko a ara tɔgɛ sa ma la. Ado a ma tonya fɔ wo la mumɛ! Kɔnɔ a ma dan wo dɔrɔn ma. Ma na kelen nyɔgɛnu ba ta nyɔ tuma-wo-tuma, a ti wonu fanan tabira. Minnu bi a fɛ ka wonu tabira, a si wonu nakala ka anu gben chɔchi la! 11N diyana-mɔgɛ, i kana bila ko-yogomɛ fɛ fɔ ka ko-nyimɛ ma wola misalɛ la. Min bi ko-nyimɛ kɛla, Allatɛ le wo tigi la. Min bi ko-yogomɛ kɛla, wo tigi ma Alla lɔn. 12Bɛɛ ye n fa Dimitiya tɔgɔ-nyimɛ fɔla. Ado anu bi min fɔla, wo bɛɛ tonyɛ. Ma ara mata sereyɛ kofu wo ma. Wo ya a lɔn ko ma ya min fɔ, tonyɛ le. 13Ko siyaman bi n yisi rɔ ka a fɔ i ye kɔnɔ a ma di n ye, n ni wonu sɛbɛ kɛdi kɛ rɔ. 14A sɔgɛ ye n na, n ni i yen tiriya! Ma si kirabɔ-nyimɛ kɛ worɔ a kilɛ fɛ. 15Yisi-kimɛ ni to i fɛ. I diyana-mɔgɛ-bɛɛ ya i kɔndɔn. I ni ma diyana-mɔgɛ-bɛɛ kɔndɔn ma ye.

will be added

X\