2 Timoti 1

1Nde, Pɔli le ye kɛdi kɛ sɛbɛla. Alla ya n ma Yisa Kirasitila kilayɛ la bawo wo le di ale Alla ye. A ya nimayɛ di n ma iko a ya lanyiri kiri nya min. N ya wo sɔrɔn ka a lake mɔgɛnu ma bawo Yisa Kirasiti lamaranɛ n yisi rɔ. 2N bi kɛdi kɛ latala ile Timoti ma, min manɛ n ye iko n diyana-dan. Alamɛ ma Fa Alla anubɛ ma Mari Yisa, Allata-Mɔgɔ-Yabɔnɛta hinɛ ni to i fɛ ka kinikinɛ anubɛ yisi-kimɛ di i ma. 3Mabɛ n benbanu bi Alla batola ma sɔndɔma-sɛninyanɛ la. N ba Alla madiya su-ni-tele, n si baraka bira a ye ilela ko la. 4N bi n mirila i ya-yi layigi ma, wo le ya a to, i yen-sɔgɛ ye n na bɛrɛkɛ! Ado wo le si a diyɛ don n tɔ. 5N hɛnkili tonɛ dɛnkɛninya-kɛndɛ wo ko min bi i rɔ. Dɛnkɛninyɛ wo sufa ye i mama Lowisi anubɛ i na Yunasi fanan tɔ. Ado n lanɛ a la ko a ye ile fanan tɔ. 6Wo le ya a to, n bi i hɛnkili bilala ko Alla ya fandɛ min di i ma, i ni wo mara a kin na! N ya n bole sa i kuma tumɛ min, i ya wo sɔrɔn tumɛ wo le tɔ. 7Ado Alla ya ata Ni Sɛnimɛ min di ma ma, wo ma male ma kilandɔgɛnu na. Kɔnɔ a ya ma yisi ragbɛlɛya ka sɛnbɛ anubɛ keninteyɛ anubɛ nyɛrɛ-marɛ di ma ma. 8Nba, n bi yele la ka a tɛgɛ nta lanayɛ le ma Marila ko la. Wo kana a ma, i ni miliya sereya bɔ tinɛ Mari ye. I kana miliya nde fananna ko la. I ni kofu n ma kibara-nyimɛla nyagbɛ kɛ rɔ iko i ye Allata sɛnbɛ sɔrɔnna nya min. 9Alla ya ma kisi ka ma yabɔ ko ma ni ma ata mɔgɔ-sɛnimɛnu na. A ma ma yabɔ mata kɛwɔlɛnuna ko la fɔ a nyɛrɛ sako anubɛ ata hinɛ baraka rɔ. Yanni duninya ni dan, a ya ata hina-wɛ yira ma la Yisa Kirasiti rɔ. 10Kɔnɔ kaka, ma kisilɛ Yisa Kirasiti nara min kɛ, a ara a yira ma la gbɛ rɔ ko Kirasiti ara nɔ-ko sɔrɔn sayɛ ma. A ara habadan-nimayɛ yira ma la kibara-nyimɛ baraka rɔ. 11Alla ara n yabɔ ka n ma kilayɛ anubɛ karan-mɔgɔ la kibara-nyimɛ lake koe la. 12Wo le ya a to, n tɔrɔnɛ ka. Kɔnɔ n miliyani ma Yisala ko la bawo n bara dɛnkɛninya ale min ma, n ya wo lɔn. N lanɛ a la ko a ara tonyɛ min kerifa n na, ale si ke wo marala ha tele-laban-lunyɛ. 13N ya i karan kuma-kɛndɛ minnu na, wonu bira gben! Wonu ni ma misalɛ la ile ye ko i ni wo nyɔgɔn kɛ. Dɛnkɛninyɛ anubɛ keninteyɛ minnu bi ma bolo Yisa Kirasiti baraka rɔ, i ni to wonu tɔ. 14Tonyɛ min kerifanɛ i la, wo lamara Allala Ni Sɛnimɛ sɛnbɛ baraka rɔ min siginɛ i yisi rɔ. 15Iko i ya a lɔn nya min, min bɛɛ ye Esiya nyamanɛ rɔ, wonu bara anu kan-kɔ sɔ n na katarala Faigɛla anubɛ Hɛmogɛnisi ma. 16Alamɛ Mari kinikinita Onɛsiforala denbayɛ ma bawo a ya n sɛnbɛ don tuma siyaman. A ma miliya ko n bi yele la min kɛ. 17A kera Romu soe ma nkɛkuna, Onɛsifora ya n nyinɛ dabira ha a ya n yen. 18Alamɛ Mari ya a dɛnbɛ ko a ni kinikinɛ sɔrɔn Mari bolo kiti-tɛgɛ-lunyɛ! A ya n dɛnbɛ nya min Ɛfɛsa soe burɔ, i ya wo lɔn serr!

will be added

X\