2 Pita 2

1Foninya-nɛbinu bi fɔlɔ-mɔgɛnu tɛma nya min nun, foninya-karan-mɔgɛnu si taran wo fanan tɛma wo nya na le. Anu si na foninya-karan la, min si halakilɛ kɛ. Mari min ya anu hɔrɔya, anu ya anu kan-kɔ sɔ wo la. Wo si halaki-lakalimɛ lana anu nyɛrɛ kuma. 2Hali wo, mɔgɔ siyaman si bila anu sɔn-yogomɛ fɛ. Mɔgɛnu si kuma-yogomɛ fɔ ka a bɛn kila bɛrɛ ma foninya-karan-mɔgɔ wonuna ko-ladan-nya ma. 3Ka a tɛgɛ foninya-karan-mɔgɛ wonuna wasabɛlitayɛ ma, anu si to tɔnɛ sɔrɔnna wo kuma anuna foninya-kumɛnu fɛ. Anuna kiti-tɛgɛlɛ rabɛnnɛ le, bi ma. Ado anu halakiyi ye a yɛ la feu! 4Melika minnu fɔlɔn ya hakɛ kɛ, Alla ma wonu yamasansan. A ya anu nakɛ nyahanama rɔ ka yɔlɔkɛ kɛ anu ma pinpi rɔ nyɔ kiti-tele makɔnɔ tinɛ. 5Alla ma fɔlɔ-mɔgɛnu fanan yamasansan. A ya yi-wa-belebele lana mɔgɔ-yogomɛ wonu kuma. A ya minnu kisi, fɔ Nowa anubɛ ala denbayɛ mɔgɔ wɔrɔnfila. Nowa ya kawandili bɔ ka a bɛn telenbagayɛ ma. 6Alla ya Sɔdɔm anubɛ Kɔmɔra soenu kiti ka anu halaki tɛ la. A ya anu ma misalɛ la min si ma ko-yogoma-kɛlɛnu na ka wo yira anu na yarɔ. 7Mɔgɔ-nyimɛ do siginɛ anu tɛma min tɔgɛ Lɔti. Wo ye anu kɛ-nya-yogomɛ wonu tayenna ka a lamɔɛn tele-wo-tele. A sɔndɔmɛ tɔrɔta anuna tɔn-tinyɛla ko la kati! Woletɔ Alla ya a kisi. 9A melika-yogoma wo, a fɔlɔ-mɔgɔ wo, Sɔdɔm anubɛ Kɔmɔra kɛnu wo, Mari ya wonu halaki-nya lɔn min kɛ, a ya Allata mɔgɛnu kisi-nya lɔn anuna kɔrɔbɔlɛnu tɔ wo nya na le. A ya a lɔn fanan, a si ko-yogoma-kɛlɛnu mara nya min tɔrɔyɛ rɔ ha kiti-tɛgɛ-lunyɛ. 10Ado minnu bi tagamana anu fɛrɛ-bɔnku-nata fɛ, hali ka Allala mansayɛ lafɛya, a si a lagbɛlɛya wonu kuma. Foninya-karan-mɔgɛ wonu wasira. Anu si anu nyɛrɛ kɔrɔbi kati! Melika-gbiliyanɛ minnu bi san ma, anu ti wonu gbiliya mumɛ, fɔ ka to wonu mɔɛnna. 11Hali melika-nyimɛ minnu sɛnbɛ kolo foninya-karan-mɔgɔ wonutɛ ko pon, anu ti melika-yogomɛ wonu nafɛya Mari yakɔrɔ. 12Anu ma koe minnu nya-yen, anu bi wonu nafɛyala. Anu manɛ iko firarɔ-soge minnu ti anu miri anuna ko-ladan-nyanu ma fɔ ka bila anu kun fɛ. Anu nadannɛ anu bira-koe anubɛ anu faga-koe le la tun! Ado anu si na halaki iko firarɔ-sogenu. 13Anu bara mɔgɛnu tɔrɔ min kɛ, anu si na tɔrɔyɛ wo sarɛ sɔrɔn. Min si anu fɛrɛ-bɔnku-nata wasa hali tele rɔ, anu diyana koe le wonu na. Anu ba kofu wo ma fen dɔn tinɛ tuma-wo-tuma, anu si na miliyɛ anubɛ lafɛyɛ la anu bolo. Anu bi sewala anuna kisimiriya-koenu tɔ tolon! 14Anu ba musu woo yen, anu bi nyinina wo ma. Nata yogomɛ min bi anu yisi rɔ, wo ti anu wasa mumɛ! Mɔgɛ minna dɛnkɛninyɛ sɛnbɛ sa, anu bi wonu nadonna hakɛ rɔ iko gbɛrɛ lasiginɛ. Anu burɛ lafanɛ nata la, ado anu bi Allala dankɛ kɔrɔ! 15Anu bara kila-telennɛnu boloka, ha kilɛ wo ara to-a-rɔ anu ma. Anu bara bila Beyorila den Belamta kilɛ fɛ bawo wo duruta wodi sɔrɔnna ala ko-yogoma-kɛ le tɔ. 16Ado Belamta sofɛlɛ ya mɔgɔni-gbu kan fɔ ka ale Belam makuma ala tɔn-tinyɛla ko la. Wo kumara a ye alako nɛbi wo ni sɛgi ka ata yuwayɛ boloka. 17Foninya-karan-mɔgɔ wonu mani de iko tenke min gbalanɛ a wɔrɔn la. Anu mani de fanan iko fɔnyɔ wa sigi banda-finyɛ min kɔrɔ. Alla ara pinpi-fin-bɛ mara anu denu denu ye. 18Anu bi anu nyɛrɛ matɔgɔla gbɛ ko-fuyinu tɔ. Anu bi nata-yogomɛnu kɛla alako ka wonu bira minnu kisi-san ka bɔ mɔgɔ-samanɛnu tɛma. 19Anu bi lanyiri kirila wonu ye hɔrɔyɛla ko la kɔnɔ anu nyɛrɛ ye yɔɔnyɛ rɔ halakiyi bolo. Ado fenfen si mɔgɔ nɔ, wola yɔɔn le ile la. 20Minnu bara ma Mari anubɛ ma kisilɛ Yisa Kirasiti lɔn ka bɔ duninya ko-tinyanɛnu ma, ni anu sɛgira ko-tinyanɛ wonu ma tun, ha wonu ni anu nɔ, wo mɔgɛnuna ban si yogoya ka tenbi a fɔlɔtɛ la. 21Yanni anu ni bɔ kila bɛrɛ fɛ, anu ya min lɔn kɔrɔma la, a fisa nun, hali wonu ma telenbagaya-kilɛ wo lɔn nun ka anu kan-kɔ sɔ Allata tɔn-sɛnimɛnu na min bara di anu ma fɔlɔn. 22Tili min ko, “Wuli ara sɛgi tun ka a teseri dɔn,” wo ara ma tonyɛ la. Tili min ko, “Kɔsɔ-kunɛ, wo ara sɛgi ka a sa bore rɔ tun, tonyɛ le wo fanan na.”

will be added

X\